為了實現媽媽遺願，我成為了女校男生: 打爛醋罈

陸運會完後，Ivana話大家一齊去食晚飯，因為果陣都成6點。不過食餐飯都唔係用好多時間者，7點半果時，我已經同雪凝兩姊妹一齊返屋企，突然間Ivana就轉身同我講。
 
「拿!我同Karen去診所等佢爸爸收鋪一齊返屋企，你就送Jessie返去先」
 
「下?妳做咩唔同家姐一齊返去呀?」
 
「鬼叫人地餵你食野咩姐夫，你兩公婆嘅問題就自己解決」
 
莫非雪凝介意我同詩敏兩個人食飯?好奇怪，雪凝早左幾個站落車，由於我要送佢返屋企關係，所以我都跟埋佢落，經過雪晴身邊時，佢喂左我一下
 




「快d氹返家姐啦，佢尋晚喊呀」
 
落車後，雪凝低頭係到行，而我就跟住佢身邊，一直咁行都唔係辦法，於是，我伸手拖起佢，行到去一個公園到。
 
公園內，我低頭望住雪凝，發現佢眼中有淚水，而且開始低聲抽泣
 
「妳…做咩事喊呀?」
 
佢用一對充滿淚水嘅眼望住我，眼淚慢慢流落黎
 




「衰人…」雪凝細細聲講出呢兩個字
 
「做…做咩事呀?」
 
「我話你正衰人呀!」佢嘅眼淚愈來愈多
 
「我做左d咩事呀?」老實講，我真係唔知自己做左d咩
 
「你呢兩日…有冇理過我呀!扔低我一個係看台上邊!食飯果陣又…佢又當眾餵你…究竟…Jasmine同你係唔係契哥契妹嘅關係咁簡單呀!」
 




呢下我終於知道咩事啦，原來呢個傻妹呷醋，仲係呷個F.3妹妹仔嘅醋，不過諗一諗，莫非…雪凝一直對我…
 
「傻妹!我邊有呃妳呀?妳地一個二個坐到走哂光，我點可以留係上邊呢」
 
「咁點解…佢又餵你呀!又唔見我係學校餵你?」
 
「咁…妳想餵我…我又冇咩所謂嘅…如果妳唔怕俾人講閒話…」
 
「咁即係Jasmine就可以呀?仲有!你做咩拖住我呀!」
 
「我唔拖住妳黎公園，妳又點會跟我黎呢?仲有詩敏係我契妹，我同佢D關係妳可以問下我家姐，我同佢細個成日玩新娘子遊戲，佢成日都話要做我新娘，但果陣佢得3歲，我7歲，呢10年我同佢都冇玩呢d野啦」
 
雪凝聽完我嘅答案之後開始平靜落黎，但係佢仲係到低聲喊緊
 
「妳…呷醋?」我將佢拉近我，雙手拖住佢雙手，雪凝對手真係好似佢個名咁，雪一樣咁凍




 
佢鼓起泡腮直望住我
 
「係…我係呷醋」