為了實現媽媽遺願，我成為了女校男生: 第一次流淚

係屋企張床上，我唔太瞓得著，一合上眼就見到Jasmine餵阿風食野嘅畫面，忍唔住，流下左第一次為男仔而流嘅眼淚
 
「家姐?妳冇事嘛?」
 
「我…冇事，妳仲唔快d瞓?乖啦」
 
雪晴走入黎我間房，瞓上我張床到攬住我
 
「家姐，今晚我陪妳瞓啦，我知妳咩事唔開心架，妳喊出黎舒服d架」
 




估唔到我要個讀F.2嘅妹黎安慰返我轉頭
 
我成晚都係雪晴個心口到喊，直到瞓著為止
 
原來我妹妹個胸都唔少野…
 
第二日嘅陸運會，有我地學校傳統嘅師生賽，1500米長跑(其實一D都唔長)，由於係師生賽關係，所有同學都可以參加，但全部男老師要讓賽400米，即係一個圈，所以咁多年黎，都係由學生或者女教職員贏出(有傳聞由男性贏出嘅話，全場汽水果汁佢要包哂)。但今年大家嘅目光都集中係一個男仔身上------程逸風。今日可能係全校女仔第一次見佢著短褲跑步，所以好多人都好興奮，但係我小學已經睇左三年，我好可以肯定，佢係冇腳毛，或者有，不過太幼我睇唔到。
 
“砵!!!”主持起步禮嘅校長好開心咁睇住一班村姑咁跑得好開心，嘻嘻哈哈咁跑，務求盡快將班雄性生物拋離
 




“砵!!!”各雄性生物係一個圈後起跑，估唔到，佢地一起跑就引黎咁多女同學尖叫
 
出名高大靚仔嘅體育老師張Sir同阿風兩個以保特咁嘅速度將佢地同班女仔嘅距離係幾分鐘內完全消除，而且轉眼間仲已經領先超過100米
 
佢地兩個應該已經完全迷到全場同學
 
「嘩…估唔到妳老公咁犀利，連田徑隊班同學都俾佢拋離哂」
 
「佢晚晚落街跑步，風雨不改嘛」
 




「妳係咪果d呢『BB呀!跑完過黎抹汗啦BB』果款女仔?」
 
「乜野BB呀…我邊會咁叫佢喎」其實咁樣叫都幾好嘅，如果我有機會嘅話
 
係F.2果排座位，雪晴不停係到為阿風打氣
 
「姐夫!!上呀!!!你贏唔到家姐今晚唔煮飯呀!!!」
 
雪晴呢句已經引黎好多同學大笑，點知去到F.3果排，Jasmine佢就仲恐怖
 
「喂!!!贏唔到嘅話恐怖雞叫你圍住學校跑山50次呀!!!」
 
Jasmine不愧係恐怖雞2.0
 
結果阿風係兩個小妹妹嘅威迫下贏左1500米金牌




 所以佢星期一返學要請我地6B全班小息食野
 
但係唔知點解，我好似好唔開心咁