為左有人陪，今年情人節我搵左個ptgf: 4

相就影完，佢就唔會因為咁真係變左我條女，不過我仲留戀緊第一次同女仔咁close影相，個心仲跳得幾快下。

我仲平伏緊心情果時阿寶已經望住部手機睇緊頭先幅相，咁我緊係哄個頭埋去睇埋一份啦，點知比佢推返開。

「唔好睇住先啦，等我執下幅相先睇得架。」係咪所有女仔都一定要執完相先見得人？

「唔洗執啦，你咁靚女，點影都好睇。」依句聽落好擦鞋，不過都係我心聲，我好難想像阿寶咁靚女，正正經經咁影可以衰得去邊。

「嗤，邊到係啫。」阿寶聽到我咁讚佢就緊係開心，不過又要扮個唔信你講野嘅樣出黎，係咪個個都鍾意比人讚完再唔認。





佢把口話唔係，但聽完我聽又真係放低個手機唔再搞，好快我就聽到叮一聲，原來佢已經將張相Whatsapp比我。

「都話左架啦，咪幾好睇。」我睇住自己手機入面嘅阿寶，感嘆住企佢隔離嘅我簡直成舊薯仔咁。

「你成日都咁樣讚女仔架？」阿寶無端端問我。

「唔係啊，係你先會咁。」仆街，依句好似講得有啲曖昧添...唔係喎，依家佢都算係我女友，我咁樣講都冇咩問題啫。

點知阿寶聽完之後粒聲唔出，就自己行左去睇衫，望都唔望我。





佢唔會...係怕醜掛？

我即刻追上佢，我好想睇下依一刻佢係點樣，點知佢好似知我想點，係咁擰轉頭唔比我望到佢個樣。

「你怕醜啊？」我係佢隔離細細聲問。

「邊個叫你咁講野喎。」阿寶塊面紅紅地咁望我，估唔到佢嬲爆爆個樣都鬼咁得意。

我見到佢依個反應，真係覺得佢就好似發緊男朋友脾氣嘅女仔咁，我諗都冇諗到就拖住左佢隻手。





佢好似比我嚇親，不過就冇甩開我，反而細細力咁握返住我。

「可以？」我問佢。

「你比左錢架嘛，緊係可以。」佢微笑住黎答，同時都提醒左我，眼前依個女仔唔係真係我女朋友，只係一個ptgf。

就算係咁，我都冇放開佢，我地就咁樣拖住手一直行，直到成個旺角街頭都比我地行曬。

「我Book左間餐廳食飯，行啦我地。」今次我冇再問佢意見，因為我知道無論係啲咩佢都會陪我，只限今日。

情人節套餐咁多年黎都同我無緣，但唔代表我甘心一直係咁，所以我決定搵ptgf果陣已經決定埋要係今日同條女食返個二人餐。

「先生有冇訂位？」入門口職員就問我。

「有，兩位！」嗚，情人節正日大大聲叫兩位原來係咁爽。





「跟我入黎。」佢帶住我同阿寶去到張二人枱坐低。

依間西餐廳雖然唔係話好高級，但勝在格局幾好，坐又坐得舒服。而且最特別嘅係今日佢安排左對組合唱歌，佢地一男一女各自有個結他，一時獨唱，一時合唱，將成間鋪嘅氣氛變到好浪漫。

「估唔到你幾識揀喎。」坐我對面嘅阿寶笑笑口咁讚左我一句。

「你都鍾意就好。」

野食好快就陸續黎到，西餐來來去去都係食果啲野就唔多講，反正我其實都唔係咁在意，只不過想試下同女仔係情人節出街食飯。

點知阿寶食食下停曬手咁，我緊係即刻問佢咩事啦。

「做咩？啲野唔岩食？」我有啲緊張問佢。





「唔係，咁岩聽到首我幾鍾意嘅歌，所以聽到入左神啫。」佢同我講。

「依首咩歌黎？我未聽過嘅。」我聽完阿寶講就留心聽下歌手唱緊係咩歌，不過周圍啲人嘅傾計聲令我唔係聽得太清楚啲歌詞。

「依首叫Greedy，係落日飛車嘅歌，你返去可以聽下原唱。」阿寶提到首歌時望落好興奮，睇黎佢真係好鍾意。

「好啊。」我都想了解下阿寶依個女仔鍾意嘅野係點樣。

晚飯食完，我就知道今日淨返嘅時間唔多，本來我地應該就咁分開，我都明白我同阿寶嘅關係只係客人同ptgf。

但我其實心入面早就冇將阿寶當成Ptgf，因為同佢嘅相處足以令我忘記依一切，佢嘅身份唔再重要，我淨係知道我想留係佢身邊耐一啲。

所以我開口問佢。

「可唔可以比我送埋你返去。」





「Sorry呀，我地有規矩限住，唔可以比個客知道住邊。」佢搖搖頭講。

「唔緊要啦，你返去小心啲啦，依到係今日啲錢，你收好去。」我失落咁比完錢阿寶就諗住轉身離開。

「喂！」佢突然叫我。

「嗯？」

「依家我收完你錢，咁即係你依家唔係我個客...」佢講到一半停低左。

「即係？」我唔明佢意思。

「死蠢！我意思係，你仲想唔想送我返屋企啊！」佢輕力咁彈左我額頭一下。





「想啊！」我激動咁捉住佢隻手講。

「行啦。」佢依然冇甩開我，由得我拖住佢直到係巴士坐低。

我望住坐係入面嘅阿寶，突然諗到樣野。

「可唔可以試樣野？」我問佢。

「試乜野？」佢好奇咁問。

我拎出耳機連上我手機，將一邊耳筒遞比阿寶。

「點解你成日諗到依啲野黎做。」佢笑左笑，接過耳筒戴好。

「你唔覺得，同其他人聽同一首歌果陣好似將大家嘅思緒連埋一齊咩？」我自己都戴好耳機就按下隨機播放。

「你諗埋啲野真係特別。」阿寶咁樣講，我都唔知佢係咪讚緊我。

歌曲一直播，我地冇再講野，巴士默默到左站，我地亦隨即落車。

耳機最後播放嘅係 十面埋伏。