為左有人陪，今年情人節我搵左個ptgf: 3

「我地做啲咩呀？」毫無經驗的我問阿寶。

「你冇野想做咩？」她反問我。

「我...第一次情人節同女仔出街，我都唔知應該做啲咩。」雖然好瘀，但我都係照直講出黎。

「其實我都未試過情人節同男仔出街架...」她紅都面曬咁講。

「吓，咁樣講，即係你真係A0？」我嚇親咁問佢。





「緊係真架啦，我做乜會係依啲野到講大話？」佢問返我轉頭。

「我諗住...你咁靚女點會冇拍過拖。」

「你讚緊我啊？」

「喔...係掛...」

「多謝曬喎，嘻嘻。」佢講完又笑左下，真係好吸引。





「但點解你拖都未拍過就做ptgf？」仆街，我問完就知自己衝動左。

果然，佢聽完冇答到我，本來仲笑笑口嘅佢即刻變到有啲黑面。

「Sorry，我多口左，你唔好介意。」唉屌，邊有人會問人啲咁嘅問題，佢唔鍾意都正常。

「唔緊要。」佢把口咁講，但睇黎唔似唔介意。

「不如去睇戲？」我為左唔好咁尷尬，就隨口講樣野出黎做，反正睇戲果陣唔洗講野，就唔怕我又講錯野。





「好喔，等我睇睇先...睇戲唔洗另加錢，不過戲飛錢要你比。」佢睇下手機同我講。

「得啦冇問題，行啦我地。」其實我都預左戲飛錢我比，畢竟我都未試過請女仔睇戲，嘻嘻。

我們去到百老滙出面，諗左陣先決定睇小丑女，佢好似好有興趣咁，入到場我先發現原來佢好鍾意Harley Quinn依個角色，幾乎出場果陣佢個樣就特別專注。

我點解知？因為我一直望住佢囉，佢連側面都係咁完美，而佢專心睇戲果陣唔會知道我望緊佢嘛，我緊係望多兩眼啦。

「好正呀。」佢出門口伸左個懶腰。

佢依個懶腰就不得了，就算佢套衫唔算貼身，但係都將佢身體曲線完全展現係我眼前，我估我當時係成個人呆左，好彩我定力夠好。

「做咩呆左？」佢竟然問返我轉頭！

「無野，諗返起啲情節啫。」不得不說，我轉數都幾快。





「同你講樣野啊，我好鍾意小丑女架，我舊年萬聖節仲試過cosplays佢。」佢細細聲咁同我講。

嗚，我一諗到阿寶著住小丑女件衫加埋條短褲仔，再用果個引死人嘅笑容望住我，我已經有啲頂唔住。

「我都想睇下啊。」我好直接咁對佢講。

「吓，我點比你睇啊。」佢冇諗到我會咁講，果斷咁拒絕左我。

「唔緊要啦，我地去行陣街再食飯好冇？」

「你話事啦，你想做咩我都會陪你。」

佢順曬我意，如果真係有個女朋友咁對我就好。





「你平時去行開啲咩架？」我都係問下佢意見先，行街依方面我一啲都唔在行，而且係同女仔行街。

「我多數行都係去下U記H&M果啲，或者上網睇岩先去買，所以我都唔多鍾意行街架。」阿寶講完我都唔係好信，原來世上有唔鍾意行街嘅女人。

當然佢咁樣講我就緊係聽佢意見，我話同佢行街，唔通真係想同佢行街咩，祗不過係想試下同女朋友行街係咩感受。

啲人成日話陪女人行街對男人黎講係折磨，我真係好想比人折磨下呀！

H&M就係隔離，我地自然就去左先。如果大家去過旺角間H&M就知入面最多嘅唔係衫，係鏡！

我提起塊鏡當然有原因，因為我諗起我睇啲女同學最鍾意做嘅一樣事就係對住塊鏡影相，所以我就問阿寶。

「可唔可以影張相啊？」老實講，我有啲驚佢拒絕我架。

「可以啊......依樣唔洗收錢架。」佢講完仲單左下眼。





我地行到樓梯中段，佢拎出手機準備影相，到左依刻我突然好緊張，究竟同女朋友影相係咩感受，我即將會知道。

咔嚓

「你睇下。」阿寶比手機我睇。

「吓，影完架啦？」我傻傻地問。

「係啊，做咩啊？」佢唔知點解我會咁問。

點解...一啲特別都冇...

「我知啦！」我突然大叫。





「咩事呀？」佢比我嚇一嚇。

「可唔可以close啲咁影幅？」我終於知問題係邊，就係岩岩影果幅完全冇情侶嘅感覺。

「你想...點close法？」佢有啲怕丑咁問。

「嗯...至少搭住膊頭咁啦。」我雖然好想話嘴住黎影，但我自己都覺得有啲唔好意思。

「都得嘅。」佢諗一諗就應承左。

當我想伸手搭住佢時，佢突然縮開，然後行去我嘅上一級，由佢黎搭住我膊頭。

而且唔係普通咁搭住我，佢上臂位置係我頸後，前臂直程放軟曬咁吊係我膊頭前面，佢咁樣搭住我，個身自然會挨埋我到，我手臂就感受到有舊軟淋淋嘅野貼住我。

老實講，好撚爽。

「咁樣得唔得啊？」佢笑住問我，我都唔明點解佢頭先講果陣仲好似有啲怕丑，做起上黎就咁大膽。

「咁樣好好。」我當然話好。

今次我終於理解同女朋友影相係咩感受，重點唔係幅相，而係影嘅過程，最後留下果張相只係一個記錄。

記錄左我同你依一刻係以情侶身份影相。