結咗婚十幾年，好似已經唔太愛。《相愛十年》: 圓（二）

翌日，棉花糖在下午外出，思思在家工作，正等待阿朗回家。
 
反正只有他倆夫妻二人吃晚餐，她隨便煮了粟米肉粒飯、切了兩個橙。她的心情很美麗，如同她飛揚的眉一樣，她不再似以前憂煩，不會再在說之前滿心都是生硬的稿件——
 
現在，她在心裏大概有個大綱；到時，真要和他說的話，就輕鬆地組織，反正他們都敢聽、都敢說，敢於坐在沙發上對着關閉的電視而不侷促不安。
 
她將洗完的衣服放進乾衣機裏去，聽它「鞏隆、鞏隆——」地轉動。
 
一切，如常，讓她確切地知道此處是她的家、他們的家。
 


她聽見門外有腳步聲、掏出鎖匙的聲音，她認得那是他專屬的；她前去替他開門。
 
「我買咗雪糕，做飯後甜品。」
 
「好吖。」
 
他也輕鬆。
 
一開始聊的時候，他們都緊張，整個氣氛都有點凝重，好像非要找一個解決方法才甘於罷休；後來，他知道，有些事情說了出來，再照顧了情緒，就已經是解決的一半，總好過互相不了解，毫不溝通。
 


晚餐時，他們一邊看電視，一邊扒着飯，偶然應一應電視中人。
 
他去洗碗。
 
他出來，順便將雪糕拿出來，遞一杯雲呢拿味的給思思。
 
她一邊開蓋，一邊問：
 
「開始啦？」
 


「係，棉花糖番嚟我哋就唔講得啦。」
 
「好。程家第唔知幾多次家庭會議宜家開始——你發言先，我想食多兩啖。」
 
他吃了一口，然後說：「我好耐都冇食過雪糕。
 
嗯……我覺得呢，我哋有啲少講自己嘢，上個月都唔係咁；今個月就好似係講棉花糖多啲。」
 
「係。」
 
她點頭。
 
「你都覺嘅？」
 
「係。」


 
他猜測：
 
「咁可能係因為棉花糖最近成日出去玩？所以我哋先傾多咗嘢？」
 
她笑：「你講啲嘢，都幾似我番工嗰時講嘅嘢咁。」
 
「合格嘛？」
 
「滿分。
 
我認同嘅……所以，其實我冇特別唔開心啊。而且，我自己最近都攰攰哋，所以先少咗出聲，但唔係因為覺得：同你有問題。你呢？」
 
「我冇特別攰，但我都冇唔開心，因為我都唔覺我哋有嘢，所以今個月少咗傾偈，我都明……只係擔心你點諗啫。
 


之前呢，我哋咪覺得淡咗嘅？嗰時嗰種唔開心、低氣壓嘅感覺，係非常非常明顯嘅……我哋都識咗咁多年，知道咩叫好，咩叫唔好——但今次唔係。」
 
「雪糕就融，你快啲食先。」她用頭指一指他的手，接下他的話：
 
「我都幾enjoy，我覺得我哋都幾唔錯喎。但係真係冇乜嘢講——但、再但係我不嬲都唔係多嘢講嘅人。」
 
她向他扁扁嘴；他替她抹走嘴角的污跡，說：
 
「得啦，如果冇唔開心就得，咁就好啦。」
 
「嗯！
 
我淨係想知點解棉花糖宜家有時唔番屋食飯——唔係咁多朋友同老師吖嘛？」
 
她不解；他皺眉，一臉不情願：


 
「唔係呀嘛……咁早，唔好啦。」
 
「不如我哋chok吓佢？」
 
二人不自覺地焦慮起來。
 
「如果真係問中，咁點算先？可以點？」
 
「其實，都冇可以點吖——我哋有咁專制咩？」
 
思思的母親同樣未曾阻止她戀愛，但當時，她已成年；阿朗側頭：
 
「唔係專唔專制嘅問題啊，係我哋會擔心佢㗎嘛，萬一佢俾人呃咁點？佢係我個女嚟，我唔會允許任何人蝦佢，而且佢又係女仔，我一定會錫住佢。」
 


她假裝吃醋，抬眼看他：
 
「搞錯啊，你都冇咁樣同我講嘅？你有錫住我咩？我就係之前俾你呃咗囉。」
 
他笑笑：「邊有蝦你，不知幾錫你。」
 
說罷，他含了一口半融的雪糕，然後和她擁吻，直至呼吸急促。
 
「夠唔夠錫吖？」
 
「我想要雲呢拿味多啲喎——喂喂，其實棉花糖可能真係人緣好呢，我以前中學都好多人約喎。」
 
「但佢初中咋喎……」
 
阿朗搖頭；思思認同，但又自嘲：
 
「又係。笑死，我哋會唔會諗太多？棉花糖明明好乖㗎喎。」
 
「弊在其他人唔乖呢，諗定好吖；總之無論個男仔點，上嚟都係唔會有雞脾食嘅。」
 
他拿起她的雪糕杯，吸入一點雪糕，再觸碰她的唇。
 
二人的手在對方的身上遊歷，他將她托到他的大腿上，深深淺淺地吸啜她的唇；她輕輕地咬了他一下，他停下看她。
 
她說：「咬。你好鍾意㗎喎。」
 
他一臉不解，但她沒以言語解釋，又再一次與他舌吻，手伸至他褲子的扭扣之上，再用很柔媚的聲線呼向他的頸：「我哋一個星期冇——」
 
他聽罷，立刻準備脫去她的上衣。
 
此時，卻停見外面有腳步聲——下一刻，棉花糖已將鎖匙插入，順利扭開。
 
他們馬上坐回原位，假裝在說些話，譬如繼續原本的話題——但他們都忘了。