結咗婚十幾年，好似已經唔太愛。《相愛十年》: 驚否（四）

 
思思心想，其實朝光也頗有心機讀書，不論出發點為何，但結局還是導向了他認真學習，也壞不透吧？外形比內裏張揚而已。
 
「咁你呢堂原本係數學，所以先唔上？」她問。
 
「唔係，」朝光轉一轉眼珠：「中文，跟住兩堂英文。」
 
「點解唔上？你唔係只係唔鍾意Miss Yeung？」
 
「哦，係佢哋唔多鍾意我——都係嘅，我都唔鍾意佢哋。」


 
朝光數理甚佳，但中文、英文、通識完全不行，他對語文科目無能為力，看不懂之乎者也前面的文言艱澀字，不同的Tenses轉換得他頭大，通識更是就算死温爛温，打開試卷那一刻已自判死刑，暗罵自己：
 
「你個腦裝屎？」
 
「我個腦裝屎，只係識計數。」他和思思說。
 
「識計數已經好勁，數學咁難，唔好妄自菲薄。」
 
思思記起，她的數學極差，阿朗在初相識時替她惡補，她在過程中與他相知相交。


 
「嗯，你唔洗講呢啲廢話啦……我就未放棄嘅，我一定會讀好佢囉，唔會衰俾佢哋睇。」
 
Miss Yeung作為班主任，與其他科的老師說他是一個無禮而不知尊師重道的人；而因他其他科的成績不佳，平時又愛作弄老師、睡覺，慢慢，其他老師都認為他是一個問題學生。
 
慢慢，他也真的認為自己是一個壞學生，頭髮過眉而不剪，哈。
 
「咁其實，平時同老師好聲好氣啲唔得咩？你同我講嘢，係幾直接，不過都叫可接受嘅。」
 
「如果對方值得我尊重，我就唔會咁；問題係，佢哋唔值，呢啲老師帶頭排擠學生，欺凌喎？其他人都學咁點算先？」


 
朝光覺得，思思值得他不温不火地認真傾訴，她全神貫注地聽他說話，不輕易質疑他的所思所想。她點頭地時候，如同以頷首來摸摸他的頭，安慰那一個無人注意的他。
 
「你都幾……有趣。」
 
她終於知道朝光像誰，十八歲的阿朗也說過同樣的話，當時，他在批評父母不負責任——
 
「佢哋離婚咪離婚，咁都揾着啲細嘅嚟搞，有咩好鬥？都痴痴哋。」
 
「又唔好咁講，你媽媽都幾為你嘅。」身為外人的思思不便附和，只好說些好話。
 
「先唔係啦，咁唔啱就要講㗎啦，冇問題喎。我喺佢哋面前都係咁講嘅。」
 
思思很欣賞這樣的阿朗，她總覺得大世界很虛偽。
 


譬如，政客在當選後會露出狼虎真面目，以語言偽術包裝敗政和個人私德問題；明星藝人總因自身利益而對本地時政問題視而不見，卻會縱情發文聲援外地發生的同樣問題；公司會以各式各樣的獎勵來引導員工勤勉工作，但說到底也只歸為上司的業績，員工最終只落得青紫黑眼圈。
 
看，哪有一點真誠。They have even fucked the systems.
 
所以，她喜歡阿朗的率性，想做什麼就去做，能取悅自己而不傷害人，有何不可？如果覺得那件事情是錯的，就直斥其非，又有何不可？
 
朝光不知他對面的姑娘仔在想什麼，她的眼神忽然沉默，靜靜地盯着他的膝蓋位置，失了焦；只不斷捽着沒有配戴任何飾物的左手無名指。
 
她留着一頭不經漂染的及肩中長髮，六四分界，直直地繞過耳畔；身穿杏色連衣及膝長裙，碎花的排列並不搶眼，很和諧地融入淡雅的色調；皮膚暖白，下顎線清晰，不胖也不骨感。眼睛圓大，眼睫毛低垂，原生眉毛濃密，鼻樑不高但鼻頭很尖，笑和抿嘴皆有酒窩浮現。
 
櫻唇似十八歲少女，長得又嬌小，穿上校服大概可自由出入校園，除了教師專用電梯。只是，眼神很靜，神色成熟，聆聽時的温婉與少女的輕浮無可比擬。
 
他覺得，她的美麗很親切，不知是否因為她相貌年輕的關係。他對她有一種好感，但男子自然對貌美女子有好感，這是平常的事，並不代表什麼。
 
「喂，姑娘仔，做咩發吽哣？」


 
她失神的時候，太像用心思考他說的話，令他感到被重視。
 
「冇，諗起啲嘢啫，唔好意思，你繼續講？」
 
朝光故繼續以口「屌」着那些薄待他的老師；未幾，又和思思分享，他頗尊敬物理科老師，雖然授課有些悶，但講解concepts十分清晰，課後又與學生打成一片。
 
「我覺得呢，做老師教書好就最重要，但如果可以令學生真心聽佢講嘢，仲要同佢哋Friend底囉。唔通只教知識咩，聽吓你講人生經都得㗎嘛，三唔識七點會肯受你教先？」
 
「咁啲老師都幾唔得閒喎。」
 
「係㗎，但總有人做到。當然教書教得好，都係幾無敵嘅。」
 
思思認真地看朝光——
 


他留着一頭過眉的斜陰，乾爽而濃密，但要經手指梳理才不似鳥巢；濃眉大眼，雙眼皮極深，閉眼看得見摺痕；鼻樑高挺、鼻翼頗寬；唇薄，色澤並非健康的紅潤，上頭有準備窜出的軟鬚。藍色的校服並不筆直，褲管位置微皺；皮帶扣得鬆，衫尾飛出來，卻乾乾淨淨。
 
其三七臉有點似阿朗，只是阿朗的鬢角沒有朝光那麼長。