結咗婚十幾年，好似已經唔太愛。《相愛十年》: 二十五歲（一）

慢慢，大家都開心起來。各有各奮鬥的感覺，但生活又並非互相割裂，而是互相靠近。
 
至少，目前，他都不想思思外出工作，知道有他以外的能人；可是，他越發討厭自己的工種。
 
阿朗再沒有自憐之感，因為大家都可以成為能人，感覺到每天一點點地進步，何須自卑？不再是原地踏步，對於二十五歲的已婚夫妻來說，已是成就。
 
二人的話題變多。懷着感歎、感恩的心說了許多工作上的事。
 
「生前吊咗好耐好耐鹽水，你估會點？」
 


「遺體腫過一般人？」
 
「係。以後我唔想咁，如果真係有咩病痛，唔醫啦，唔想住院。」
 
「吓……其實我覺得，人應該要喺最靚嗰時死去，咁其他人記憶中嘅我哋，永不腐朽。係唔係，應該就係宜家？」
 
此刻，二人氣色甚佳，面容發亮。
 
「唔好亂講，你永遠都咁靚。」
 


「知啦咩？咁你都唔好亂講，有病就要醫。唉……有學生因為咁唔開心。」
 
「親人有事？」
 
「嗯。你話，如果我哋有一日有事，棉花糖會唔會都好傷心？」
 
「一定啦，佢實喊得好傷心。所以，我哋都唔好有事，唔好諗咁多啦。」
 
「唔知再過多陣，佢會唔會好掛住我哋呢？」
 


兩個大人私自揣測自家小孩的心意，閉眼，睡得香甜。
 
每天，都是新一天。
 
正因為工作勞累，所以只有回到家才放鬆。和以前不同，阿朗不再忌諱於告訴思思：他的想法；現在，他已足夠自信整理自己的心思，也在上班時間找到目標和方向。
 
思思下班後，有時看得見母親和棉花糖，有時不，他們或到了舊時的家。而阿朗不一定比她先到家，她只看得見靜默又晦暗的家，可是，不再空洞。她不再被時鐘催逼做家務，腳踏小小的地磚，也沒有水泥發酵的零落感。
 
原來，一個人忙了起來，時間被填滿後，身心都是充盈的，沒有空閒再想什麼寂不寂寞；因為，到她脫掉鞋和胸圍，再翻找雪櫃的食物，然後想念阿朗時，就會聽見他的跫音，在鐵閘前停止，然後，打開大門。
 
- - -
 
周日，一家三口去海灘玩。
 
棉花糖拿着玩具鏟堆沙，思思在旁，替其搽兒童防曬霜；阿朗躺在墊上，聽海，偶然幫助棉花糖堆一個Sand castle——英文練習簿上的詞語。


 
思思看着這不必哀情映襯的樂景，問阿朗：
 
「你記唔記得我哋兩個對上一次去沙灘係幾時？」
 
「上年？」
 
「唔係，冇棉花糖嘅，得我哋兩個。」
 
「泰國吖嘛。之後都冇再去過睇海啦，唔計行海濱嘅話。」
 
「係。嗰時，我哋幾好。」
 
「宜家唔好咩？」
 


「好啊，好好啊……但係，我都幾掛住嗰時啫，咁後生，淨係讀書咋喎，又唔洗翻工，又唔洗凑仔，最大嘅擔心就係驚燒GPA咋嘛。」
 
「我就鍾意宜家多啲啦，大家都大個咗。係呢，我哋嗰時講好咗，十年後再去番嗰間餐廳，飲士多啤梨特飲㗎喎。」
 
所謂「嗰間餐廳」，建在當年落腳的旅館對面，老闆非常親切。那時，他們相約要再到泰國去——
 
「十年後再嚟啦！呢度啲嘢好好食，磨菇湯好濃味喎。」
 
阿朗呷着湯。
 
「吓……十年？我哋仲係咪一齊㗎？」
 
思思小聲質疑，此時，他們只在一起幾個月。
 
「當然。莫講話十年，二十年、三十年、四十年、五十年！我哋會一直一齊，到時連我哋啲仔仔女女都結埋婚、生埋細路，然後我哋就可以安安樂樂享吓清福，環遊世界！」


 
他卻聽得見，似笑非笑的答。
 
「都唔知係咪嘅，食埋啲青咖喱先啦。」
 
聽罷，她笑得極歡。
 
原來，距離當日的十八歲，已經過去七年；連女兒也快將上小學了。
 
思思轉動眼珠，數數手指：
 
「係，我哋三年之後再去啦！」
 
「咁就七年，你癢未？」
 


「未，我點同你喎，又會有Ex嚟擒我嘅。」
 
思思沒有忘記阿朗和Fiona曾經苟且，笑着揶揄。阿朗呆了一呆，而後自若地挑眉：
 
「係呀係呀，我癢啦；啱啱有蚊咬我，嚟啦老婆，你幫我𢲷吓痕。」
 
「得！等我幫埋棉花糖噴蚊怕水先。」