結咗婚十幾年，好似已經唔太愛。《相愛十年》: 來（五）

翌日晚上，峰仔到阿朗家吃飯。
 
「阿嫂。」
 
思思替峰仔開門，向他邊抿嘴，邊笑了笑。
 
「阿朗未番嚟，你坐陣先？飲唔飲嘢飲？」
 
「水就ok，唔洗招呼我啦。」
 


思思斟一杯水，遞給峰仔，二人坐在沙發上，峰仔看着思思的側面——
 
你唔好呀嗱，唔好諗住chok我知唔知C朗啲嘢，佢同Fiona有冇路呢……我真係唔知咁多。
 
「峰仔啊，嗯，想問吓你知唔知阿朗點？譬如情緒？有冇唔開心？」
 
咩叫有冇唔開心？我淨係知佢差啲同個Ex扑嘢。
 
「唔太清楚啊……番工攰啦可能。始終係體力勞動吖嘛，又少休息。」
 


「咁，我諗你都知，佢有同Fiona、啫係佢個Ex聯絡嘅？」
 
嚟料啦嚟料啦。
 
「係。」
 
「你知唔知佢哋傾咩？如果、如果係你嘅話，你覺得點解阿朗會揾佢傾，而唔係同我講？」
 
峰仔對上思思的眼，他詫異，原來她不打算向他收集阿朗的罪證，只想知道何故導致他「犯罪」；甚至，她覺得自己就是那個或直接或間接地誘導他行事的魔鬼。
 


他謹慎的答：
 
「對住老婆同對住街外人，唔太一樣啫……」
 
他也不知道，只能嘗試自圓其說，又補充：
 
「佢可能驚你擔心，驚你怪自己啫；但係對住Fiona，佢又冇責任諗佢嘅，所以，可能輕鬆啲啦……」
 
她怎麼可能是那一條面目可憎的蛇？
 
「好，明白。」
 
思思垂眸，睫毛像窗簾一樣關起。
 
阿朗回家，思思抱了抱他：


 
「峰仔嚟咗啦，你哋傾吓先啦，同棉花糖玩吓？我煮多陣就食得啦。」
 
「好。」
 
阿朗和峰仔碰拳，峰仔問：
 
「死得未？」
 
「仲生勾勾嘅。」
 
「頂，你好大浸汗味，沖個涼先啦。都唔明點解阿嫂仲肯攬你，臭崩崩咁。」
 
「佢當然肯。屌你啦，連你都嫌棄我？得，宜家去，有咩等等講。」
 


食飯，沒有什麼，就是隨便聊天近況。
 
席間，峰仔聽見思思說：
 
「唔得喎，唔準唔食菜㗎喎，冇營養就生唔高㗎啦。」
 
棉花糖扁嘴：
 
「好難咬開！我要食豬肉丸！」
 
聽罷，思思將通菜剪得更碎：
 
「乖乖，食多啖菜先食肉丸好冇？宜家易入口好多啦。」
 
阿朗幫口：


 
「係呀，棉豬知唔知？如果淨係食肉但唔食菜，你大大吓就會變豬㗎啦，越嚟越肥！越嚟越懶！你望吓峰叔叔，你都唔想變成咁啦係咪？」
 
思思笑，心想，他又胡說八道；可是，很管用。棉花糖故面色沉重地打量一下峰仔，之後轉向思思，吞下飯菜。
 
峰仔假裝委屈地叉腰；但他覺得，這個家庭氛圍很融洽：
 
「棉花糖叻喎，乖乖食飯，等間哥哥請糖你食好冇？」
 
阿朗揶揄：
 
「你仲係哥哥？」
 
「青春無敵，小弟係單身寡佬，同你唔同。」
 


峰仔覺得，阿朗完全沒有在外覓食的必要，無論什麼原因，他都不應以身犯險，放棄這樣的妻子和女兒——還想怎樣？回家，有飯、有菜、有歡愉、有笑聲，這都並不是外界野花能夠予阿朗的。至少，峰仔很羨慕這一種人氣。
 
峰仔當然理解世界之大，誘惑太多。可是，如果因新鮮而放棄，回頭並沒有更好的睡床。如果真是單純因為激情而出軌，這樣的阿朗，峰仔會隱隱瞧不起的。
 
何必強求？
 
食飯後，阿朗和峰仔聊起昨天的事。
 
「琴日Fiona話佢有啲事，喊哂口咁叫我上佢度……我見佢咁耐冇揾我，突然咁樣，應該真係好大件事，所以先上去。點知仆街，出事。佢根本冇同我講佢做咩，真係差少少就扑咗。」
 
「冇插入去，其實都衰唔哂嘅。阿嫂知唔知啊？」
 
「知錫咗，唔小心咁。」
 
「夠㗎啦，已經好多。如果俾佢知道仲有其他就玩完……對阿嫂好啲啦，我睇得出佢好愛你，講真，我覺得佢可能會覺得自己邊度有問題，先令你要咁對佢呀。以後咪衰心軟啦，保你唔到。」
 
峰仔想起，進門後，思思問他的問題。
 
「我知道。早知琴日就叫埋你上去啦……好後悔，仆街。明明冇插到但都形住自己身有屎。」
 
那並不是一次完整的性愛，感覺是零。
 
「你啱。揾埋我上去，我代你插囉，橫掂，Fiona都唔係咩好人啦。」
 
「點解咁講？」
 
「係，我今日就係諗住同你講呢樣嘢。想知你同Fiona點解會有番聯絡？同學會嗰晚，見你哋好好傾咁，佢以前咁對你，你哋都有friend做？唔係呀嘛。」
 
「嗰晚之後有傾兩句。」
 
「有咩好傾？」
 
「冇，平時啲生活咁囉。」
 
「收皮啦屌你個閪，傾生活傾到打哂茄輪？俾你傾得再deep啲咪仔都生埋？講啦，到底傾咩咁好傾？」