結咗婚十幾年，好似已經唔太愛。《相愛十年》: 紀念碑（一）

回家，阿朗打開手機。
 
「阿朗，我係Fiona，好耐冇見。」
 
「係。」
 
「下星期六，肥仔傑約咗同學聚會，會唔會嚟？」
 
原來有同學會，阿朗不知道。
 


「唔啦，佢哋冇叫我去。」
 
「緊係啦，佢叫我負責通知你嘛，宜家我咪邀請緊你囉;p。校服主題喎，摷番當年嗰件出嚟啦><」
 
Fiona、校服、同學聚會、中六甲班。
 
中學時期的回憶在手機屏幕映出，佔據了阿朗的瞳仁，他想起了無數個校園時刻。
 
原來，距離坐在中學班房聽課、食零食、睡覺流口水，已經差不多六、七年。以前，他是班中受歡迎的一群——成績唔錯、肯俾功課人哋抄、識玩吓運動、講嘢口臭搞笑但又肯幫吓人，人緣好，不論是之於老師，抑或同學。
 


他有些懷緬那段時光。
 
「老婆，我下星期六會去同學會。」
 
「哦，好，着咩衫去？我幫你燙啦，靚靚仔仔咁去吖嘛。」
 
思思本來想問——你個Ex會唔會都去？你哋係高中同班同學，佢應該會到……但中學青蔥已成前塵往事，她不想顯得自己太小氣。
 
「佢哋話校服主題喎，好癲，不過我都冇得着啦，抌咗咁耐。企企理理一件Tee就得啦。」
 


阿朗想像，如果其他人以過熟長相，穿上稚嫩校服，其違和感令他忍俊不禁。
 
思思想的則是，女同學們會否以純情學生妹之姿吸引阿朗。
 
「如果真係要飲酒，唔好太醉呀。我等埋你先瞓啦。」
 
不論如何，阿朗答覆Fiona：「好。」
 
- - - 
 
當日，阿朗到達約定地點，卡啦OK房。
 
剛剛下車後，落到地面，竟然有些緊張，暗忖自己的外型應該沒有太大變化，只是比以前黝黑和精瘦；連忙對着路邊私家車的倒後鏡，整理一下頭髮，難得用了少許髮泥。
 
他打開K房：「Hi，好耐冇見。」


 
其他同學見到他，一併歡迎：「C朗！好耐冇見。你做咩唔着校服嚟呀？」
 
阿朗是足球校隊的成員，改花名，當然要沾球星的光，他已經很久沒有聽過這個暱稱。
 
「痴線，都咁大個人啦，扮咩純情學生哥，你哋都冇着啦！」
 
阿朗心想——好彩我冇心血來潮走去買校服着過嚟，如果唔係實俾佢哋笑我柒。
 
他們熱絡地講些粗口，互相問候，所謂死黨，就是「屌來屌去」的一種情義，不能和女生解釋，她們會問，他們是否想做對方的父親。
 
房門再被打開，進來的是身穿校服的Fiona。
 
同學見到，立刻歡呼，尤其男同學，因為Fiona的校裙長度只及大腿，如果走在校園，會被禿頭的訓導主任記名。
 


「哇Fiona，冇見咁耐仲係咁靚女。」
 
「Fiona！有冇拍拖？」
 
「你個手袋好靚喎，借嚟望吓得唔得？」
 
男同學已沒有當初害羞，更願意向中學女神打趣。
 
阿朗和Fiona對上眼，微笑，沒有說話，自顧自和別人聊聊天。
 
人齊，只得幾個女生穿了校服。
 
幾個女生說：「又話校服主題，連搞手都唔着！」
 
肥仔傑不可置否：「我邊着得落呀，似你哋咩，身材冇點變過。」


 
不知在稱讚和奚落誰。
 
之後，就回憶起中學舊事，而內容，可能和三年前出來聚會時相差無幾。
 
「當年中文個Miss，堂堂都淨係識叫我哋讀課文。教呢，就喺度係咁直譯，我唔識自己查字典咩。」
 
「咪臭係，我哋自己出埋佢份糧都仲得啦。」
 
「你啊？唔多得囉。喂喂，有冇人記得大舊軒有次上堂食嘢俾人捉到正一正？」
 
「我！笑死，李sir叫佢放低隻手，佢仲死都要遮住個嘴十幾秒，打開個口，勁大浸魷魚絲味。」
 
「超，你哋好彩先冇俾阿sir捉到咋嘛，明明lunch time喺課室打邊爐大鑊好多囉！」
 


「係，仲要個個都同Miss Chan講啲味係出面傳入嚟班房。明明我哋學校咁僻，邊有人打邊爐打出咁重味，連學校都聞到喎。」
 
「其實Miss Chan一定知囉，佢廢事罰我哋啫，之前上上吓堂，有人部電話喺度響，我哋就喺度咳咳咳；佢會聽唔到電話聲咩，我哋突然咁kai……」
 
「我記得呀，大大聲喺度唱『假使我漂亮～性格縱使不吃香～如明星賣相～』部電話係阿May㗎嘛。」
 
「唔好笑我啦——咁我當時俾仔飛吖嘛，佢走寶啦！」
 
May用眼珠指一指右方的峰仔，饒有意味地揶揄他。