那一天我成為了練習男友: 【X】刁難
「早晨......嘩！邊個打到你咁傷呀。」
係阿月。
「無事呀，尋晚踩單車自己跌親啫。」我唔打算話俾佢知，費事搞到連佢都有危險。
雖然照我估計佢哋應該都唔會咁做，但都只係以防萬一啫。
始終佢應該係......算係叫做中意阿月掛，如果唔係就唔會嚟打我啦。
但其實，背後嘅黑箱作業佢根本就吾知，我都有我嘅難處架嘛大佬。
一言不合就開打，呢個仇我一定會諗辦法報。
「你估我係乳臭未乾嘅十歲細路仔咁好呃咩，一睇就知你比人打啦，邊有人會咁樣跌到塊面傷晒架。」佢用不屑嘅眼神怒睥我。
我都知嘅，係得我阿媽先會信我架姐......
「冇乜事嘅，起左少少衝突啫，吾洗咁擔心我嘅。」
「咁樣叫無事？你瘀晒喎。」
佢用手指彈一彈我塊面，令到我即時彈開咗，因為真係痛到仆街。
「我都話你有嘢架啦，仲話小事，而家隻揪我都覺得自己贏到你添呀。」
「叻喇叻喇，最叻係你。」都唔知講咩好......
呢位小姐真係好難服侍－^－
「係囉係囉，你快啲同我哋講啦，邊個打你呀？事先聲明，我係嚟食花生架咋，吾係嚟幫拖架。」阿基無啦啦係度插咀。
「講嚟都徙氣啦，又冇證據，算吧啦。無謂嘢吾好再提。」
連芷琪都過埋嚟湊熱鬧。
「呢個咁可愛嘅女朋友仔都係因為關心你先咁緊張姐，你又駛乜咁頹呀。」芷琪道。
話說佢唔講我都吾記得有件咁嘅事，而家呢一刻我已經變成咗阿月嘅男友......
「你哋先識咗一日就一齊，極懷疑希神係ptbf囉。」阿基無啦啦又加多句。
......
衰鬼，又比你估中咗一半喎，不過我梗係唔會認啦。
我捉住咗阿月隻手，說：「乜而家，一見鍾情吾得咩。」同時間，我對住阿月單咗一下眼。
「妖，放開我啦死變態佬!」佢隨即紅都面晒。
「啪！」仆街，又打面，好痛呀師傅。我靠樣搵食架大佬。
明明之前係你話可以拖下手仔嘅，而家又係度怕醜，睇怕都係未做好心理準備啦。
而係呢段時間，班房由本身嘅鴉雀無聲，變到好似街市咁，嘈到爆炸。
所以我為咗逃離現場俾自己冷靜一下，於是就扮急尿，離開咗呢個咁危險嘅地帶。
阿基都跟埋出嚟。
「你跟住我做乜吖基爺？」
「冇呀，驚你俾人打到手震尿都痾唔出，諗住幫你抖著啫。」
屌你老味又撚我，救命......
「你再嘈我就痾落你隻手度。」
「咁你究竟系咪ptbf啫？吾係連老友都唔講得呀嘛～」
「咪玩啦，我點會做呢啲嘢呀大佬......兩情相悅呢啲嘢，唔多講啦。」
「下，明明之前你哋先係班房門口隻揪完咋喎。」
我都懶得同佢解釋咁多，沉默就係對付阿基呢啲口水多過茶嘅人嘅最大武器。
好快就行到去廁所門口，同時又有三條友係入面出嚟，搞到我同阿基都入唔到去。
我本身今日就已經好攰，全程都係耷低頭望住地下行，到呢一刻先諗住抬起頭講句吾該借借。
「吾該......」
點知一向上望......
竟然係尋日無啦啦打鳩我嘅串燒三兄弟。
「借借......借你老味，行開啦，尋日打我塊面果條數都仲未同你計！」
我一手推開咗果個吾知叫咩阿忠定阿達嘅跟班。
平時都特登忍住唔講太多粗口，但一見到呢三條友，吾知點解我真係忍唔住。
滾到火都嚟。
「喂喂喂，咁惡做咩姐，起晒槓咁，大家同學嚟架嘛。」人仔若無其事咁樣講。
阿基都好疑惑：「係囉，你做咩對住人仔咁火爆呀？」果然係我兄弟，連叫法都同我一樣
「你尋日搵埋你班𡃁嚟打我仲要我當你係同學？你系咪冇腦架？」
「無證據就吾好屈得就屈喎，我係呢間學校入面出晒名仁慈友善，要我做出傷害同學嘅事係根本冇可能嘅。」人仔簡直就係口出狂言。
下？仁慈友善？搞撚笑呀？
「係囉係囉，鄧又人同學真係好好架，上次佢先為山區兒童大力捐款。」
「佢仲好為同學著想架，基本上學生有啲咩要求，佢都必定係有求必應，絕對唔會托手踭。」
大家都議論紛紛，數出好多人仔嘅豐功偉蹟。
「我肯定冇搞錯，你條友係度扮蟹！」
「系咪你有問題咋，好心你啦死窮撚唔好係度獻醜啦。」其中一個圍觀者大聲講咗呢句嘢出嚟。
點解明明我係無錯嗰個，但因為我嘅身份不及人仔，反而變咗係我錯？
呢個世界就係咁唔公平架啦，弱肉強食，窮人再努力，始終都係唔夠啲位高權重嘅人玩......
現實就係咁殘酷。
呢個雙面人，睇嚟啲演技都有返咁上下。
「快啲同鄧同學道歉啦！」
「道歉！道歉！」食花生者好似一齊大嗌。
「大家冷靜啲啦，點解唔攪清楚件事先呢。」阿基嘗試調停，但根本無人想理佢。
而家起埋訌咁，睇嚟唔講返句對唔住，我都係走唔到架喇。
但我心底裏已經決定咗唔會向惡勢力低頭！
「做咩仲唔講呀？大家都希望你比到個交代我架嘛。」
鄧又人呢個時候心諗：『今次你仲唔系阿月面前出醜？佢好快就會好崇拜我，討厭你，然後愛上我架啦哈哈哈！收皮啦你條寒酸嘅死窮撚！』
呢間咁嘅私校，完全將學生嘅價值觀扭曲晒，擺明只要有錢，就可以顛倒是非，橫行無道。
而我只係入面嘅其中一隻聽佢哋話嘅走狗。
究竟我仲可以點做?
如果依家就咁走咗去，以後肯定好麻煩。
嚴重啲嘅話有機會連書都未必有得讀。
唉，最衰冇人錄到尋日發生咗啲咩事啦，而家搞到要食死貓。
要怪就怪自己衰衝動啦，乜都未諗就屌人，搞到而家一發不可收拾。
就係我嵌入沉思嘅呢段時間之際......
忽然間，我依稀見到遠處有一個熟悉嘅苗條身影漸漸走近......