那一天我成為了練習男友: 【IX】交代

「咁當我係垃圾啦，你究竟係乜水呢？」

我一直忍住笑，但又真係太好笑吾係幾忍到，搞到我個樣好嬲打。

「同我記住，我叫做鄧又人，係鄧家大少爺。」

「係嘅人仔，咁你響完自己朵啦，依家到我問你啦，請問你有啲乜嘢貴幹呢？」

「我係嚟搵你埋單嘅！」

吾係掛，第一次見就要埋我單，我究竟又做錯咗啲乜嘢呀......

然後佢繼續道：「你根本，根本就唔配！點解偏偏允家大小姐會睇上你呢啲咁嘅窮撚？你呢啲社會敗類，明明卑微到同曱甴無分別，點解我會輸比你！」

「首先我要澄清番一點先，我哋吾係曱甴，我哋係為自己生活打算嘅鬥士，吾係個個好似你咁好彩，做到個廢柴富二代，希望你尊重番我哋。」我深一深呼吸，繼續道：「其次，你同阿月嘅分別，就係你輸嘅原因，自己好好諗下點解啦。」我冷笑了一聲，實在吾明有錢人嘅諗法。

「你講咩都無用，我係唔會就咁算。阿忠阿達，做嘢！」

「收到大佬！」一聲號令後，只見佢隔離左右閃出兩個人影。

有啲啲熟口面......

屌，原來呢三條友都喺我間學校嘅......

我記得啦，佢哋係隔離班嘅，三個好似糖黐豆咁，日日形影不離。

就好似三條柒頭自己埋堆咁咋嘛。

「我得唔到嘅嘢，你都唔可以得到！同我打！」人仔好大聲咁叫出嚟，慌死人唔知咁。

佢兩條友瞬間就衝咗上嚟，其中一個趁我未反應得切嘅時候就已經一拳鍾咗落我塊面度。

我摸一摸塊面，望一望隻手，冇乜事，少少血啫。

但好可惜，佢哋已經扯起咗我把火，就算我打輸，都唔會咁易放果條人仔走。

一打二嘅劣勢其實唔算啲乜嘢，始終身形方面係我稍勝。

現場情況非常混亂，因為大家都不斷係度拳打腳踢，互不相讓，毫不手軟。

而我嘅目標亦都好清晰，突破重圍，賞人仔一拳。

打咗不下五分鐘，終於比我搵到機會喇！

「係突破口！」我興奮地大聲嗌咗出嚟。

「你哋係度做緊乜嘢！！！」突然有唔關事嘅人大叫。

我停低咗本應該向前嘅步伐，望一望聲源發出嘅位置。

係店長？

「啪！」仆你個街，又打面咁無品架。

「今次揚咗，先行撤退！」

佢哋三個好合拍咁樣一齊閃走咗，而我畀佢臨尾打嘅個拳擊倒在地。

「希神，你有冇事呀。」店長以小跑嘅姿勢跑到我面前，場面靚到吾知可以點形容。

「未死算吾算無事哈哈。」我輕快地回答。

「你俾人打到咁傷仲有心情講笑都有嘅，系咪俾人打到傻咗呀，我扶你起身先啦，入番去之後你要同我解釋清楚成件事。」

「知道......」

我同店長傾咗好耐，主要都係交代返所有我要講嘅嘢。

包括啱啱單嘢同咩我好大機會離職呢件事。

「我大致上明白架啦，店長我都冇乜嘢好講，你只要記住一樣嘢就得啦。萬食屋永遠都係你嘅屋企，我哋會支持你做嘅所有嘢，有咩事即管同我哋講，唔駛怕醜同覺得吾好意思。」店長單了單眼。

「多謝......多謝你呀店長，一直以來都係。」我不禁落下了好耐都冇流過的男兒淚。

店長比咗一個無比溫柔嘅擁抱我，說：「傻仔嚟嘅¬」

她也落下了不捨的眼淚。

「今晚早啲返去休息啦，同埋記住消毒傷口呀。」來自店長嘅叮囑。

「知道啦長氣！」

我坐上我嘅愛車，慢慢咁踩返屋企。

「好攰，其實我今日喺咪落咗地獄一轉......」返到屋企嘅我，冇乜諗嘢，清理好傷口，沖個靚涼就衝咗上床訓覺。

一覺訓天光，連功課都冇做到，簡直就係明智之舉。

「早晨呀仔。」





我緩慢咁打開眼，見到阿媽入咗我間房。

「早晨呀媽。」

「點解你成塊面瘀哂嘅？」佢好疑惑咁望住我。

「阿......冇乜嘢呀，尋日踩單車有個小失誤啫，小事嚟嘅。」

「冇事就好啦。」Ok，佢信咗我。然後佢繼續問：「咁你尋晚去朋友屋企玩得開唔開心啊？」

「開心，梗你開心啦~」

「係咪呢個好兄弟阿基阿？」

「我有幾多個friend你知架啦，梗係佢啦！」

唔通我去個女仔屋企訓覺又話比你聽咩。

收拾好行裝，我咬住塊包，打開門，又係時候準備迎接新一日嘅校園生活。

「我出去啦。」

希望今日唔會再發生啲咩事啦，例如係無啦啦比兩條友圍毆呢啲嘢。

吾知點解今日真係覺得好攰，所以我今日選擇咗坐火車，而吾係踩單車。

又多人又迫到死，如果吾係比兩蚊，我一定係揀巴士搭。

好不容易先返到學校，個心已經開始攰啦。

「早晨呀希神，乜今日咁早到呀。」

係學校門口迎接我嘅依然係傻一，已經係每日嘅例牌。

「你見我今日冇踩單車就知啦，今日搭車呀，日日見我都吾知。」

「哦......乜係咩哈哈。」

我無再理到佢，直接行入班房算。

「早晨......嘩！邊個打到你咁傷呀。」