那一天我成為了練習男友: 【VII】風雲

「早晨呀希神先生。」

我都唔知有幾耐試過有人專程叫我起身，上一次可能已經係小學嘅時候了。

「你點解有房唔訓，要訓廳呢？」

原來係阿雪。

果然係類似女僕嘅存在，可以用咁溫柔嘅語氣去叫人起身，日日咁樣俾人叫起身其實應該都幾爽。





「早晨呀阿雪，辛苦你了。」

「你都未答我點解。」阿雪仲懵吓懵吓咁企咗係度思考。

我留低咗呢句之後就行咗去刷牙，睇嚟呢套牙刷真係有機會再用？

尋日發生嘅事，簡直係匪夷所思，完全無諗過我會成為練習男友。

我竟然會係用咁嘅形式去還債，講出嚟比人知嘅話，肯定全部都會叫我軟飯王。





但我都係為咗屋企啫，其實冇乜嘢好笑。

打份工姐。

「早晨喎希神。」阿月都已經起咗身。

「估唔到你會咁早起身喎，我以為你係會借啲意遲到果堆人添哈哈。」

「你唔好咁多嘢啦，快啲搞掂落嚟食早餐啦。」





其實好易估到啫，肯定係起身化妝，一眼就望倒有唔同。

未行到落去就已經聞到台上面傳來嘅香氣，行到過去果陣，我就嚟感動到流眼淚。

係全日早餐，重要係望落就知比起街邊嘅質素來得高好多。

日日以麵包賴以為生嘅我，竟然都有咁嘅一日。

「我唔客氣啦！」我懷著感恩嘅心情去食呢份早餐。

話咁快，唔駛20分鐘我就食完呢份幸福滿滿嘅早餐。

「希神先生，係你件校服呀。」

痴撚線，連校服都幫我洗埋，我真係覺得有啲唔好意思。





「阿......唔該你。」

我上咗尋晚本身應該要訓嘅果間房到換衫，總覺得成件事好有違和感，同我本身嘅生活非常之不搭。

換好衫後，收拾心情，準備返學喇。

「咁我哋搭咩出去呢？」淺水灣咁叉遠，唔係諗住搭的士掛。

「我出門口啦。」阿月對住阿雪講。

「希神先生，出門口個陣要講『我出門口啦』」

「我知啦......我出門口啦。」雖然有啲啲尷尬，但感覺都幾溫暖嘅。





好多時我媽仲早過我出去，跟本冇乜幾可會講呢啲嘢。

行到出去。

竟然唔係的士，而係比的士更離譜嘅存在，Uber。

講真，除咗有時痴下阿基車坐之外，我根本連的士都唔會答，因為香港的士實在係太撚貴啦。

「話說，我哋咁樣一齊返學會唔會唔係咁好呢？」

我哋學校啲人出哂名多嘢搞，容乜易我哋都會賴撻。

「今日嚴格上來講，你已經算係我（練習）男朋友，有啲乜嘢好驚呢？」佢睇落好淡定咁嘅款。

「哈哈哈，五日之後先算啦，而家試用期啫，不如我都係落車啦。」





「你而家係咪嫌棄我呀？」又係咁，招牌嘟嘴表情，真係幾可愛......

「都唔係嘅，一齊返去囉¬」

同平時踩單車返學果種感覺好唔同，成程車都非常輕鬆。

好違和好唔習慣.....

絕對唔可以習慣呢種生活，我可以百分百肯定，如果沉迷咗落去嘅話，係絕對走唔返出嚟。

我第一次感受到，原來淺水灣同沙田區，係可以咁近。

眨下眼，話都冇咁快就到咗。





一落車，就見到條麻煩友。

「喂喂，幾時變到咁friend架。」係得閒到屎忽痕嘅阿基。

「咁......咁啱撞到啫。」我勉勉強強咁擠出一個尷尬的微笑。

「乜係咁咩？」佢望一望隔離嘅阿月。

我對住佢擰頭，示意佢唔好篤我出嚟。

「佢尋晚其實嚟咗我屋企訓。」

含，含晒。

阿基最最最出名嘅，就係係ig亂咁作故仔。

我哋學校其中一個最出名嘅acc，就係出自佢手。

阿基二話不說，直接攞咗部手機出嚟影我哋。

「咔嚓！」

「你仲擺咩pose阿，就嚟全校都會知架啦。」除咗無奈，我真係唔知可以點形容呢壹刻嘅心情。

「我無所謂呀，大家都知道嘅話，你更加冇理由會拒絕我，嘿嘿。」

我心入面好大聲咁嗌咗句婊子出嚟。

當我再望返阿基喺邊嘅時候，佢已經不知所蹤，宣告玩完。

睇嚟今鋪都係要硬食，如果唔係就會由軟飯王變成渣男軟飯王。

到時候就水洗都唔清。

行返班房嘅途中，我已經感覺到好多仇視嘅眼神望住我。

「聽講呢個叫尹天月嘅女仔嚟咗一日咋喎，咁快就搵到男朋友嘅？」
「佢哋係咪本身就識得架？」
「佢哋都幾襯嘅。」

聽到好多以上嘅閒言閒語，除咗最後一句令到我有啲爽之外，其他聽到都好唔舒服。

霎時間由本身冇人識嘅小薯仔，變成全校共同討論嘅對象......

「其實大家都誤會咗，個條陳維基成日放流料大家都知咖係咪？」

「佢放嘅料，經非官方證實，有九成係真嘅。」一個女仔突然之間係隔離彈咗出嚟。

呢位係梁芷琪，我哋班嘅大姐大，同我都算係幾老友，尋日疑似因為病咗所以冇返。

「你唔好講埋呢啲風涼說話啦，係朋友就幫拖啦。」

「你咁樣，係咪真係對呢位小姐不負責任呀！？就好似當初對我咁」佢以一個哭腔講出呢啲咁惹人誤會嘅說話。

我feel到阿月係隔離滾左。

「痴撚線，我真係冇啊！冤枉啊允大人！」容乜易陣間有條閃電七連鞭車埋嚟啊⋯⋯「你好快啲同我解釋清楚啊！」

「個次，佢明明話識路，但之後因為有緊急事所以係條街到抌低左我，最後我蕩失左路，仲搞到遲到添。」

「真係⋯真係好可憐呀⋯⋯」阿月聽到就喊出來。

呢班人癲完未，有啲難頂⋯⋯

點解好似冇乜人係正常嘅⋯⋯

「希神仔～過嚟啦～」迷之聲音？

「今次又點撚樣啊！」我已經進入左狂暴狀態。

「你啱啱講粗口斷正喎，過嚟記個靚名，寫張紙仔先啦⋯⋯今次仲捉你唔到？」驀然回首，竟然見到Head Prefect 梁一！

今次大鑊，竟然衰係傻一手上⋯⋯

又硬食一個違規，學生同老師嘅焦點突然放曬係我身上，真係好唔老黎……

睇嚟呢幾日有排頂嚕......

另一方面，係暗處有一個人同佢嘅幾條𡃁，一直望住凌希神，似乎策劃緊一啲嘢。

「死窮撚，你唔配有呢啲機會，我一定會令到你顏面盡失。」