那一天我成為了練習男友: 【VI】借宿一宵
由於學生八達通負錢，阿月又冇錢比我入，我唯有……
扮智障上車。
嘟！-$2
「呼，厚面皮嘅好處，見識到未？」
阿月反左個白眼，拒絕溝通。
遇左啦，肯定會覺得好丟架，唔睬我一啲都唔出奇。
然而上左車之後都冇講啲乜，因為架車仲飄過AE86，即使有位坐，要確保自己唔會飛出去都好有挑戰性。
同曾經去淺水灣沙灘玩一樣，好耐冇坐過咁危險嘅巴士，都唔知上次去玩已經係幾時嘅事……
好似已經係中三嘅時候？
「希神，呢度好靚呀。」腦海中突然有一把聲閃過。
「到未呀，我就嚟坐到發癲啦！」阿月一個咆哮瞬間點醒咗我。
佢個樣望落都幾燥底。
肯定係搭唔慣巴士。
「就到架啦忍耐下啦。」
幾經波折，坐到就嚟嘔咁滯，終於係20分鐘之後到咗。
「鬼叫你啱啱食咁多咁滯嘅嘢咩，而家唔舒服啤住我都無用架。」
「望下有唔俾，仲企係度做乜，行啦，呢度我識路啦。」
「行咪行囉......無啦啦行咩，我仲要返屋企架，已經好夜啦。」
「今晚係度訓咩得囉，費事你咁趕啦。」
【阿月此時微微一笑，似乎有啲嘢。】《－－－希神係睇唔到呢一幕嘅。
似乎阿月想嚟個下馬威。
「下？」我好大聲下咗聲。
「下咩下，以為我同你講笑啊？」再次怒睥我。
「我同你只係識咗一日，你咁open得唔得架。」搞到好似騙案咁。
「我又唔係叫你同我一齊訓同一張床，有幾間客房，你中意揀邊間都得，唔駛同我客氣。」
「會唔會嘈住你屋企人？」
「佢哋成日都唔係屋企，唔使咁驚。」佢以好平淡嘅語氣講出呢句嘢`。
我冇多問，唯有乖乖地跟入去算。
「你終於返來啦小姐，點解你今日咁夜返嘅？」一位着住女僕裝束嘅年輕女子，係大門位置守候。佢望咗我一眼，問：「請問呢位先生係？」
「係我嘅練習男友，佢叫凌希神。」
「你好呀希神先生，我叫阿雪，係負責照顧天月小姐嘅人，請多多指教。」
佢一個微笑令我都唔知點反應好。佢對我嘅出現並未感到疑惑，果然練習男友呢單嘢係嚟真嘅......
「大家咁話啦。」
說罷，佢帶我大致參觀咗間屋，真係睇到我眼都突埋出嚟，3000呎左右，三層連天台，我真係冇諗過自己可以係啲咁豪華嘅地方訓到一晚，個廁所絕對大過我個客廳。
「我想問你知唔知點解阿月要搵咗練習男友？」我細細聲咁問佢。
「有時候，你要自己去尋找答案，先會理解到所有嘢，所以對唔住，無可奉告。」
吊，一個二個係度懶神秘，好似好撚好玩咁。
「你話點就點啦。」
「呢度就係浴室啦，請你慢慢享受。」
「唔該晒你。」
我優哉游哉咁哼著歌行入去，浴室大到阿媽都唔認得，門後有門，而家只係入到去更衣室啫。
同啲私人屋苑嘅會所浴室差唔多，只不過沖涼位係五合一咁解。
我諗住開門睇下入面係點先，只不過......
「你條變態仔！我沖緊涼架！」來自阿月憤怒的咆哮。
佢一手攞起支洗頭水就丟落我個頭到，痛到吾知點樣形容，淨係屌咗出聲。
嗰個阿雪果真吾係路嘅，擺到明陰我，有咩可能吾知自己主人係度沖涼先得架。
又或者咁講，呢都咁撚大，無理由得一個可以沖涼嘅地方，明顯係一個計謀。
「乞嗤！邊個講緊我呢，突然寒一寒。」阿雪回到工作崗位後自言自語道。
今鋪真係形象毀滅都似，竟然偷窺一個識咗得一日嘅女仔。
我一直係浴室門口靜候，諗住等佢出嚟之後解釋比佢聽。
點知一等，等咗個寂寞，足足等咗45分鐘，坐到恰下恰下咁。
「你仲係度做咩，快啲沖涼啦，聽日仲要番學嫁。」
我一聽到阿月把聲，即刻彈到千里遠，驚比佢聲巴我。
「對唔住呀啱啱我仲係唔知你係入面架，個隔音太完美喇，同埋......」我嘗試解釋以求原諒。
「得喇我明架啦，唔駛咁緊張，我大概知點解會發生啲咁嘅事。」
阿月此時心諗：『肯定係阿雪又搞錯咗啦......』
「好啦咁我就去沖涼了。」
「你睇唔到嫁可？」阿雪好細聲咁講。
「咩話？」
「你睇唔到嫁可！？」
回想返個畫面，由於熱氣朦朧，加上我係有刻意迴避視線，所以結論係睇到嘅。冇錯，係睇到嘅，只不過係上半身啫，可以形容下嘅，誒，非常有料，然後眼前隨即就閃過洗頭水嘅黑影，其他睇得唔太清楚。
「睇唔到，點會睇到！我先唔會成人之危去偷窺！」
OK，完美咁講咗個大話。
佢都無咩表示就行開咗。
完美演繹如何蒙混過關。
我終於可以爽快咁沖番個靚涼，係呢度唔駛燒熱水就有得沖熱水涼，令我又得到另一個不同的體驗。
「呼¬舒服晒¬」
我漫步到客廳，見到阿月坐咗係度。
我坐咗係佢隔離嘅梳化位，問到陣幽香嘅味道，原來女仔沖完涼就係咁嘅......
「點呀，你係到諗咁啲乜？」阿月見我呆晒坐咗係度，所以問我。佢再問：「你唔係仲諗咁啱啱沖涼單嘢掛！」
佢嘟起咗個嘴，塊面啲肉凸起晒，咁樣望落去都幾得意嘅......如果性格唔係咁嘅話。
「唔係唔係！只係好想多謝你姐，竟然可以比我享受到呢啲咁嘅生活體驗，令到我嘅人生歷練又更加豐富。」我講完啲咁嘅嘢自己都好想笑，希望佢唔會笑我啦。
「傻啦，你之後返工，仲有大把機會添呀。」
挑，講呢啲。
我哋之後都冇多講啲乜嘢，可能因為今日仲係太攰了，佢就起身行咗返房。
而我，仍然係個廳到發呆，並為嚟緊嘅日子作打算。