《那天，我遇見一個奇怪女孩》: 第六章
愛情裡面總有其中一方比較主動，不計回報地默默付出。
這種情況很難避免，要找到平衡點亦不容易，時間久了，總有一人覺得疲倦乏力。
「開始溫書未？」
「乜你覺得我係咁勤力嘅人。」智恆在課室裡翻開漫畫書，悠閑地閱讀起來。
「唔覺。」我說。
「咪係，統測呢啲濕鳩嘢，前幾日係咁易望幾眼得啦，咁早溫托咩。」智恆大條道理地說。
「佔分又唔算重，大考嗰陣再發力都未遲。」智恆接著說。
「唉，讀書真係辛苦。」
我托著下巴，一如既往地發呆。
努力學習，不太適合本人。
還是享受青春的甜蜜幸福比較好。
「仲有，與其擔心統測，不如花時間諗定學會日個攤位點搞好啦。」
「先唔講贏咗有免費機票，一陣搞得唔好又會俾Miss Fung對住我哋吱吱渣渣。」智恆繼續翻起漫畫書地說。
「係喎...仲有呢舊麻煩嘢。」
還是晚點找巧渝商量下，她那聰明伶俐的頭腦應該可以想出什麼不錯的計謀。
呀，對了，今天早會的時候，班主任派發了學校秋季旅行的通告。
地點好像是清水灣郊野公園。
「不過年年都係咁，冇咩特別。」
「咪又係燒下嘢食影下相。」
放學後，我拿出筆記開始溫習，雖然口裡說著成績是浮雲，但我倒不打算完全放棄努力。
至少每科取個合格的分數吧。
可能是太累了，溫到一半忽然睡著，再醒來已經是晚上。
「仔，食飯喇。」老媽在客廳喊道。
我悠然自在地走出房間，準備吃飯。
「夜少少我出一出去喎。」我扒著白飯說。
今晚打算接雪遙收工，其實我也不知道她今日幾點下班，平時是十點半的，但雪遙有時候會收早，所以我也是碰一碰運氣。
「有咩做？」老媽問。
「呃..搵個friend啫。」我隨口說。
「哦，咁你順便去買盒朱古力雪條。」
「嗯......」
其實老媽不太理會我的生活，知道我沒學壞就放任我自己一個。
如是者，吃完飯休息了一陣子，便出去KFC尋找雪遙。
但是到達KFC之後看不到雪遙的身影，於是我買了一杯可樂，在大堂裡坐下來等候。
過了片刻，雪遙仍未出現，我決定找收銀處的姨姨問話。
「唔該我想問細細粒長頭髮嗰個女仔喺唔喺度？」我趁人流較少的時間打聽一下。
「喔..你話呀薛遙呀？賄奸日摸返工哦。」
什麼跟什麼......
但大概聽得明白，就是雪遙今天沒上班。
「好...唔該你...」
「雪遙唔喺度都幾少有。」
「或者係知道自己返得太頻密，肯休息下。」我心裡暗自打量。
我沒再逗留，離開了KFC，回家之前不忘替老媽買了盒雪條。
校園生活雖然平淡，但也叫過得去。
跟智恆互相吹噓、與地理學會那兩位毒撚討論人生意義、間中被巧渝熱情地招呼。
最近還冒出雪遙這樣一個可愛的女生，日常之中又再增添些樂趣。
百無了賴的我，決定趁小息時去四樓晃一晃，看看雪遙在不在課室。
到達樓梯的轉角處，被一名插著褲袋、身材高大的男生輕輕碰到肩膀。
「喂睇路啦。」他眼神凌厲地說。
「唔..唔好意思。」
咦？好像在哪裡見過這人。
不管了，先去找雪遙。
我在4A班房門外探視裡頭，雪遙依舊坐在同一個位置，她正托著下巴閉目養神。
「邊一個角度望佢都係咁仙氣...」
此時，某個拿著數本教科書的男生從課室走出來，然後主動與我搭話。
「你係地理學會嗰個江梓楠？」他衣冠楚楚，一副乖學生的樣子。
「你識我？」
「大概知道你係邊個，你嚟搵雪遙？」他不客氣地問。
「喔..係呀，可唔可以幫手叫一叫佢？」
「雪遙，有人搵你。」他往我身上掃視幾眼，便回頭喊道。
雪遙聽到自己的名字後，從睡夢中醒過來，同時察覺到走廊上的我。
「呀楠！搵我有事？」雪遙連忙由座位急步走到班房門外說。
「冇咩特別事嘅，純粹嚟...睇下你。」我避開雪遙的視線，抓抓頭說。
雪遙聽罷頓時臉紅耳赤，不自然地眨了幾下眼睛，又顯得有點高興。
「係呢...早兩日唔見你返工嘅？」
「下！呀係...！我嗰日咁啱有啲事要做，所以冇報到更。」雪遙微笑道。
「哦...怪唔之得唔見你。」我說。
「呀楠...你...你專登去搵我㗎？」雪遙略為驚訝地問。
「梗係唔係...！我咁啱去食嘢啫！但唔見你返工，覺得好奇怪。」
雪遙好像不太相信，默默地看著我。
「因..因為你平時好少唔返工嘛！見你唔到咪以為你有啲咩事。」我立刻補充。
「噗，傻仔嚟，我冇事呀。」雪遙輕輕一笑，然後看著我說。
「你冇事就好啦～」
雪遙的嘴唇微微張開，有點欲言又止的感覺。
「係喇呀楠...你記得...星期三約咗我㗎可？」雪遙突然問。
「喔，記得呀，去行山呀嘛。」
不過，真的意想不到，雪遙竟有如此的愛好，跟她嬌小玲瓏的身軀完全不相稱。
「咁就好！到時電話再講啦！」
再次互相確認後，我便離開了四樓。
第一次跟女生外出，行山會否太過突兀？
我還以為是去看電影或者是去主題樂園之類的活動。
剛回到五樓，身後傳來一陣急促的腳步聲，背部突然感受到一陣溫暖。
「楠bb！！」
「點呀大姐，有咩貴幹。」
「有冇想念我呢！」
「冇，同埋唔好拎個胸壓住我。」
巧渝沒趣地鬆開我，然後噘起嘴來。
「真係冷淡嘅反應～虧我咁主動～」
「超...你條友對個個男仔都係咁㗎啦...」我輕聲地說。
「嗯？你講咩話？」巧渝一臉好奇道。
「冇嘢，呀係喇我哋幾時傾下學會日啲嘢，過埋統測就要搞，我驚唔夠時間。」
「係啵得返兩個星期...」巧渝有點擔心地說。
「一係星期三返學校傾！你得唔得閒？」
本打算爽快地答應，但忽然想起。
星期三私底下約了雪遙。
「我...有嘢做喎...或者星期四放學留低傾，我搵埋佢哋幾個。」我乾脆地說。
「好啦！就咁決定！」