高富帥轉校生睇中我？！: 多謝你
「今日放學就係一年一度嘅社際羽毛球比賽，紅藍黃綠四社嘅社員記得去學校隔離嘅xx體育館支持自己社嘅運動員喇！！！」今朝早，四個社嘅社長企喺台上面宣傳。每年12月中，我地學校都會有社際羽毛球比賽，每個社每級派3男3女同其他社鬥。
身為羽毛球隊隊員嘅我，自然會成為參賽者之一。雖然我嘅勝率都算高，不過我地紅社每年都屈居第二，次次都由藍社攞第一，今年應該都唔例外。
張欣欣喺後面搭住我膊頭講:「加油吖吳雪晴！我會去幫你打氣㗎！所以你唔好出醜，小心我笑你一年，嘻嘻~」「多謝你喎，我唯一嘅觀眾~」我輕輕咁捏住佢塊面講。我呢啲摺人，唔計社員嘅話每年都係得張欣欣特登嚟睇我，不過係好事嚟嘅，冇人關注就冇壓力，冇壓力就會有好發揮。
到左放學，我急急腳跑去體育館換衫換褲，準備比賽。社長話高中男子組比賽先，我可以抖陣再出場，所以我喺看台換左個一覧無遺嘅位坐低觀賽。
「15比0...16比0...」我左手邊嗰個場有兩個男仔激戰緊，不過唔係我地社，所以我都冇咩留意。不過聽到呢個比分嘅時候有啲錯愕，邊個咁勁喺度炒人地蛋？！我望過去，嗰個以16分遙遙領先嘅綠社男仔...係顧曉峰！雖然唔覺得特別新鮮，因為運動不嬲冇人夠佢鬥，不過暗地裏都會真心覺得佢勁。
比賽過左20分鐘，張欣欣都嚟到體育館。佢望到我喺看台即刻跑過嚟我到，一路喘氣一路講:「救命，就嚟出校門先比屙屎玲追功課，我冇miss左你嘅比賽㗎可？」我望到佢咁緊張就㩒住佢坐低講:「冇呀，就算你miss左我都唔會怪你，唔洗咁緊張喎傻妹。」點知我講完呢一句即刻聽到社長嘅呼喚:「高中女子單打要召集啦！」張欣欣同我打完氣之後，我就攞住塊拍去召集處準備比賽。
「第一局，紅社吳雪晴對綠社嘅裴文英......」裁判將個分牌反翻去0比0，拋左個波比我發球。據我所知我嘅對手唔算特別勁，所以我應該可以順利出線。我開左個波過去，佢以唔算強勁嘅力道回返比我，再猜多幾球，我就順利攞左第一分。點知打緊第二分，我向左接波嘅時候，見到顧曉峰企左喺場外面，眼定定咁望住我，我一分神，個波落左地，第二分就咁送左比人。我喺心入面不斷同自己講:「吳雪晴，提起精神，你隔離冇人望住你，顧曉峰真係睇緊自己社嘅社員！」
估唔到我對於催眠自己呢方面都有一手。諗辦法忽視顧曉峰嘅存在之後，我如有神助，連攞10分，最後以21比4出線。之後，我仲以平均13分嘅差距連續擊敗左兩個對手，終於嚟到最難搞嘅一局------對手係同我實力差唔多嘅藍社黃婉彤。前年我贏佢，舊年佢贏我，所以今次誰勝誰負真係一個未知之數。最大鑊嘅係，藍社同紅社而家同分，又得返我地兩個未打，即係我地嘅賽果將會決定藍社同紅社邊個係冠軍。看台上面打氣聲響徹全場，綠社不斷喺度嗌「黃婉彤，必勝！黃婉彤，必勝！」而紅社就幫我打氣:「吳雪晴，加油！吳雪晴，加油！」聽到呢啲打氣聲，令我嘅壓力越嚟越大，甚至令我開始想退縮......
第一球係黃婉桐彤發球。佢開左個急速嘅波過嚟，但係我緊張到冇晒狀態，第一分話咁易就冇左。之後嘅9分，黃婉彤食左個勢，對我發起猛烈嘅攻擊，好快我已經輸到10比0。張欣欣見我咁緊張，喺場外面對住我嗌:「雪晴！調整呼吸！唔洗驚㗎！」雖然欣欣把聲令我安心左少少，但係我始終好緊張，攞住個波隻手一路震，開唔到波。
「吳雪晴！！！」有把熟悉嘅男聲喺我後面嘅上層嗌出嚟。我擰轉身望上去，見到歐諾宏一個人企左喺嗰度，對住我嗌:「相信你自己，你係得㗎！」佢聲嘶力竭咁嗌完，然後望住我露出左一個燦爛而令人安心嘅笑容。
佢......一直睇緊我比賽？我驚訝咁望住佢，佢又望住我，用口形同我講左句「加油」。
其他人嘅打氣，對喺場上嘅我嚟講係一種無形嘅壓力，但係顧曉峰，佢講一句已經令我有重新振作嘅勇氣，我攞返自己嘅自信，大大力咁深呼吸，整頓好就重新發球。我搵返手感同狀態之後越打越順，最後以21比19贏左黃婉彤！！！
結果，我幫紅社攞返冇左好多年嘅冠軍，我自己亦都以女子得分最多而攞到「女子最佳球員」嘅殊榮。
頒完獎，我成個人散晒，返看台攞自己枝水飲嗰陣，先發現淨返一滴，所以喺袋到搵銀包，諗住去買嘢飲。當我喺書包入面左搵右搵嘅時候，有人遞左枝凍嘅寶礦力落我隻手，又用紙巾幫我抹汗，我以為係張欣欣，望都冇望就講:「多謝bb！」點知佢聽到之後，幫我抹緊汗嘅手停左喺度。我望過去......原來係歐諾宏！
「咁快叫我bb啦？」歐諾宏一邊笑一邊講。
「Sor…我以為......係欣欣......」我塊面好似充血咁紅，細細聲咁dup低頭同佢講。
「當係啦。」佢一路幫我開左枝寶礦力 一邊講:「你今日做得好好呀，估唔到你細細粒，打羽毛球竟然有一手。」
都係因為佢我先贏到姐。
我鼓起勇氣望住佢講:「多謝你。」
佢望住我微笑，又將隻手擺喺我個頭頂上面一路輕撫一路講:「傻妹。我走啦，聽日見！」然後轉身走左。
我個心卟卟、卟卟咁跳。或者我，已經比佢徹底熔化左啦。