高富帥轉校生睇中我？！: 因禍得福

玩完閃避球大家都肚餓啦，終是屙屎玲又發施號令:「一陣大家食左lunch先啦，我帶左8張沙灘蓆嚟，4個人一組坐一張，你地自己分啦！」



我同張欣欣攞左張蓆，睇吓邊兩個人分唔到組就比佢地join埋過嚟，點知我地鋪完張蓆，顧曉峰即刻行左過嚟坐低:「我冇frd，唔介意我join埋你地㗎可？」 我諗住叫佢去另一度嘅時候，歐諾宏又行左過嚟坐低，笑瞇瞇咁對住我講:「我都冇frd，我諗你都唔介意我join嘅。」講完又望左吓顧曉峰，露出充滿敵意嘅笑容。



見歐諾宏行左過嚟，我個心底裏有啲開心，同時亦都擔心自己對佢嘅感情會越陷越深。我都係女仔，我渴望被愛，而唔係孤獨咁愛一個人，心甘情願比人玩弄感情，我唔想自己受傷害。





就係咁，我地用左15分鐘就食完午餐。胡樂天同林展博一秒都坐唔定，跑左落去玩水，越嚟越多人比佢嘅吸引，攞住大枝細枝嘅水槍落去加入水戰。張欣欣見到佢地咁開心，蠢蠢欲動咁同我講:「喂，不如我地都落去玩！」「唔要，濕身好麻煩。」我對玩水冇興趣，加上唔識游水，所以玩水唔洗預我。點知張欣欣冇理我，直接拉住我隻手拖左我落水。林展博同胡樂天佢地見到一向唔投入團體活動嘅我加入，即刻互相打眼色，二話不說就用幾枝水槍對住我噴水，我用雙手掩住塊面，不過都搞到眼都挈唔大，全身唔洗幾秒已經濕晒。既然去到咁嘅境地，我決定盡情還擊，向住有份攻擊我嘅張欣欣同林展博佢地潑水，點知我一路跑一路追緊張欣欣嘅時候，失左平衡向前仆，兩個膝頭落地，右膝撞左落舊硬硬地尖尖地嘅石仔到，疼痛感慢慢強烈，我坐左喺淺水地區，望到自己膝頭嘅血慢慢、慢慢咁流出嚟......



當張欣欣嚇左一跳，諗住行過嚟扶我起身嘅時候，身邊有一個高大嘅身影衝左過嚟，彎低身，左手托住我對腳，右手成隻手攬住我背脊，一起身，我就變左比人公主抱。「做咩咁唔小心，真係懵丙。」





點解，又係歐諾宏？



佢抱住我同屙屎玲講:「老師，我帶佢去救護站處理傷口。」
顧曉峰、陳詩婷同楊麗雅都爭住話:「我地都去幫手！」
屙屎玲閘住左佢兩個:「歐諾宏一個搞得掂㗎啦，唔好有咁多人跟住去救護站，咁諾宏，麻煩你啦。」





歐諾宏一路抱住我，行左去附近嘅救護站，問救生員攞左啲急救用品幫我處理傷口。
「我自己嚟得啦。」我諗住喺佢手中攞走啲急救用品自己解決，但係佢捉到實一實，死都唔比我自己搞掂，一邊用清水幫我洗傷口一路講:「其實嗰日唔係你諗咁。」



啊哈，佢講緊陳詩婷攬住佢嗰日。



「其實你唔洗同我解釋。」我親眼見到嘅畫面，點會有錯。



「我要。」歐諾宏望住我對眼講。「嗰日陳詩婷同我表白。」





表白？！我聽到呢兩個字shocked左，即刻望住佢呆左。



「佢同我講佢中意我，但係我拒絕左佢，因為我有中意嘅人。」我半信半疑咁望住佢，佢又講:「係真㗎，唔呃你。不過佢好似仲未死心，一直喺度纏住我。」我問:「真係？」「珍珠都冇咁真，我發誓。」佢同我講嗰陣個樣好誠懇，唔似講大話。係咁嘅話，即係我一直以嚟都誤會左佢？



咁佢中意嗰個人係......？



「唔好問我中意邊個吖，嗰個人冇理由唔知。」





我塊面慢慢開始發熱，變到好似蘋果咁紅扑扑。



處理完傷口返到去，都差唔多要回程啦。我開心咁翹住張欣欣，哼住張敬軒首「騷靈情歌」，跟住大隊搭船返去。



希望嗰個人，真係我。