高富帥轉校生睇中我？！: 絕對唔係心動

「原來係咁～係緣份呀哈利～」張欣欣對住我奸笑。「孽緣咋掛。」求其應付左佢，我就繼續食頹撈。食到七七八八，我就攞起個餐盤去垃圾站倒廚餘。行吓行吓，我突然feel到腳底一跣，仆街，踩蕉皮！失去重心嘅我，成個人慢慢向後跌，手上面嘅餐盤亦慢慢脫離我隻手...



就喺呢個時候，我feel到一隻強而有力嘅手穩穩咁托住左我嘅背脊，而佢另一隻手不慌不忙咁捉住左跌落中嘅餐盤。我慢慢將視線移去佢塊臉...歐諾宏？！佢用圓碌碌嘅大眼望住我對眼，嘴角泛起奸奸哋嘅笑容，又用少少蠱惑兼少少溫柔嘅語氣同我講:「做咩，心動呀？」我根本反應唔切，淨係識擘大個嘴，呆呆哋咁望住佢。



「咳咳...」直到陳詩婷特登製造出嚟嘅咳聲響起，我先回過神，即刻企返好個人。「唔...唔該。」我dup低頭對歐諾宏講。佢彎低身，望住我對眼，細細聲咁講:「下次小心啲啦，懵丙。」我已經唔敢直視佢，急急腳衝去女廁。








去到女廁，我見到自己塊臉紅晒。唔得㗎吳雪晴，唔可以對呢啲人動心。同異性咁近距離接觸，呢啲係人嘅自然反應，我絕對唔係心動！！！



整頓好自己，我就返返班房溫書。望到張欣欣坐左喺位度，我先醒起頭先怕羞到瀨低左佢。
「比人英雄救美嘅感覺係點㗎？我都好想試吓啵！hehehe~」果然係好姊妹，咩都抽餐水。「溫書啦。」唔理佢佢就會自己收聲。







捱左三堂，終於放學。當我執緊書包準備走人，後面嘅歐諾宏揹住書包經過我身邊，同我講:「拜拜啦懵丙，聽日見。」又向我單左單眼。「拜拜。」我好自然咁答佢。奇怪，我對佢嘅戒備心好似低左少少。



返到屋企，我即刻攤喺梳化，攞起部手機喺度loop。打開WhatsApp，見到陳詩婷喺"456A"群組添加左一位新嘅群組成員。我㩒入去嗰個號碼睇佢個profile，見到佢個icon係一個男仔望住大海嘅背影，應該就係歐諾宏。再Loop落去，見到佢嘅狀態寫住"Found you."
佢搵到邊個？不過算啦，都唔關我事。







今日真係好攰，我食完飯，做完功課，就攤左喺床瞓着左，聽日仲要有pe，我又會虛脫㗎啦。



第二日當我入到班房，就見到歐諾宏同順風耳林展博、千里眼胡樂天好開心咁喺度傾計。如佢地個名一樣，學校有咩八掛佢地都會係第一個知，又成日嗶哩巴啦，講嘢講唔停。估唔到歐諾宏識frd嘅速度比我想像中快，而見到佢着藍色pe衫，我就知佢係藍社。



上左堂英文，個個攞水樽攞短褲落去上pe。我地去到操場集合，體育老師腹肌強就吹左聲雞講:「今日自由活動，可以揀打籃球或者打羽毛球，自己去體育室攞用品啦。」佢一講完，班男仔就即刻衝去攞籃球，包括歐諾宏。羽毛球係我最擅長嘅運動，所以我同張欣欣手撓手去攞球拍同波，但係除左我地，其他女仔郁都唔郁，個個隻眼發晒光咁企左喺原地。



啊，係喎，男神第一次大顯身手，班迷妹點會錯過。