那一天，有女仔嚟咗男校讀書: 第十七章:渣男(第二節)

自從開學嗰日個渣男嚟接小倩之後，小倩每次同我一齊出街都心不在焉咁，我問佢乜事，佢又話冇事，不過九成九都係諗緊個渣男會唔會再嚟煩佢。
我真係有啲唔開心，明明係我同小倩拍緊拖，但係小倩唔係專心陪住我，反而去諗一個傷害得佢咁深嘅渣男，我真係冇乜心情。
有一日，我當面同小倩講出我嘅不滿，但係小倩鬧返我，話我冇幫過佢，冇諗過佢嘅感受，冇安慰過佢。面對住呢一個情況，我講唔出嘢，唯有不斷安慰小倩，等佢冇咁燥，先再同佢慢慢解釋。
過咗一陣，小倩話想去附近公園坐下，我哋去到商場附近嘅小公園搵咗張櫈坐低。
「其實，我只係想同你拍拖嘅時候開開心心...」我坦白同小倩講
「我明，但係我真係好擔心個渣男再嚟騷擾我。所以先專心唔到拍拖」
「咁不如我哋去同個渣男講清楚?」
「但係佢一定會死纏住我哋。」
「咁...要點樣令佢死心?」
「你喺佢面前宣示主權囉!」




「我唔係好明喎?」
「乜你咁都get唔到㗎」小倩搣咗我塊面一下:「即係你喺佢面前錫我一啖，令佢知道我哋係真心相愛囉」
「原來係咁...咁我哋宜家即刻開始行動?」
「好。」
小倩打電話俾個渣男，個渣男好開心咁接電話，聽到小倩話約出嚟，佢更加雀躍，仲話衫都唔換，要即刻出發。
當我同小倩去到約定嘅地點，個渣男已經到咗，但係佢一見到我攬住小倩條腰，開始覺得不爽。
「呢個係我男朋友，銘仔。」小倩向渣男介紹我
「你好!」我用一個有啲尷尬嘅笑容同渣男打招呼
「咁倩倩你今日約我出嚟做咩?」渣男直接無視我
「我想叫我死心，唔好再煩我，我已經有個好錫我嘅男朋友，唔需要你!」




小倩講完之後向我打眼色，示意我錫佢一啖，我立即錫咗小倩塊面一啖，個渣男亦顯得傷心同憤怒，之後更直接跑走咗。我同小倩會心微笑，我哋嘅計畫應該成功咗。

(待續...)