那一天，有女仔嚟咗男校讀書: 第十七章:渣男(第一節)

呢個暑假過得好充實，我不時同小倩約出嚟玩下。
好快就嚟到九月一日，換言之，我已經係一個中四嘅學生，亦都踏入高中嘅階段。我琴晚提早返房瞓覺，以免第一日返學就恰眼瞓。我竟然係第一個返到課室，今年我唔係同中子同一班，即係話我又要同一班唔識嘅毒男打交道。
第一日返學係返半晝，我諗住今日去接小倩放學，一齊行返屋企。
去到xx女書院，我見仲未放學，就坐喺附近嘅長櫈等。過咗一陣，有一個男仔行過嚟坐喺我側邊，我當時只係覺得佢都俘係嚟接放學嘅暖男男朋友。
去到下晝一點，放學鐘聲響起，我再等咗一陣就見到小倩慢慢行出嚟。
「小倩!」「倩倩!」我同隔離個男仔同時嗌出小倩個名
我望咗個男仔一眼，就立即跑到小倩身邊，但係個男仔隨即跑過嚟。
「倩倩，可唔可以俾多次機會我?」個男仔無緣無故問小倩
「等陣先，你做乜?」我阻止佢
「銘仔，你走一走開先，呢樣嘢係我同佢嘅私事。」小倩用冷漠嘅語氣同我講。




我被小倩嘅反應嚇親，佢冇試過用咁嘅語氣同我講嘢，就算平時佢同陌生人講嘢都超級有禮貌，究竟嗰個男仔同小倩係咩關係?
我行去遠處，我見小倩好嬲，不斷鬧個男仔，因為佢哋正正企喺學校門口，所以引嚟不少好奇嘅目光。
過咗一陣，個男仔垂頭喪氣咁走咗。
「sorry，頭先冇乜禮貌。」
「唔緊要，但係究竟發生咩事?」
「之前我咪同你講話有個渣男，咪就係佢囉!我已經趕走咗佢，唔使擔心。」
「唔怪得知你咁嬲啦!」
「我哋走啦。」
小倩喺班女學生面前翹住我隻手，再次引起其他人嘅目光。





(待續...)