那一天，有女仔嚟咗男校讀書: 第十四章:危機(第二節)

今日小倩出咗post澄清成件事，之後就開始喺學校欺凌我，每日我唯一可以同小倩真正做一對倩侶嘅時間就係夜晚同佢煲電話粥。我真係驚我哋會有精神分裂(唔係講笑)，朝早就係欺凌同被欺凌嘅關係，但係夜晚就係男女朋友嘅關係。
我同中子亦因為呢一張相而冷戰咗好長一段時間，我真係因為呢一張相而幾乎失去咗我生命嘅全部。
呢段日子真係好痛苦，每日都喊，每日都問自己究竟點解自己嘅愛情會因為其他人嘅行為而變成咁?究竟點解一張相嘅影響會咁大?
呢段地獄般的日子足足持續咗幾個月，直至暑假嘅開始，呢段日子先至告一段落。但係暑假嘅開始亦代表小倩即將返去xx女書院讀書，所以，我同佢嘅見面時間將會大大減少...
今日係我同小倩終於可以約會嘅日子，呢幾個月我哋都冇約出嚟，以免件事再次發酵，難得件事暫時平息，我同小倩當然立即約出嚟，難得可以手拖手行街，我當然拖到實一實，因為我都唔知仲有冇下次。
我哋冇去高級餐廳食飯，只係去咗一間茶餐廳食，只要小倩陪住我，我食乜都咁好味。
「擘大口，我喂你丫。」小倩講
我擘大口，小倩將西多士放入我口中。本身已經甜嘅西多士變得更加甜，小倩見到我嘅食相，不禁笑咗出嚟。
「你食嘢嘅時候真係好搞笑。」小倩取笑我
但係呢個取笑同平時欺凌我時嘅取笑真係好唔同。




我攬住小倩。
「我呢段時間真係好痛苦。」我竟然喊咗出嚟。
「我都係，竟然要欺凌我愛嘅人，真係好辛苦。」小倩都喊咗出嚟。
我諗，我哋同是天涯淪落人。

(待續...)