那一天，有女仔嚟咗男校讀書: 第十四章:危機(第一節)

中子講完來龍去脈之後，我同佢一齊行返去運動場，中途我唔敢有太大動作，以免佢發現我同小倩有嘢。不過我驚同先我質問中子嘅時候佢已經開始懷疑我，我真係唔想同中子絕交。
返到運動場之後，我行返上看台，中子一陣要比賽，所以看台附近剩返我同小倩。
「原來你同中子係青梅竹馬嚟?」我問小倩
「係呀，不過你會唔會嬲㗎?」
「唔會，有咩好嬲啫。」
「我男朋友真係體貼。」小倩搣一搣我塊面。
轉瞬間，陸運會已經完結，難得嚟到灣仔，我諗住同小倩行下街先返去，所以冇即刻搭車返屋企。
我同小倩喺商場行咗一陣，我陪佢買咗啲衫，之後食咗少少嘢就返咗去。
但係，我哋都唔知道，危機，即將來臨。
第二日陸運會翌日，唔使返學，但係我同小倩冇約出嚟，反而好似啲Long D情侶咁，各自喺屋企開視像通話，然後各自做自己嘢 。正當我同小倩盡興咁傾緊計嘅時候，我喺ig見到一張相，呢張相立即引起我注意，因為相中嘅兩人正係我同小倩，當時我哋喺度手拖手行緊街。張相下面仲寫住:毒男都溝到女神???呢個世界仲有冇天理?




我即刻拎張相俾小倩睇，佢都嚇咗一跳，究竟張相係幾時影同邊個影?但當我見到張相嘅like數，我就知今次大獲，張相竟然有1000幾人like，仲未計淨係睇唔like嗰班人。
今次真係大檸樂，俾學校班毒男知道一定會打死我，今次點算?
唯有小倩出嚟澄清加埋我實行苦肉計先算平息到，我哋嘅計劃係首先小倩出一個post去澄清成件事只係誤會，之後返學小倩會時不時欺凌我，令人覺得我同小倩真係冇嘢。我要付出嘅代價都幾大，但係為咗呢段愛情，我願意付出所有。
唔通，呢一場愛情注定係一場苦戀?
(待續...)