那一天，有女仔嚟咗男校讀書: 第一章:相遇(第一節)

「起身啦，衰仔，7點9啦!」
「嘩!咁晏先叫我㗎。」
我飛身跳落床再用九秒九跑去廁所然之後攞起支牙刷再一路刷牙一路「放水」然後狗衝返房再攞出件校服然後一隻手換褲一隻手換衫，再攞埋個書包。搞掂!成個過程唔使分半鐘，我已經由一個啱啱起身嘅毒男銳變成一個可以出門口返學嘅毒男啦!
呀！我唔記得咗自我介紹添，我係一個毒男，我叫黃浩銘，個個都叫我「鉻仔」，我唔知自己小六揀中學嘅時候發乜神經，係都要揀入一間男校，嗰時以為男校同男女校冇乜分別啫。唉!而家後悔啦，日日對住班宅男同基佬，真係唔宅都變宅，唔基都變基(本人絕無歧視唔同性傾向人士)。唉!功課又多，壓力又大，又無女溝，睇嚟我個中學生涯都冇乜精彩嘢㗎啦。
「衰仔，記住睇車呀!」
「知啦!」

(待續...)