無錯，其實呢個係一個追女仔的故事: 8. 運動健將

唔跑過都唔知, 原來技術系既打機高手, 完全係魔法師既體能。
即係無體能。
 
食完兩塊包, 精神上真係好咗, 不過體力上仍然係等於無訓過。
毒男不得不承認, 自己真係無訓過。
點跑？？
好在而家先散步當消化。
不過毒男既步伐, 完全係睡眠狀態......
 
「子仁, 係咪唔慣咁早？不如今日算啦？」樂兒似乎擔心毒男會頂唔順。




「唔會, 散多陣步就ok。」機會難得, 毒男當然頂硬上。
事關如果今日開好個頭, 就可以成日約跑步。
但如果cancel咗, 就好難再約下次。
有咩方法跑得郁？
如果個身輕D就好。
有風吹黎, 飄吓飄吓仲好。
突然, 記憶之神又出現了。
毒男係魔法師。
 
風系魔法係試過既, 上次阿姨拉住手黎試, 基本上分寸都掌握到。




雖然上次最尾係跌落後卷垃圾堆。
今次由最輕力開始, 慢慢加, 應該OK。
「今日天氣咁好, 你當陪吓我, 慢慢跑啦, 好唔好？我跑唔夠你快架！」毒男挺起胸膛, 仲有少少風襯托下。
「咁慢慢黎啦, 唔得要出聲呀！」樂兒仲係好擔心。
毒男決定唔會俾女神後悔今日約出黎跑步。
「差唔多喇, 開始跑嗱。」
加少少風魔法, 又真係跑得幾輕鬆喎。
點解以前阿媽唔教我呢？唔拎學界冠軍, 都拎個校內銅牌丫。
「估唔到跑到喎。」樂兒既笑臉係最靚既。
毒男心諗, 如果再加DD呢會點呢？




「樂兒, 你跑開唔係咁慢可？」
「你得唔得先？」樂兒好似放心咗, 開始加速。
「終於有D跑緊既感覺。」毒男開始控制到逐D加大風力。
點知, 樂兒係去跑上山。
 
毒男發現平路都還好, 山路其實好難調節。
因為上山既斜率唔係一直相同。
毒男而家係飄幾步, 隻腳扮跑緊, 其實係無掂地。
又有幾次突然斜咗, 隻腳輕微屈親。
慢慢毒男已經唔係跑步, 而家係樂兒稍微斜後少少既位置, 飄吓飄吓咁飄上山。
好在呢個鐘數無人上山, 而落山既行山客又無發現。
如果俾其他人知道, 會唔會以為樂兒俾鬼跟？
跑到涼亭, 樂兒終於停低。
「子仁, 你都幾好體能喎, 做開運動？」
毒男唔通會講真話？唔會啦：「後生都有打波, 入U之後都無喇。可能個底好啦。」




樂兒擰轉頭, 係晨光底下, 望住黃大仙方向。
「我最鍾意日出時黎呢度, 望落山下面。」
毒男見個涼亭寫住「獅子精神」, 就問：「呢個就係獅子亭？」
「你未黎過？」樂兒好好奇毒男都有行山。
「無架, 只係聽過。我都無諗過自己會上到黎。」的確, 無魔法的毒男係上唔到黎。
「咁你咪係, 第一次？」樂兒偷笑住咁講。
毒男心諗：「第一次俾你, 我願意。」點知忍唔住口講咗出黎。
「呢度以前有山水豆腐花食, 我第一次上黎時食過, 係特別好食架。不過而家俾政府咗牌無做喇。」
毒男見個氣氛好似向傷感發展, 唔符合預期, 就話：「咁不如等陣去7仔食返盒豆腐花, 當慶祝我上到黎啦！」
「都好。你請。」樂兒笑住指吓我。
晨光, 女神, 笑容，係毒男呢世最美好既回憶之一。
百科全書又增加咗一頁。