無錯，其實呢個係一個追女仔的故事: 7. 見伯母

星期日, 係毒男同樂兒約好去跑步既第一日。
毒男完全無諗過, 原來約跑步, 同話個地址俾人知差唔多。
因為, 樂兒係約係佢屋企樓下等。
住係黃大仙十幾年, 一直都唔知原來法藏寺隔離有條邨。
對於一個十年唔上一次慈中既山腳人黎講, 呢度絕對係新大陸。
尤其是朝早五點。
毒男應承得口輕輕, 原來對於一個9點半打完公會戰之後仲要練多5個鐘先訓覺既人黎講, 「早D訓」並唔係口號, 而係願望。
毒男由10點訓係張床碌到2點都訓唔著, 起身飲水仲要俾阿姨恥笑：「跑步丫呀！咁浪漫！」
結果係無訓過, 因為去到凌晨3點幾, 真係怕會一訓就到下午。
結果俾公會約翰、瑪麗同凌天一笑幾條友笑足成粒鐘。




到夠鐘出門口時, 班友就話要訓。
毒男暗下決心, 聽日課金兩千, 買武器殺哂呢班人。
 
出咗門口先發現第二個難關：無小巴。
37M要等到5點先開, 毒男同樂兒約5點跑步。
即係話, 毒男要行上山。
以一個無訓過既軀體, 行上慈雲山？
會唔會入廠架？
呢個時間, 阿姨Send咗句app黎：「搭的士啦, 三十蚊有找。」
阿姨, 鍚哂你！




阿姨又Send一句黎：「你仲有2個鐘要跑呀, 留返D力啦！」
毒男心諗：「Shit！」
 
凌晨5點的警署門口, 特別恐怖, 尤其是有差佬行過, 毒男忍唔住要摸一摸自己有無帶銀包身份證。
差佬消失, 女神出現。
「好準時喎！我仲怕你唔知醒添？」樂兒一身粉紅色短運動衫褲, 加一對深藍色波鞋, 白襪仔。
「你怕我訓過龍, 可以morning call我架。」
樂兒望多望毒男個樣, 圍住毒男轉一個圈, 之後用左手食指篤住左邊面, 話：「你係咪未食早餐？」
毒男心諗自己生活中, 係無早餐呢樣嘢, 就話：「你又知？」
「唔食早餐跑步好危險架, 會暈架。你跟我黎啦！」樂兒拉住毒男件衫袖就行。




原來樂兒係帶毒男返自己屋企食早餐。
 
「怕唔怕嘈住屋企人？」毒男好似有D避忌。
「食塊包有幾嘈？你唔好問長問短就得喇。」樂兒又好似無乜嘢。
「我似唔似？」
樂兒用手指放嘴前, 做個安靜手勢俾毒男, 之後打開屋企大門。
入到屋, 屋入面無開燈, 不過窗邊有個人。
「阿媽, 咁早起身？」樂兒見到就問。
「飲杯水就去晨運。而？有朋友？」
毒男見講起佢, 就答：「伯母你好。」
「係呀, 約咗去跑步, 佢竟然唔食嘢就出黎。」
「唔食嘢唔得喎, 我整D嘢俾你地食！」伯母好熱情。
「唔使啦, 佢食少少先啫, 晏D我再同佢食早餐啦。你係咪去晨運呀？」
「係呀, 我唔慣空肚食早餐架, 食少少就得架啦。」
「咁好啦, 我換衫喇。」伯母就入返房。




「嗱, 無嘢食架, 得花生醬方包。」
「你今朝都係食呢D？」
「唔啦, 花生醬咁肥。」果然係怕肥。
樂兒搽好一塊方包, 疊上第二塊, 切開成三角形, 然後遞俾毒男。
「食完仲要休息15分鐘先可以跑步。」
「你諗住揹咁大個袋去跑步？」樂兒望住毒男個袋, 搖搖頭。
「我都奇怪點解你可以咁輕便。」毒男一邊咬住塊三角形方包, 一邊講。
「你放低, 跑完先上黎拎。有無帶水？」樂兒一邊問一邊拎枝樽裝水出黎。
毒男終於發現, 毒男同正常人原來真係有認知上既差異......
 
伯母換完衫出黎, 毒男都食完包。
「食完嗱？一齊行啦！」伯母好熱情咁開門。
「啱喇, 行下當休息啦！」樂兒就推住毒男, 一齊出門口。
「書友呀？」伯母好似對毒男好好奇。
「補習社同事呀。即係平時教我英文果個呀, 我當佢係老師架。」樂兒一邊等lift一邊做熱身一邊答。




「咁你幾大呀？講咩書呀？」伯母繼續問。
「唔係呀媽, 唔係男朋友呀, 唔好嚇親人啦！跑步咋。」樂兒開始有D尷尬Feel。
「唔好意思, 我阿媽成日怕我嫁唔出。」樂兒真係好尷尬。
「哦, 係呀......」毒男唔係好知點應對, 其實心入面又好想話係男朋友。
Lift到, 入Lift, Dead air。
出Lift, 樂兒推咗伯母去晨運, 拉住毒男去另一邊出口。