《樓上裝修咗成個暑假》: 十二

自從小蔚住進清河邨，我的生活，原來在不知不覺間，改變了很多。

由以往獨個兒上學，變成每天上下課都有人陪伴著；由以往在課室安靜的我，變成與別人打打鬧鬧的招仔。

很奇怪，是不是上天見我有點可憐，才故意安排一個女孩到我身邊。

不過無論如何，她的降臨，已經深深烙印在我的心內。

「陸運會完咗之後，原來返多幾日學就Study Leave。」我翻起日曆。





距離公開試不遠了。

「真係唔想時間過得咁快。」

「以前，中學真正嘅朋友，最多得逸哥一個，甚至連寶珊都冇咩點講過嘢。」

「但係，上年小蔚出現咗喺我人生裡面，令我經歷咗好多未從未試過嘅事。」

「而家先發現，原來呢啲就係人哋口中成日講嘅青春。」





回憶起與小蔚的一點一滴，心中不禁泛起莫名的傷感。

原來，很快就要離開校園。

今天是陸運會後的假期，所以不用上學，我、逸哥、寶珊和小蔚去了大埔中心，算是臨衝刺前的放鬆吧！

我們先在冒險樂園擲彩虹和影貼紙相，之後在Pizza Hut吃了下午茶，接著又在超級城閒逛起來。

「估唔到你哋陸運會都幾好玩。」小蔚打開話題說。





「係呀，雖然唔係啲咩名校，又冇水運會又冇嗰啲乜社物社，但勝在人與人之間夠Close。」逸哥點點頭說。

「你同你啲女Fans最Close啦。」我白了逸哥一眼道。

「同你哋一齊真係開心！」寶珊笑道。

是挺開心的。

「嗯...招仔？做咩咁嘅樣。」小蔚見我有些古怪，便問。

「喔..冇，諗緊嘢。」

「喂我同寶珊入Uniqlo睇衫，你哋慢慢。」說罷逸哥便拉走了寶珊，剩下我和小蔚。

不得不承認逸哥對於每件事都觀察入微，現在又故意製造空間給我和小蔚。





「諗咩呀你。」小蔚說。

「冇嘅，純粹...有啲唔捨得中學。」以往都沒有這種感覺。

「嗯...其實我都係。」

「你都係？」我別過臉看著小蔚，發現她好像在想些什麼。

「唔捨得以前間學校？」我問。

「又唔係喎，反而...唔捨得呢度。」小蔚把雙手垂在背後。

小蔚只是轉過來不足半年，原來已經對這裡產生了深厚的感情。





「都係嘅，呢度人情味都幾重，無論係學校。」

「定係上水呢個地方。」我低下頭說。

「.......小蔚？」

當我抬起頭，發現小蔚走到一家飾物店前，打量著玻璃櫃內的東西。

「睇緊咩？」

「靚唔靚？」小蔚指住其中一款頸鏈問。

「靚呀，應該幾襯你。」

小蔚愣了愣，忽然臉紅起來。





「無..無啦啦講呢啲嘢...」

突然間，我想起某些事情。

「呀，係喎...差啲唔記得...」

「嗯？」小蔚一臉茫然。

「喔...無咩嘅....」

小蔚點點頭，便沉默起來，我們站在Uniqlo門外，等候逸哥他們。

數分鐘後，他們便回來了。





「你哋睇吓！我同呀逸買咗好多衫呀！」此時，寶珊和逸哥正拿著一袋二袋的衣服。

「女人嘅購物慾實在不能夠低估。」逸哥沒好氣地笑道。

「又差唔多夠鐘食晚飯，我哋食壽司好冇？」寶珊說。

「我就唔食喇～老豆話有急事叫我早啲返去，你哋三個慢慢～」逸哥搖搖頭說。

「下...咁呀，招仔你哋呢？」

我望向小蔚，待她示意。

「咁一係而家返去？都出咗嚟好耐。」小蔚看看電話的時間。

「我冇所謂。」我聳肩道。

「嗚...咁好啦！大家都要開始繼續溫書，準備好DSE！」寶珊噘起嘴說。

「嗯！」

















這陣子，學校附近都開滿粉紅色的花，就像在告訴我們，畢業季節要來臨了。

以往的Last day，都不乏看到同一個場景，就是無論在操場上、還是走廊裡，中六生都會相擁在一起，互相勉勵。

有些女生更是哭得很誇張。

今天，終於到我了！

Last day跟往常一樣，都是照舊上課，小息、午膳，同學們還是會在課室高談闊論，還是會互相捉弄。

不過，總感覺學校的氛圍。

多了一份傷感。

上課時，同學們都顯得沉默。

或許，是想靜靜細味這種寧靜吧。

「嗚呀！！！哇呀！！！我唔想畢業呀！！！我想繼續溝女呀！！！」霆爺發瘋地喊道。

「......」

時光總不能倒退，此刻的我們，就好好珍惜尚有的時間吧。

午息時，眾人紛紛互相在彼此的校服上寫下祝福的字句。

「靚仔真係好，我真係搵唔到位寫俾你。」我看著逸哥的短袖襯衣說。

「冇計，啲低Form捉住我嚟寫，呵呵。」



於是，我簡短地寫了一句。

「感激有你呢個兄弟 招仔上」

「係咪寫完，寫完就到我喇。」這次換逸哥在我的襯衣上寫字。

好癢。

「點解要寫喺我粒Lin度...」

「表達我對你嘅愛意。」

「你寫咗咩...」我抓起胸附近的口袋。




「我愛你唷 逸」

「屌，可唔可以唔好咁基。」

「唔想寫啲老套嘢嘛。」逸哥笑道。

我望向課室的另一端，小蔚正和幾名女生互相塗鴉校裙。

這個畫面，讓我不自覺地微笑起來。

片刻後，小蔚回來並將粉紅色的螢光筆遞給我。

「到你寫喇。」

我看著小蔚那五顏六色、滿是文字的校裙，不知道應該寫在哪裡。

此時，小蔚轉身，把背部面向我。

「留咗個背脊俾你寫。」

「點解係背脊？」我一邊寫下祝福的字句，一邊問。

「孭咗書包之後唔洗俾人見到。」

「..........」

「講笑，因為我想返到屋企先睇你寫啲咩嘢。」小蔚說。

下午的課堂，基本上大家都在拿著相機拍照留念，老師也沒管太多。

三點十五分，鐘聲響起，也是我人生裡頭，最後一次聽到下課鐘聲。

大概，我會很想念，這個聽了十多年的鐘聲。

「喂喂喂，校長請食雪糕呀，大家快啲落去啦！」寶珊喊道。

此時此刻，所有中六生都走到操場，在那輛雪糕車前排隊。

「估唔到校長竟然班到架雪糕車返嚟...好癲...」我略帶驚訝地說。

「我都有啲嚇咗嚇，哈哈。」逸哥說。

「小蔚...我哋都去...小蔚....？」

小蔚呆若木雞地注視著那輛雪糕車，聽不到我的說話。

「喂..小蔚！我哋都去排隊拎雪糕好冇。」我輕拍小蔚。

「呀嗯！好呀。」她才反應過來。

眾人拿著甜筒，在操場上哈哈大笑，不同的團體又合照起來，有些男生甚至主動找部分低年級的女生，詢問她們能否一起拍照。

於是乎，大家都留在學校，直到傍晚五六點鐘，才願離去。

踏出校門的那刻，我深深呼了一口氣。

「終於都完。」

「係時候，」

「迎接人生另一個階段。」