《樓上裝修咗成個暑假》: 十

進入啦啦隊比賽的環節，回想起去年自己的表現，真的不堪入目。

打死我也不再重看那段影片。

「真係青春。」小蔚托著頭，慨嘆地說。

「哦？你以前學校冇咩？」我問。

一男一女互相配合的動作、團體的舞蹈、整齊的制服，加上激昂的音樂，現場氣氛十分熱鬧。





的確很青春、很熱血。

「有係有嘅。」

「不過...」

「不過？」我別過臉看著小蔚。

「冇嘢冇嘢～繼續睇。」小蔚搖頭說。





「喔...」

就這樣，首日陸運會順利完成。

我和小蔚也乘坐巴士回家，但不知道為什麼，離開時，小蔚有點悶悶不樂。

或者女生是比較情緒化？

我也沒多問。





「聽日四乘一同埋一百米決賽要加油。」分別時我跟小蔚說。

「得啦！洗你講！」

黃昏的景色，原來也挺漂亮。

太陽下山，隨之而來的，當然是黑夜。

不過，黑暗過後，又是晨曦。

人生就是這樣。

翌日，陸運會的第二天。

「早晨呀小蔚。」





「喔早晨。」小蔚看起來精神一般。

「對眼咁腫嘅，琴晚好夜瞓？」

「嗯？」



眾所週知，陸運會的第二日多數是決賽和短跑這些刺激的賽事。

當然包括小蔚的一百米決賽和班際四乘一百米接力賽。

待會一定要全神貫注地替小蔚打氣。





班際方面，男子組就不用看了，我們班有逸哥和癲佬霆爺，基本上其他班別是陪跑的。

「一百米決賽幾點跑呢...」我打量著黃色封面的場刊。

「晏晝兩點。」

「咁一陣都係叫小蔚唔好食咁飽。」

而班際女子接力的開始時間是三點鐘，即是一百米決賽後一小時。

希望小蔚跑完一百米，可以盡快恢復體力，此時，無聊的我被逸哥拉到欄杆前。

「咩料。」

「死仔，同小蔚咩階段呀。」





「咩..咩階段呀，唔知你Up乜。」

「唔通你哋...啪咗？」

「啪你老味呀！我..小蔚唔係啲咁嘅人！」

這個逸哥，總是愛跟我開玩笑。

「講笑，咁你同小蔚影咗合照未呀。」

對了，還未跟小蔚拍照。

「未...一係而家你幫我哋影？」我說。





「OK！」

回頭一看，發現小蔚正被一群男生包圍。

「喂，你一行開，成班豺狼上曬去喎。」逸哥指著小蔚那邊說。

「都..都係遲啲先影啦咁。」

我全程就留意著那群男生，看看有沒有多餘和不規矩的動作。

幸好，只是站在一起Yeah兩下。

如果你們誰敢碰小蔚，我肯定把你的手指折斷。

當小蔚跟那群男生逐個合照後，我便回到她身旁。

「影完相嗱...」

「嗯？做咩呀你咁怪嘅。」小蔚看著我說。

「冇喎。」我堅定地說。

「係咩，好啦咁。」

「我唔出去食喇，喺小食部買就得。」

「你同佢哋出去食啦。」說罷小蔚便轉身離開。

「呃...」

好吧。

今天寶珊要當值Prefect，也要留在運動場，所以只有我和逸哥。

在茶餐廳時，我一直記掛剛才小蔚的說話。

「咩事呀你心不在焉咁嘅。」逸哥問。

「冇咩...」我淡淡地說。

「講啦屌，得我哋兩個渣嘛。」

於是我把剛才的對話跟逸哥重演一次。

「哦，簡單啦。」逸哥恍然大悟的說。

「嗯？啫係點。」

「你條戇鳩仔，怪唔之得你仲未溝到小蔚，人哋擺明呷醋啦。」

「下...但我都無做啲咩...」

「頭先佢同咁多男仔影相...係咪應該我呷醋先......」我無奈地說。

「挑所以話你呢啲青頭仔，你記唔記得琴日咩事呀。」逸哥放下筷子說。

「琴日...？」

「...........哦！你想講小蔚呷寶珊醋！」

「咪就係囉，琴日影相嗰陣，寶珊成對導彈車埋你度，我係小蔚都嬲啦。」

「但頭先佢淨係同啲男仔影相，又冇身體接觸，你語氣都咁差，如果你係小蔚你會點諗。」

「原來係咁......怪唔之得...」

看來要哄回她才行。

「喂埋單啦，我要返去氹小蔚。」

「屌...我個沙嗲牛淨係食咗一半....」逸哥露出無言以對的表情。

焦急地回到看台，不見小蔚的蹤影。

難道是太傷心，躲到廁所哭了？

「小蔚熱緊身啦，仲等你咩傻仔。」逸哥示意我望向賽道上。

「唉...」

「一陣好好幫佢打氣啦。」逸哥安慰我道。

唯有是這樣。

「女子甲組一百米決賽，最後召集。」

現場氣氛開始熾熱起來，眾人都為著自己的朋友加油打氣。

我從看台上的座位走到欄杆前，希望可以近距離觀看比賽。

此時的小蔚眼神堅定地看著前方，一邊拉筋，一邊扭動腳踝。

「要加油...小蔚。」我心裡默默念著。

「佢啲對手都唔差。」逸哥又忽然出現。

「係咩。」我瞄了逸哥一眼，又專注在賽道上。

「田徑隊、學界冠軍、仲有大北區冠軍，要贏唔係咁易。」逸哥認真地說。

「希望小蔚可以正常發揮。」我說。

「望就咁望。」逸哥說。

「喂。」逸哥接著說。

「咩。」

「你會幫小蔚打氣㗎可？」逸哥問。

廢話，當然會。

「Ready」

「Set」

「Go！」

笛聲一響，各位女健兒都用力大步往前踏，誰也不願落後。

「加油！藍小蔚！加油！藍小蔚！」我和逸哥，甚至有些二打六男生也喊著小蔚的名字，替她加油。

比賽頭三十米，眾人鬥得難分難解，但接近七十米時，小蔚和另一名女生突圍而出，開始拋棄後方的人。

「Wo！小蔚！！！加油呀！！！」

二人不相伯仲，速度都十分飛快，我緊張得不敢眨眼，希望看到小蔚衝線的那刻。

但是，剎那間，小蔚突然失去重心，向前跘了一小步，幸好又立刻重回節奏。

不過，就在這個零點五秒不到的時間，原本稍稍領先的小蔚，已經被另一名女生超越。

「What...」

最後，小蔚只能以第二名完成決賽。

「.........」

我和逸哥只好對視一眼，又回到看台上。

「一陣小蔚返嚟，點安慰佢...」

「我都唔知，唔好問我。」逸哥聳肩說。

五分鐘後，小蔚終於回來。

去安慰一下她吧。

「唔..唔緊要㗎...你已經好叻...」

「......」

「冇嘢喎，傻啦！」小蔚說。

她的反應，與我預期之中有差別，有點兒嚇呆了。

「下...你...」

「唔緊要嘅，第二都好好㗎喇，唔係咩。」小蔚繼續說。

怎麼好像反過來，變成我被安慰。

但是，真的沒有關係嗎....

「你真係冇事....？」我還是有點擔心。

「嗯，無事呀，準備四乘一接力仲實際啦！」小蔚微笑道。

「哦...嗯！你冇事就好。」

或許，小蔚不想讓別人看到自己沮喪的一面，只是裝作堅強。

「點都好，希望佢喺班際接力可以發揮到最佳水準。」我心想。













「頭先，我聽到你有幫我加油。」

「招仔，多謝你。」