《樓上裝修咗成個暑假》: 三
聽聞長洲的大魚蛋和糯米糍挺有名，叫他們帶我去尋找一下吧。
「逸哥，呢度係咪有糯米糍食？」
「係呀你想食？」逸哥笑道。
「未試過呀嘛。」我聳聳肩道。
「叫小蔚帶你去買。」逸哥搭著我說。
「咁你同寶珊呢？」我問。
「我會使走寶珊架啦，呢個時候製造啲機會俾你哋兩個單獨相處。」逸哥悄悄地告訴我。
「咁好死。」我淡淡地說。
逸哥走到寶珊身旁，然後搭著寶珊。
「小蔚、招仔，我哋有嘢要買，你哋自己行下啦，一陣電話聯絡。」逸哥別過頭跟我們說。
「下..！我冇嘢買啵..」寶珊一臉疑惑地說。
「有呀，你唔係話....」逸哥拉走了寶珊說。
現在只剩下我和小蔚。
「我哋去邊好？」我說。
「你又話想食糯米糍。」小蔚笑道。
「但我唔知邊到有。」我抓抓頭說。
「帶你去啦。」說罷小蔚便起行了。
沿途我偷偷瞄著小蔚，發現她的背影也挺吸引，有不少男性經過我們時都會盯著小蔚看。
「到喇。」小蔚在一間小食店前停下。
原來這裡就是售賣長洲糯米糍的地方，我看著眼前各式各樣口味的糯米糍，眼花繚亂。
「芒果...榴蓮...食咩味好...」我正糾結著。
「買曬咪得囉傻仔。」小蔚淡淡地說。
「呃...都好。」
於是我買了四種口味，然後跟小蔚到一旁的長椅上坐下。
「你又會識嚟嘅。」我說。
芒果味也不錯，回去時多帶兩盒。
「兩年前嚟過嘛。」小蔚微笑道。
「自己嚟？」我把一顆糯米糍遞給小蔚。
「嗯...同一個男仔嚟。」小蔚搖搖頭說。
是小蔚的男朋友嗎？
「男朋友？」我緊張地問。
「噗，唔係啦。」
「一個追咗我兩年嘅男仔。」小蔚說。
「哦...最後有冇接受佢？」我追問。
「冇呀。」小蔚抬起頭，看著天空說。
「點解？」我又問。
此時小蔚皺起眉頭看著我，然後用手指戳了一下我的額頭。
「咁鬼八卦，細路仔唔好問咁多。」
「超，你都係大我一年渣嘛。」
小蔚笑了笑，便沉默下來。
似乎小蔚也是有故事的人。
「招仔。」
「嗯？」
「繼續行囉我哋？」小蔚說。
「好～」我點點頭，便跟小蔚繼續閒逛。
我們在一家飾品店前停下，小蔚目不轉睛地看著一條紫色的吊墜。
果然女生都是喜歡飾物。
小蔚拿起吊墜項鍊，掛在胸口前照鏡，然後微笑起來，我則在一旁觀看。
「招仔，呢條靚唔靚？」小蔚撥弄著頭髮道。
「你戴咩都咁靚架啦。」我雙手托著後腦說。
小蔚別過臉瞄了我一眼，又微笑起來。
「買唔買好。」小蔚皺起眉頭說。
「鍾意咪買囉，又唔係貴。」我在想這不會是真貨吧，最多是淘寶回來的。
「都係由佢，呵呵。」小蔚把吊墜放下。
女人真是一時一樣。
不過小蔚臨離開前還偷看了那吊墜一眼，似乎真的很喜歡，不知道她為什麼選擇不買。
「咦...」我被路邊的一件T恤吸引著。
「咩事？」小蔚說。
我走到那小店前，撫摸著這件印有紅色音符的衣服。
「幾襯你呀，鋼琴小王子。」小蔚在我身後說。
「唔該，呢件幾錢？」我抓起T恤，然後跟一名疑似是老闆的中年大叔說。
「二百蚊。」中年大叔看著報紙，淡淡地說。
我呆了呆，又失望地鬆開T恤。
「走啦...好貴...」說罷我便轉身離開店鋪。
「招仔。」小蔚突然拉著我的手。
「......」我停下來看著小蔚。
「哥哥，平啲得唔得呀？」小蔚微笑地說。
中年大叔放下報紙，看到小蔚時愣了愣，露出欣喜的表情，然後摸摸下巴。
「見你咁靚女，百五啦。」
「再平啲啦！我哋窮學生嚟架咋！」小蔚噘起嘴，一臉無辜地說。
「呃...好啦好啦！最多一百。」大叔揮手道。
「多謝哥哥！」小蔚拿出一張紙幣付款。
她拿著音符T恤，然後便跟我離開店鋪。
「而加啲男人真係鹹濕。」我笑道。
小蔚突然伸出手掌看著我。
「咩料。」我問。
「俾錢囉，頭先幫你俾咗一百蚊。」
「你唔係送俾我咩？」我偷笑道。
「食屎，幫你講完價仲想我送？」小蔚瞪著我，然後拍了我一下。
「得...得...而加俾。」我沒好氣地說。
小蔚奪過我手中的一百元紙幣，哼了一聲便轉身離開。
我看著小蔚的背影，會心微笑起來。
「呢條女，其實都幾好。」
小蔚替我購買T恤後，我們在市集閒晃了很久，但都沒有碰見逸哥和寶珊，不知道他們躲到哪裏去。
沿途經過一些小食攤時，我和小蔚也會停留一會兒，順道嘗試不同的美食，難得來到長洲當然不可以放過這次機會。
「嗝，好飽。」我摸著肚子說。
「梗係啦你食咗咁多嘢。」小蔚笑道。
「明明你都食唔少。」我無奈地說。
走著走著，電話突然響起來。
「喂？招仔你哋喺邊呀。」逸哥說。
「我哋......」我四處張望，打算看看這裡是什麼地方，此時小蔚指著一旁的路牌。
「咩..天福亭喎..」我說。
「哦，你哋行返碼頭啦，都差唔多夠鐘返去集合。」逸哥說。
「好，一陣見。」說罷我便掛線了。
小蔚看著我，像在等待我說話。
「我哋而加返去碼頭。」我說。
「嗯。」小蔚點點頭，就和我回去碼頭。
「其實我真係睇唔出你識彈琴。」沿途小蔚跟我提起。
「好多嘢你都睇唔出啦。」我拿起一顆香蕉軟糖，咀嚼起來。
「例如呢？」小蔚微笑地問。
「唔話你知。」我淡淡地說。
「車，扮曬嘢。」小蔚別過臉說。
片刻之後，我們在碼頭碰見逸哥和寶珊，還有其他同學，大家都非常準時。
「小蔚！過嚟睇下！我買咗條裙呀，你睇下靚唔靚！」寶珊揮手示意小蔚過去。
「好呀。」小蔚微笑道。
此時逸哥走到我身邊，把我拉到一旁。
「招仔，你嗰邊咩環境。」逸哥說。
「冇咩特別。」我聳聳肩道。
「咁有冇咩突破性進展？」逸哥問。
「呃...小蔚頭先幫我講價囉。」我說。
「冇拿？」逸哥托著下巴說。
我搖搖頭。
「嗯，咁好啦。」逸哥若有所思地說。
「你頭先同寶珊去咗邊？」我問。
「同佢喺市集買咗條裙，之後去咗影石。」逸哥笑道。
「影石......」我真是不懂欣賞。
片刻後，黃SIR把眾人聚集在一起，然後吩咐班級主席宣布探險活動的詳情。
我和逸哥則回去小蔚她倆身旁聆聽著。
「大家都知一陣有探險活動玩啦，我同你哋簡介下先。」班級主席說。
「你哋應該分咗四個人一組，咁你哋就要鬥快搵到收埋喺長洲每個角落嘅寶藏。」班級主席說。
我悄悄靠向小蔚，打算跟她說兩句。
「你估下有咩寶藏。」我說。
「點知，佢又未講。」小蔚淡淡地說。
我沒趣地移開身子，這個女生真是高冷。
「每一班會有一個寶藏，用細木箱裝住嘅，邊一班最快搵到返嚟報到，會有大獎一份。」班級主席說。
「係咩獎嚟架！」一名胖子喊道。
「挑，咪又係零食嗰啲濕鳩嘢。」霆爺不屑地說。
「PastPaper三十份！」班級主席笑道。
「.........」現場鴉雀無聲。
「講笑，遲啲你哋就知。」班級主席說。
「咁如果冇問題，大家可以出發架喇。」
於是，我們就開始進行這個所謂的探險遊戲。
在班級主席宣布探險開始後，陸續有人離開碼頭，進行所謂的尋寶遊戲。
我偷偷瞄了一下遠處的Mandy，發現她仍然跟那個MK仔兆聰一起，心裡有點不爽。
不過都已經Non of my business。
「而加五點半，佢有冇提過最遲要幾時返去？」我看一看手錶問。
「冇啵！應該搵到就可以返去！」寶珊托著下巴點點頭道。
「咁如果我哋班，有其他人搵到先，我哋點知？」小蔚皺起眉頭說。
「係喎！！咁我哋咪要一直搵？」寶珊十分驚訝地說。
「放心啦，只要任何一組人成功返去報到，主席都會喺班Group通知，唔洗驚喎。」逸哥拿起電話說。
我們點頭回應，便開始出發。
「我哋去咗邊度搵先？」寶珊問。
「我諗住去咗天后廟嗰邊先，跟住去張保仔洞，最後返去東灣。」逸哥說。
在前往天后廟期間，看到不少同學也正在努力地尋寶，但是在不知道獎品會是什麼的前題下，我可不願意花心力去做無意義的事情。
走著走著便到達天后廟，逸哥和寶珊說他倆會在沿海一帶尋覓，我跟小蔚則會到神學院附近的山腳尋找。
「搵到嘅電聯，搵唔到嘅就三十分鐘後喺返天后廟等，有冇問題。」逸哥說。
「OKOK。」說罷我便和小蔚起行了。
長洲其實不算太大，還以為起碼有一個北區的大小，原來跟想像中不同。
「招仔。」小蔚說。
「嗯？」
「個寶箱...係咩形狀？」小蔚疑惑地問。
「唔知喎，佢哋好似冇講。」我說。
「咁睇嚟真係要慢慢搵。」小蔚點頭道。
我們到達神學院，小蔚示意我到較深入的地方查探，於是我便離開小蔚，獨自一人去尋找寶箱。
「咁大範圍...點樣搵呀...」我無奈地說。
我在草叢堆裡找了十五分鐘，也沒發現。
走著走著，突然碰到Mandy和兆聰她們。
「嗰個咪你個EX？」兆聰搭著Mandy笑道。
「要一個人行，真係陰功。」兆聰說。
我有點不知所措，站在原地。
「唔好笑人啦...」Mandy尷尬地說。
「咁係呀嘛，呢條仔有咩比得上我？」
「瘦猛猛，樣又柒。」兆聰恥笑道。
「......」我垂下頭來，不敢說話。
「算啦...唔好咁講佢...」Mandy扯一扯兆聰的衣袖說。
真是丟臉，很想找個洞鑽進去。
正當我打算離開，小蔚忽然出現在面前。
「小蔚...做..做咩過咗嚟...」我別過臉說。
「冇，見你咁耐都未返嚟，諗住嚟搵下你，點知見到呢個咁震撼嘅畫面。」小蔚雙手抱胸道。
我只好尷尬地走向小蔚，把她推走。
誰知，小蔚甩開了我的手，再拉著我走到Mandy和兆聰面前。
「蔚蔚！」Mandy微笑地跟小蔚打招呼。
「呢個靚女又係邊個嚟。」兆聰囂張地說。
「佢係我堂家姐，叫小蔚。」Mandy說。
「你就係Mandy男朋友？」小蔚淡淡地說。
「係呀，咩事。」兆聰不屑地說。
「唔該你講嘢尊重少少。」小蔚凝重地說。
兆聰愣了愣，然後搭著Mandy。
「你嗡乜春。」兆聰說。
小蔚把我拉到身旁，瞄了我一眼，又看著兆聰他們。
「我要你同我朋友講對唔住。」小蔚說。
「下？你冇嘢下話？點解？」兆聰笑道。
「你侮辱招仔，我要你道歉。」小蔚木起臉說。
「癡撚線...」兆聰馬上拉走Mandy，Mandy回頭跟小蔚做了個不好意思的表情。
「喂...」小蔚打算踏前追上，我立即截住小蔚，然後示意她不要這樣。
「算啦...」我無奈地說。
我抬起頭，看著昏暗的夜空。
「咁的而且確...係我冇用...」我苦笑地說。
小蔚看著我，深呼了一口氣。
「點解你睇住自己女朋友俾人搶走，你都可以無動於衷。」小蔚帶點激動地說。
「我......」一時之間不懂反應。
「你可唔可以似返個男人？頭先條MK踩到上你心口，你都可以冇反應嘅？」小蔚抓住我的肩膀說。
「......」
「你咁樣邊會有女仔鍾意架？」小蔚皺起眉頭說，好像比我還緊張。
「對..對唔住。」我低下頭說。
小蔚似乎被我的道歉嚇到，鬆開了我。
「...咁..咁又唔洗...」小蔚說。
「.........」小蔚也低下頭來。
我真的很懦弱，是嗎。
沒辦法，我沒什麼優點。
不知道有什麼本錢追女生。
突然，小蔚看著我，然後捉起我的手。
「行啦，唔好諗喇，我哋繼續去搵。」小蔚微笑地說。
「好唔好？」
我抬起頭，看著小蔚。
「嗯。」我微笑起來。
我靜靜地跟隨著小蔚，她的背影總是令人覺得很有安全感，而且剛剛小蔚還替我說話。
長這麼大，除了老媽之外，好像沒有異性像小蔚一樣保護我。
「噗。」忍不住笑了一笑。
「笑咩。」小蔚回頭瞄著我說。
「冇。」我試著平靜地說。
「又收收埋埋。」小蔚藐視著我道。
走了片刻便碰到逸哥和寶珊，正當我打算詢問逸哥什麼時候要去下個地方，他說寶箱已經被尋獲。
「下，咁快搵到？」我嚇一嚇說。
「係呀，霆爺佢哋嗰組喺碼頭間麥當勞個廁所搵到。」逸哥聳聳肩道。
「聽佢哋講，頭先霆爺諗住去偷懶，點知入到麥當勞去洗手間嗰陣，就搵到喇！」寶珊微笑道。
「咁都得。」我沒好氣地笑道。
「所以我哋而加可以返去。」逸哥說。
我看一看小蔚，她瞄了我一眼，擺出一個傲嬌的表情，便率先起行。
「真係。」我搖搖頭說。
待所有人都回到碼頭之後，班級主席就宣布結果和獎品，不知道獎品會不會真的是Past Paper。
「估唔到你哋咁快就搵到，仲諗住Fake你哋上山慢慢搵。」班級主席無奈地說。
「梗係啦！有我霆爺喺度！邊個夠我勁！」霆爺舉起雙手，俯視著大海說。
「霆爺好波！！」數個班上的嘍囉說。
「咁我正式宣布，今晚探險活動的勝出班別係！6A班！」班級主席喊道。
「Wohoo！！」幾個女生歡呼起來。
「你哋嘅獎品，係通識Past Paper三十份！係咪好興奮呢！」班級主席笑道。
「.........」現場突然靜下來。
「講笑啫，每人會有兩張戲飛換領券。」嚇死我了，還真以為是Past Paper。
「咦，咁都幾好呀！」寶珊笑道。
「冇錯。」逸哥點頭說。
正當眾人熱烈討論時，我注意到在不遠處的兆聰和Mandy，兆聰正在以不屑和憎恨的眼神看著我。
我連忙別過臉，低下頭來。
「好喇，咁今日嘅旅行都差唔多，你哋想繼續留嘅就留低，離開嘅同學就上船啦。」黃SIR喊道。
「我哋留唔留好？」寶珊若有所思地問。
「冇所謂呀，招仔你呢？」逸哥說。
「.....招仔？」逸哥搖一搖我道。
「係！」我才反應過來。
「做咩心不在焉咁嘅？」逸哥問。
我搖搖頭。
「我哋講緊留唔留低玩多陣。」逸哥笑道。
「喔..我...我唔留喇，想返去抖抖。」我揮揮手拒絕。
不知道Mandy她們會不會留低，要是碰到她們就很尷尬，還是不了。
「咁呀...小蔚你呢？」逸哥問。
小蔚看了看我，又別過臉看著逸哥。
「我都唔留喇，有少少攰。」小蔚說。
「嗯，一係我哋都返去啦，今日大家行咗成日，攰都唔出奇嘅。」逸哥微笑又帶點失望地說。
說罷我們便登上特快船，回到中環碼頭。
可能真是有點累，上船沒多久就睡著了。
在短短數十分鐘的航程，做了一個奇怪的夢，我在山上看到有一包香蕉軟糖掉在地上。
不知道是什麼意思。
「到喇。」旁邊的小蔚拍拍我說。
「喔...」我揉揉眼睛說。
晚上的中環海景原來也都挺美麗。
「我呀爸嚟車我，兜埋你哋？」逸哥問。
「我自己返去得喇！」寶珊笑道。
「咁招仔你哋呢？」逸哥看著我說。
我別過臉注視著小蔚，待她表態。
「唔洗啦，你爸爸已經車咗我哋嚟，我哋自己返去得喇，係咪呀，招仔。」小蔚微笑地看著我說。
「呃..係囉，我哋搭978返去就得。」我抓抓頭說。
「真係客氣，咁好啦，你哋返去小心啲。」說罷逸哥便跟我們道別，和寶珊走向國金商場方向。
待逸哥離開後，小蔚便開始起行，而我卻站在原地，回想著剛才兆聰和Mandy的表情。
「招仔，頭先...招仔？」小蔚停下來說。
「喔..係！」我立即追上小蔚。
「做咩呀你。」小蔚敲一敲我額頭說。
「下，冇嘢呀。」我眨了數下眼睛說。
小蔚注視著我片刻，點點頭便沒理會我，我們靜靜地走到文華里的巴士站，等候巴士。
沒過多久，我們就上了巴士，坐在上層。
巴士剛剛駛進西隧，小蔚便開口說話。
「頭先冇事嘛。」小蔚盯著前方說。
「冇事。」我托著頭，看著窗外說。
「有唔開心可以講喎。」小蔚說。
「話曬我哋都叫一場鄰居。」
我愣了愣，然後別過臉，與小蔚相視而笑。
這個女孩，其實也有細心的一面。
起碼她能觀察到我有心事。
「冇咩特別嘅，見到Mandy佢哋...而加咁..」
「個心..有少少哽住哽住咁樣。」我苦笑道。
小蔚注視了我一會，突然抓住我的手背。
「唔好咁啦。」
「我知我好難去安慰你，但係既然過咗去，就唔好成日去諗啦。」小蔚溫柔地說。
「人總要向前看，係咪？」小蔚微笑道。
我呆了呆，又欣慰地點點頭。
「嗯。」
「瞓下啦，好快就到。」小蔚說。
我閉上眼，讓疲憊的身軀放鬆下來。
「又發咗嗰個夢...」我慢慢睜開眼。
此時，我看出窗外，發現已經到達彩蒲苑，即是很快就要下車。
再回頭一看，發現小蔚正靠在我的肩上熟睡，似乎小蔚也十分疲倦。
「落車喇。」我輕輕搖晃小蔚。
「......」小蔚睜開眼，迷迷糊糊地站起來，我便跟著她下車。
「呀...好攰...」小蔚打了個呵欠道。
「早啲瞓囉。」我淡淡地說。
「你都係啦。」小蔚沒好氣地說。
很快我們便回到清河邨。
「去買包糖先。」我示意小蔚。
「咁我都買枝檸檬茶。」小蔚說。
買完東西後，我們便準備回家。
「叮」
「聽日見啦招仔。」小蔚在升降機裡說。
「拜拜...」我背向小蔚，一邊揮手道別，一邊走出升降機。
「呵...」咦，忘記再看一看小蔚的容貌。
「呯」當我回頭時，升降機門已關上。
算了，反正天天都可以看。