【二月廿九番外篇】《沒有穿越的平行時空》: 第三十三章 生死
第三十三章 生死
Ryan好像及時察覺貨車正駛近自己，立即轉身避開，但由於與貨車的距離實在太近，他仍然被貨車撞倒。
當時貨車司機察覺有人橫過馬路，已立即扭軚避開。幸好他及時扭軚，就算撞上路人，也不是正面撞倒。但因為司機扭了軚，行駛方向已偏離行車線，現在竟向著行人路、即Yeesa和家聰的方向駛去。
貨車司機看見前面有人，已想煞停貨車並再次扭動軚盤，奈何行車速度不低，他的反應未能完全避開Yeesa二人。
眼見情況危急，家聰推開Yeesa，令Yeesa跌入貨車撞不上的範圍，他自己也盡力避開，但仍被撞到肩膊和手臂。二人均跌在行人路的積雪上。
貨車已成功減速，但因積雪路滑，它仍在行人路上滑行多一段路，最終撞在一石塊之上。
Yeesa︰「家聰！你冇事吖嘛？」
家聰：「Yeesa，我冇事，係撞到膊頭。你過去睇吓Ryan啦！」
Yeesa立即跑去Ryan那處。她看見Ryan有反應，並不像閃影畫面那般、完全失去知覺的樣子。正當她就來到Ryan的跟前，Ryan用日文說了一句：「頭很痛」，但聲線完全不似是Ryan，相差很遠。她才知道，這個根本不是Ryan。
家聰坐在地上，望望手錶，時間是9:15左右，比另一個平行宇宙出事的時間早了45分鐘，而且地點相距甚遠。家聰剛才還隱約見到這架貨車的倒後鏡沒有獅子狗超人，司機根本不是香川。家聰慨嘆命運根本已經一早安排，怎樣避也避不了。
家聰一直望向Yeesa的方向，沒有留意貨車停下來的那個方向。此時，開始有途人聚集在貨車旁，有些人更情緒激動，大聲呼叫。家聰始望向貨車的方向，發現貨車旁邊有一個背包，一個似曾相識的背包，連同袋裡的物件，散落在地上。
Yeesa︰「家聰，呢個唔係Ryan呀！」
家聰：「Yeesa，後面呀！」
家聰示意Yeesa望向貨車的方向，Yeesa望到Ryan一直沿用的背包，遺落在貨車旁邊。
Yeesa︰「唔好呀！唔好呀！」
Yeesa慢慢地走過去貨車的方向，她聽到路人很激動地用日文說：「有人被夾在貨車和石塊之間！」Yeesa不敢再行近，怕自己見到的是Ryan。
Yeesa︰「家聰，佢唔會係Ryan嚟㗎可！」家聰無語。
Yeesa再說：「頭先我哋都認錯咗嗰個人件外套啦，嗰個都唔係Ryan，可能呢個袋都唔係Ryan嘅，同款者！」
Yeesa再細心留意散落在背包旁邊的物件，全部都是她喜歡的零食。Yeesa開始崩潰，大哭起來，大叫「Ryan」。
Yeesa接著說：「你點解仲喺札幌㗎，都話叫你一定要番嚟香港㗎啦。馬智浩，點解你要留喺札幌？點解呀？」
Yeesa跪在雪地上，不斷呼叫Ryan的名字，真的聞者心酸。
「Yeesa！」遠處有人呼叫Yeesa，是熟識的聲音。
Yeesa和家聰一同望向發出聲音方向，他們看見，站在遠處呼叫Yeesa的，是Ryan。
Yeesa不敢相信她的眼睛。當時札幌正下著雪，Yeesa看得不清楚，不敢肯定是Ryan。Ryan跑過來Yeesa的方向，再大叫了一聲Yeesa，Yeesa終肯定此人就是Ryan。
Yeesa立即站起來，向著Ryan的方向跑去。
二人在雪地中相擁。
他們只想將時間停留在此刻，永遠都不再分開。
※※※※※※※※※※
擁抱過後，Ryan放開了Yeesa，Yeesa隨即再次攬著Ryan，生怕他會再離開。
Ryan︰「我抖唔到氣喇，我唔會再走喇，你放開我先啦！」
Yeesa︰「我唔會再信你，你一而再、再而三咁反口覆舌，我唔會再放手。」
Ryan︰「我唔可以唔理辰叔㗎嘛，因為呢個係你阿爸。」
Yeesa︰「你做乜仲要避我？」
Ryan︰「我冇避你，我覺得我同你喺2月29日完結之前都唔見面，咁有意外嘅機會就會降低，所以我先選擇離開醫院。我點估到你會知我仲喺札幌！」
Yeesa終於放開了手。
Yeesa和Ryan一直沉醉於兩個人的世界之中，一直沒有理會過其他現場的事物。這裡的確是交通意外現場，救護車和消防車已抵達，消防員協助將夾在貨車和石塊之間的傷者救出，救護員也忙著幫家聰和第一個被撞的傷者治療傷勢。
Yeesa︰「家聰，你點呀？」
家聰正坐在路旁的椅子上，讓救護員為其受傷的部位包紮。
家聰：「冇事。照道理，我係唔會有事。」
Yeesa︰「多謝你呀家聰，如果唔係你，被車撞嗰個會係我。」
家聰：「Yeesa，Ryan，你哋唔好鬆懈，依家只係九點半左右，距離另一個平行宇宙出意外嘅時間，仲有半個鐘。唔單止係十點前，喺二月廿九號未完結之前，都仲可能會有危險。你哋要盡快番返入室內，避免再有交通意外發生。」
Ryan︰「我覺得根本冇得避。如果個天係都要我死，我呢半個鐘內就算去邊我都會死。我唔想好似避難咁避，我淨係想同Yeesa一齊過埋今晚，開開心心咁過埋今晚。」
Yeesa點頭認同。
救護員用英文問他們懂不懂日文，Ryan和Yeesa回答懂，救護員就簡單解釋家聰的傷勢，懷疑他有骨折，要到醫院進行詳細檢查。
家聰：「你哋小心啲啦，我自己去醫院得喇。」
Yeesa︰「家聰，一過咗十二點，我就嚟睇你，好唔好？」
家聰：「得喇得喇，我上車先。」
家聰上了救護車，被送往札幌中央醫院進行檢查。Ryan拾起剛才丟在雪地上的背包，和Yeesa一起離開意外現場。
※※※※※※※※※※
Yeesa和Ryan見已停止下雪，所以不打算走回室內，選擇坐在附近公園的椅子上。Ryan取出保溫杯，讓Yeesa喝下溫水。
Ryan︰「凍唔凍呀，凍就返入室內坐。」
Yeesa︰「唔凍，有熱水就唔凍。呢度好靚，好浪漫，我唔想離開。」
Ryan︰「差啲唔記得同你講，生日快樂！」
Yeesa︰「估唔到會喺北海道親自聽到你講生日快樂。係喎，禮物呢？」
Ryan︰「冇呀，我哋啱啱先執番條命，仲要咩禮物！」
Yeesa扁著咀說︰「前年有蛋糕，上年有手帶，點解今年冇㗎！」
Ryan從袋裡拿出玉子燒。
Ryan︰「俾你食㗎！」
Yeesa︰「其實我真係講笑，點知真係有！」
Yeesa打開包裝紙，見到是玉子燒，已經被切開小塊。Ryan取出叉子，叉了其中一小塊，餵給Yeesa吃。
Yeesa︰「好好食呀！」
Ryan︰「我都估唔到啲玉子燒仲可以咁完整，頭先個背囊俾架車撞到，啲零食都飛晒出嚟，唯獨盒玉子燒仲係咁完整，証明係個天知道我嘅心意係有幾強，特登撞唔到佢。」
Yeesa︰「你點解會擺個背囊喺嗰度？」
Ryan︰「頭先見到啲好靚嘅嘢想影，於是咪放低個背囊喺一邊，我就周圍去影相，之後聽到巨響，先至行番過去睇吓咩事。」
Yeesa︰「你令我誤會出事嗰個係你，攪到我頭先好傷心呀！」
Ryan︰「我見到，我終於知道你係咁緊張我。」
Ryan將Yeesa一抱入懷。
Ryan︰「如果我哋可以過到今晚12點，應承我，同我喺埋一齊。我哋一齊行，一齊生活落去，好冇？」
Yeesa點頭，答應了Ryan。
Ryan看看手錶，已是10:15，已過了原本的意外時間。他示意Yeesa也望望手錶。
Yeesa︰「過咗十點喇，你冇死到。」
Ryan和Yeesa互望著對方。在札幌的雪地上，充滿著浪漫的氣氛，Ryan輕撫著Yeesa的秀髮，大家都很有感覺。Ryan輕輕的親吻了Yeesa的嘴唇，一切來得很自然，二人開始接吻起來。
※※※※※※※※※※
時間已是晚上十一時，二人仍然像糖黐豆般，誰也不想放開誰。不過，Ryan發覺Yeesa抵不住寒風。
Ryan︰「不如番入室內先啦，好似越來越凍。」
Yeesa︰「我唔想走，呢度遠離馬路，好安全，一定唔會有交通意外。如果我哋一離開呢度，一定會經馬路，會有危險。」
Ryan︰「好，我哋唔走，喺呢度留到十二點。吖，差啲唔記得咗，我個袋仲有兩個暖包，你用埋佢啦！」
Yeesa︰「好！」
Ryan幫Yeesa貼好暖包，Yeesa立時感到溫暖，沒多久，就在Ryan的懷抱裡睡著。
Ryan不敢睡著，生怕自己和Yeesa會在十二時之前發生意外，一直都看守著Yeesa，並留意著四周環境，幸好一些風吹草動也沒有。
這一個小時，對於Ryan來說，真的猶如十年。他很想時間快些過去，一踏入三月一日，一齊已成過去，另一個平行宇宙的Yeesa，不會再穿越，這個時空的Yeesa也不會再有閃影，他和Yeesa便可正常地生活下去。
終於，二月廿九日過去，三月一日來臨，Ryan的手錶，顯示著0:00。
Yeesa突然醒來，並望著Ryan。
Yeesa︰「Ryan！」
Ryan︰「Yeesa，過咗十二點喇，我哋兩個都冇事呀！」
Yeesa︰「Ryan，點解我哋會嚟咗呢度嘅，呢度係咩地方？」