【二月廿九番外篇】《沒有穿越的平行時空》: 第八章 兩個可能
第八章 兩個可能
巴西龜：「你終於番嚟喇！」
巴西龜曾經講過，沒有事情是會長解決不到。Yeesa覺得會長的到來，可能會解答到她的問題。
Yeesa望著會長，突然間，她又再一次有閃影。和上次見到Ryan時一樣，就算她沒有閉起雙眼，也能看到閃影。畫面全部都是這位會長，而且比上次見到Ryan時更多、更刻骨銘心。
會長：「我番嚟嘅時候已經睇咗上次第一集，同埋啱啱嘅live，我有以下總結。」
會長放下背囊，開始在黑板上寫字。Ryan見Yeesa沒打算跟他走，而那個會長又好似有甚麼偉論要講，所以便陪同Yeesa繼續留在現場。
會長：「我哋進行分析之前，要先排除發夢呢個因素。Yeesa喺2月28號至3月1號中間嗰個0時0分，佢見到嘅嘢，一定唔係發夢。我哋要堅信呢個原則，先至可以繼續分析。」
巴西龜：「我信Yeesa講嘅嘢，佢唔係發夢。」
會長：「如果肯定Yeesa唔係發夢，第一個可能性，就係預知未來，亦即係依家嘅Yeesa，接通咗未來嘅Yeesa，令到兩者可以互通信息。但好肯定一樣嘢，就係依家嘅Yeesa，好明顯只係一個observer，佢以第三者觀察緊未來嘅Yeesa，而唔係可以真正身處喺未來嘅時空。」
Ryan心想：「講嚟講去又係呢啲觀點，都唔見得佢特別勁。」Ryan對神聖幾何眾人都沒有太大好感，猶其這個傲慢的會長。
會長續說：「如果依家嘅Yeesa可以得到未來Yeesa嘅信息，得到預知未來嘅能力，而未來傳來嘅信息又係真，咁當中就有一件好奇怪嘅事。」
巴西龜：「未來有兩個Yeesa！」
會長：「係！巴西龜之前講得啱，係預知再加穿越。如果螢幕顯示嘅新聞報導係真，喺嗰個時空裡面，確實有兩個Yeesa嘅話，咁就有機會係另一個時空嘅Yeesa，穿越去閃影裡面observe得到嘅時空。咁樣講，成件事情就複雜好多。」
自從Yeesa剛剛閃過很多會長的畫面之後，她有點心不在焉，根本沒心機去聽，更何況會長講的理論，有些深奧。
會長：「照咁睇，如果係呢個可能性，Yeesa，你將來有機會得到穿越嘅能力，穿越到你observe到嘅嗰個時空。」
Yeesa︰「吓，穿越？」
會長：「喂，你究竟有冇留心聽我講嘢㗎？」
Ryan︰「喂，阿會長先生，你講嘢可唔可以俾啲禮貌呀？你講嘅嘢咁虛無，你叫人點可以即刻明白晒呀！」
會長：「依家係我哋諗緊辦法幫你呀，你都唔留心聽，我哋好難幫到你。」
Yeesa︰「Sorry呀，係我分咗心，你繼續啦。」
Ryan用一個鄙視的眼光，凌厲地望向這個會長。同時心裡感到擔心，因為他看得出，Yeesa似乎很相信這個會長所講的說話。
會長：「『預知加穿越』只係第一個可能性，仲有第二個可能性，就係閃影見到嘅時空，根本唔係屬於呢個時空，而係另一個平行宇宙。」
關羽搖著酒杯道：「係，兩個平行宇宙互通信息。」
會長：「係。多世界詮釋！」
Ryan︰「可唔可以講啲易明啲嘅嘢呀？」
會長：「多世界詮釋即係話，呢個世界有無限個分裂出嚟嘅宇宙。分裂嘅原因有好多，最常見係出現進行時空旅行嘅人。」
Ryan︰「如果真係第二個可能性，咁我哋係咪唔使理佢呢！」
會長：「我覺得事情唔係咁簡單。兩個唔同嘅平行宇宙，正常係互不相干，但當兩者接通，亦即係代表Yeesa有一種神秘力量去做到呢樣嘢，而佢擁有呢種能力，並唔係偶然。Yeesa，你係咪講過你第一次見到閃影，係你生日許願嗰陣？」
Yeesa︰「係！」
會長：「你係咪2月29號出世？」
Yeesa點頭。
會長：「自古以嚟，有好多神話傳說，同2月29號有關。如果今次真係有神秘力量啟動咗你嘅預知能力，或者同平行宇宙溝通嘅能力，佢一定係有原因，係想要你去改變一啲嘢，而令到將來嘅嘢有所改變。」
Alien︰「但我哋仲未確定到係第一、定係第二個可能。」
會長：「暫時資訊不足，Yeesa閃影嘅片段得兩分鐘，同埋有Ryan嘅零星畫面，太少資訊。」
Yeesa︰「唔係呀，啱啱又有新嘅影像。」
巴西龜：「吓，點解我哋察覺唔到嘅！」
Yeesa︰「就喺阿會長你嚟到之後，我就閃起你嘅畫面。」
神聖幾何眾人都感到驚訝，原來會長也是Yeesa閃影當中的男主角。Ryan聽到後，只感到無奈。
會長：「你仲睇到啲咩？」
Yeesa︰「我見到你拖住我，好似係俾人追住，你帶我逃走咁樣。」
會長：「跟住呢！」
Yeesa︰「知道你帶咗我去酒店……」
神聖幾何眾人開始起哄。
關羽：「兒童不宜。」
跳掣：「大家都係成年人，唔怕講喎，嘻嘻！」
Yeesa︰「唔係你哋講嗰啲咁㗎，冇事發生呀。但係……」
Ryan︰「但係咩呀？」看來Ryan真的非常緊張。
Yeesa︰「佢……佢話係我男朋友。」
神聖幾何眾人又再次起哄。
Ryan真的不想再聽下去。本來他覺得Yeesa腦裡閃起自己的畫面，以為自己將會是Yeesa心裡最重要嘅人，但現在還有這個傲慢的會長，還要說是甚麼男朋友，更要從Yeesa口中說出。Ryan心裡感到不是味兒。
會長：「其實到目前為止，所有嘢都係你單方面嘅一面之詞。我哋憑咩要信你講嘅嘢？」
眾人不敢相信會長會突然說起這番話，因為神聖幾何的成立就是研究所有世上不能解釋的事物，所有遇到的事件都會先選擇相信，再去找答案。當然，會長這樣的提問，目的是想誘導當事人Yeesa盡量記起她見到的事物，從而得到更多資訊。
Yeesa︰「940920。」
會長立即發呆。他完全不能想像Yeesa能夠講出這組數字。
會長點起一根香煙，吸了一口之後，仍在思考著這組數字。眾人都不敢發問問題，唯獨是Ryan。
Ryan︰「咁即係點呀？」
會長：「Shu，唔好嘈，我唔鍾意我諗緊嘢嗰陣有人嘈我！」
Ryan︰「你唔使咁寸㗎喎！」
會長：「Yeesa，我相信你講嘅嘢。我哋下一步要做嘅，就係睇吓有冇方法令你可以記得更多閃影畫面嘅細節。我想用跳掣嘅催眠術去試，你同唔同意咁做？」
Yeesa︰「OK呀，我冇問題。」
跳掣：「終於到我出場嘅時候。」
由於今日已經研究了很多關於Yeesa的事，Yeesa已覺得疲倦，思緒比較混亂。他們決定擇日再來。
Ryan陪同Yeesa，送她回家。
Yeesa︰「今日辛苦你喇，陪咗我咁耐。」
Ryan︰「你唔好再對我咁客氣啦！」
Yeesa對著Ryan笑。Ryan沒有和Yeesa說太多話，因他知道Yeesa今日接收了太多信息，不想再增添她的煩惱。Yeesa很快便睡著了，還不自覺地將頭挨在Ryan的膊頭。
Ryan希望，這程的士永遠不要到站。