【二月廿九番外篇】《沒有穿越的平行時空》: 第七章 二次直播
第七章 二次直播
Ryan早早已為Yeesa預留了一盒雜錦壽司。他已等了Yeesa足足一個星期，今晚終於見到她，已預知她會爭輸，一早預留了一盒給她。
Ryan︰「睇死你會爭輸俾班師奶啦！幫你俾埋錢㗎喇！」
Yeesa︰「我俾番錢你啦！」
Ryan︰「唔使喇，請你食啦，就當我多謝你嗰日幫我阿媽搽藥油啦。」
Yeesa︰「咁……多謝你喎。咦，係喎，會唔會又有wasabi㗎？」
Ryan︰「冇啦，仲要係今日最靚嗰盒，魚生最新鮮。」
Yeesa︰「因為你，我肚痛咗兩次喇。如果今晚再肚痛，我唔會再食你整嘅嘢㗎喇！」
Yeesa和Ryan均笑不攏嘴。
Ryan︰「不如你俾你電話我吖，如果你嚟買壽司，你同我講，我可以幫你留定。」
Yeesa︰「好呀！」
Yeesa和Ryan交換了電話。
※※※※※※※※※※
自從兩人交換了電話號碼之後，他們經常whatsapp，互相了解很多對方的事。就算Yeesa和她兩個閨蜜的聚會，她也不忘開Ryan的FB timeline的相來看。
Fiona︰「等我睇吓先！」
Fiona搶去Yeesa的手機，勁俾like給Ryan的相，Yeesa阻止不了。
Yeesa︰「唉，唔玩喇，俾番我啦！」
Fiona︰「Like完喇，俾番你。個男仔都幾好樣吖，上次見佢都斯斯文文，諗得過喎。」
嘉嘉：「係呀，幾靚仔㗎，你同我一樣諗法，Yeah！」
Yeesa︰「我到依家都唔知道，點解我第一次見到Ryan，個腦就會閃起好多佢嘅畫面。」
嘉嘉：「可能係呢啲呀，有人聲稱佢遇過一個從來都冇見過但好熟識嘅人，嗰啲叫做『Déjà vu』呀！」
Yeesa︰「唔係呢啲感覺呀！」
Fiona︰「咁可能你真係見過佢呢。你話佢住得好近你嗰度，而且你又成日去佢嗰間超市嗰度買嘢，而超市又好近書店。話唔定真係之前見過，但冇為意者。」
Yeesa︰「可能係啦。」
Yeesa很想攪清楚究竟為何腦裡會有這些畫面，一想到此話題，又想起神聖幾何。一想起神聖幾何，第二日巴西龜又來書店找她。
巴西龜：「喂，幾時再上嚟開live呀？」
Yeesa︰「你哋淨係掛住做節目，有冇幫我研究我有閃影嘅事㗎！」
巴西龜：「梗係有啦，不過要等埋會長番嚟先有結論嘛！」
Yeesa︰「又話你哋會長今個禮拜會番香港！」
巴西龜：「係呀，呢一兩日會番㗎喇。你之後個腦仲有冇閃影過呀？」
Yeesa︰「唔……冇喇！」
巴西龜：「有你唔怕講喎！」
Yeesa︰「唔……其實之前冇同你哋講，我見到一個男仔，我第一次見佢，個腦又閃起好多畫面，仲要係我唔使合埋眼，都會見到。我唔知同之前見到喺日本街頭嘅畫面有冇關。」
巴西龜：「梗係有關啦。不如就後日啦，會長最遲應該後日番，到時你叫埋嗰個男仔嚟一齊開live，我哋full team幫你諗掂佢。」
Yeesa︰「我唔知佢肯唔肯嚟喎！」
巴西龜：「你實有方法嘅！」
此時，巴西龜在書店裡看到領養狗仔的街招。
巴西龜：「隻狗你㗎！」
Yeesa︰「之前我喺街見到佢，俾人遺棄，好可憐，咪將佢帶番屋企囉，但我阿爸唔鍾意我養寵物嘛。」
巴西龜：「你放心，包起我身上。會長話想養狗好耐，你俾隻狗我哋學會啦，同埋我哋嗰度咁僻，係時候要搵隻狗看門口。」
Yeesa︰「佢狗仔嚟㗎喳！」
巴西龜：「學我哋小平同志話齋，不論大狗小狗，看到門口就是好狗。」
Yeesa︰「唔係黑貓白貓咩，好爛呀你！」
雖然Yeesa覺得，神聖幾何的人有些古古怪怪，但心地是善良的。與其放在家裡，怕辰叔會吃了狗仔，倒不如將狗仔帶到學會，讓他們照顧。
※※※※※※※※※※
Yeesa將狗仔抱走，辰叔相當驚訝，還不斷問領養的是何人，可不可靠之類的問題。Yeesa始覺得辰叔口裡說討厭動物，實質是喜歡狗仔。口硬心軟一向是辰叔的性格，奈何已答應了巴西龜，Yeesa也如期將狗仔送到神聖幾何。
Yeesa︰「咦，你哋會長呢，又話返咗嚟香港？」
巴西龜：「係呀，班機delay咗，遲少少先番。放心啦，我哋會好好照顧狗仔。係喎，有冇叫嗰個男仔嚟做節目呀？」
Yeesa︰「有呀，佢陣間就到。」
Yeesa之前問了Ryan，Ryan當然答應，他也想有多些機會親近Yeesa。
沒多久，有一男子上來。他滿面鬍鬚，看來真的似有學識的人。
Yeesa︰「咦，你係咪會長。」
耶穌：「唔係，我係耶穌。」
Yeesa︰「吓！」
耶穌：「我都係神聖幾何嘅人，我係專門研究陰謀論。我覺得你可能係俾外星人洗咗腦，但有啲殘存記憶仲喺個腦入面，所以先會間唔中記得番起啲嘢。」
跳掣：「做乜番嚟呀耶穌，又話唔再理我哋嘅嘢嘅！」
耶穌：「冇呀，今朝俾會長打嚟鬧爆咗我，所以咪番嚟囉。之前係我衰，離棄你哋。」
巴西龜：「超，講呢啲，我哋……」
又出現了腳步聲，打斷了巴西龜的說話。今次是另一個男人上來。
Alien︰「Hello，大家好，我番嚟喇！」
關羽用他的平音語氣道：「兩個人前後腳番嚟嘅機會率係一萬份之一，會長叫你哋番嚟嘅機會率係100%」
Alien︰「係呀。你就係Yeesa喇，我係Alien呀，我專門研究外星生物㗎。」
Yeesa︰「Hi！」
Yeesa 見到現在神聖幾何有五個人，即差會長一個就齊人。沒多久，又有人上來，不過不是會長，而是Ryan。
巴西龜：「你就係Ryan喇？歡迎你嚟我哋神聖幾何呀。齊人喇，可以開live喇。」
Ryan雖然不清楚做甚麼，但Yeesa叫他來，是為了解決她之前有閃影嘅事，他也想幫Yeesa分憂，所以答應了來這個奇怪學會。
※※※※※※※※※※
巴西龜：「歡迎大家又嚟睇我哋神聖幾何嘅特備節目『未來閃影，香港真人版 (第二集)』，今集除咗有女主角Yeesa之外，仲有男主角Ryan。我哋俾啲掌聲Ryan。」
Ryan一副尷尬的樣子，不過被主持人形容為男主角，女主角更是Yeesa，心裡其實很高興。
巴西龜：「Yeesa，自從上次你喺生日嗰陣閃起咗一啲好特別嘅畫面，之後你又再一次有閃影，而且睇到嘅係一位你本來唔識嘅男仔。你可唔可以同我哋詳細啲講番事發經過。」
Yeesa將之前偶遇Ryan和閃起Ryan畫面的經過，清清楚楚在直播節目說起。Ryan覺得這間學會的人很奇怪，說話有些「呃飯食」的感覺，奈何答應了Yeesa，唯有支持到完場。
今次觀看人數雖然比之前高，但都只有百幾個view。網民評語也不好：
「又女主角又男主角，下次有冇男女配角呀」
「再唔係嗌埋編劇出嚟啦」
「屌，已經俾多次機會你哋，又俾啲咁嘅嘢我睇」
「Ryan都幾靚仔喎，有啲似郭富城」
直播結束，Ryan拉著Yeesa，說這班人是神棍，叫Yeesa快些離開為妙。
就在Ryan和Yeesa準備離開之際，再一次有人到達學會。神聖幾何會長終於出現！