【二月廿九番外篇】《沒有穿越的平行時空》: 第五章 神聖幾何
第五章 神聖幾何
Yeesa第一眼望見Ryan，有一種很熟識的感覺。
突然，Yeesa的腦海又在閃起影像。這些影像，就算她不閉起雙眼，也能清晰看見。
她看見Ryan，畫面全都是Ryan。這種感覺，就像認識了Ryan很久，但Yeesa明明不認識他。
Ryan︰「對唔住呀小姐，係我哋嘅疏忽。Sorry！」Ryan向Yeesa鞠躬道歉。
Yeesa一直望著Ryan發呆，沒有任何回應。Fiona見狀，立即幫Yeesa講：「OK啦，佢依家個肚都冇事，但件事唔可以就咁算數喎！」Fiona望著經理道。
經理：「冇問題，呢度有啲coupon，希望你哋會有用！」經理送給Fiona數張超市的coupon，以平息事件。
Fiona跟Yeesa悄悄話：「喂，你盵完未呀，走喇！」Yeesa才如夢初醒，始肯將視線移離Ryan，並跟Fiona離開超市。
※※※※※※※※※※
平息了投訴事件後，經理再責罵了Ryan和Thomas幾句，說會將投訴事件紀錄在案。對於Ryan和Thomas來說，客戶投訴也沒有相干，因為只要不是犯下大錯，退錢可以解決到問題的話，對他們也沒有影響。
他們二人返回廚房，Thomas跟Ryan說：「喂，有冇留意頭先條女呀？」
Ryan︰「邊條女呀，長頭髮定短頭髮嗰個呀？」
Thomas︰「仲扮嘢，長頭髮嗰個呀，頭先佢盵咗你好耐喇！」
Ryan︰「冇留意喎！」
Thomas︰「喂，諗諗佢吖，佢都幾靚女，佢應該似係會成日嚟超市。」
Ryan︰「都唔關我事啦，我做廚房㗎喳，有幾可會出嚟吖！你呀，都係你啦，玩咩辣辣壽司吖，攪出禍，頭先又淨係得我道歉，你有做過啲乜！」
Ryan和Thomas都是這間日式超市的資深員工，已在超市做了超過十年，有少許「高不成、低不就」的感覺。Ryan已經三十歲，雖未至於一事無成，但已習慣了在超市工作，對人生也沒有甚麼規畫，做人也沒有上進心和動力。
可以這樣說，Ryan將自己的青春貢獻了給家庭。他有一個比自己細十多年、仍在讀中學的妹妹，父親也在妹妹出世後不久便過身。單靠母親的工作，生活會相當艱苦。讀書不成的他，中學畢業後便外出打工，減低家庭的經濟壓力，在超市工作一做就做了十多年。
※※※※※※※※※※
Yeesa和Fiona離開超市後，在回家途中，Fiona已忍不住要問Yeesa。
Fiona︰「你識頭先嗰個男仔㗎？」
Yeesa︰「吓，邊個呀？」
Fiona︰「開聲道歉嗰個呀！」
Yeesa︰「唔識。」
Fiona︰「唔識又望到人實一實！」
Yeesa︰「唔係呀，我……我都唔知點講。頭先見到呢個男仔，突然個腦又閃起好多畫面，而嗰啲畫面全部都係呢個男仔嚟，但我明明係唔識佢，甚至未見過佢。」
Fiona︰「嘩，呢個男仔，仲唔係你命中注定嗰位！」
Yeesa︰「唔好玩啦，佢就想喇！只係我覺得奇怪者，琴晚已經閃過一啲類似幻覺嘅畫面，今日又閃另一個人嘅畫面。」
Fiona︰「你話世事嘅嘢就係咁巧合，其他男仔就唔會有呢啲畫面，唯獨係呢個男仔就有，佢仲唔係你嘅真命天子？」
Yeesa︰「痴線！」
Fiona︰「同埋我想講，佢都幾靚仔吖，又係你鍾意嗰type男仔。考慮吓佢啦！」
Yeesa︰「我呢一兩日已經好煩㗎喇，你放過我啦！」
※※※※※※※※※※
在接下來的兩個星期，Yeesa每晚也重重複複夢見2月28日0時0分時閃過的影像，心情沒有一刻好過。最終她決定找巴西龜幫手。
某一個晚上，Yeesa獨自前往神聖幾何學會。原來，這間神秘學會的會址真的很神秘，異常偏僻，Yeesa愈來愈怕，生怕人生安全受到威脅。不過，既然答應了巴西龜，她硬著頭皮繼續找路。
就在一座貌似鐵皮屋外觀的兩層建築物，她找到了神聖幾何，還要上一條不短的樓梯，才真正到達學會所在，
巴西龜：「歡迎你呀Yeesa！我哋等咗你好耐㗎喇！」
Yeesa看見神聖幾何只有三人，其中一個是巴西龜，另外還有一男一女：男的中間分界，頭髮及肩，一直拿著酒杯在搖晃；女的一頭曲長髮，拿著陀錶，念念有詞。
巴西龜：「我再次介紹自己啦，我叫白世繼，人人都叫我做巴西龜，喺神聖幾何入面，我哋每個人都各有所長，我以前係讀幾何學同物理學嘅。愛因斯坦嘅相對論公式夠犀利喇掛，但係到依家都未解釋到量子力學嘅世界，所以好多嘢都係有可能。喂，你哋都介紹一下自己先啦！」
曲髮女：「Hi，我係跳掣呀，係執業NLP催眠師。催眠可以幫助你搵番前世嘅記憶……」
中間分界男：「……當奇點來臨，我哋就可以突破第三維度。我係次元研究師，關羽。」
關羽左手搖著酒杯，右手伸手和Yeesa握手，Yeesa覺得他很古怪，但基於禮貌，她也跟關羽握手。
Yeesa︰「其實我都唔知自己見到嘅嘢係咪真係幻覺，同埋見到嘅影像又唔係好長，我……」
巴西龜打斷Yeesa的說話：「唔使急，我哋開live慢慢講。」
巴西龜帶Yeesa去做直播的位置，接著學會的網台便開始直播。
巴西龜：「歡迎大家嚟到神聖幾何嘅特備節目『未來閃影，香港真人版』，呢位就係今集嘅女主角Yeesa。」
Yeesa知道自己會做直播節目，不過沒想到這麼突然，勉強回應一聲：「Hi！」
巴西龜：「不如你講吓你之前經歷過啲乜！」
Yeesa︰「係。就喺我生日之前嗰晚，我準備踏入0時0分嘅時候合十許願，合埋雙眼之後，我見到一啲影像。影像入面我見到我喺日本街頭，望住一個大銀幕，螢幕上係報導緊一單交通意外嘅新聞，新聞入面我見到仲有另一個自己，但嗰個自己已經暈咗，新聞報導仲話嗰個自己已經死咗。」
跳掣：「嘩，真係好神奇。會唔會你只係發緊一個你有意識嘅清明夢，甚至係預知夢呢？」
Yeesa︰「我唔知我係咪預知到未來，但我好肯定我唔係發緊夢！」
巴西龜：「點解你咁肯定唔係發緊夢呢？」
Yeesa︰「因為我係搭正0時0分0秒合十許願，但我睇到嘅影像起碼有兩分鐘，到我擘番開對眼，我再望個鐘，只係0時0分2秒左右，完全冇消耗過時間咁樣。」
關羽：「係靈魂嘅瞬間轉移。雖然冇牽涉到肉身嘅轉移，冇違反到相對論，但未來嘅信息係冇辦法帶番嚟現在，就算係兩個唔同嘅時空互通信息，亦都冇可能。」
巴西龜：「呢單嘢真係有啲棘手。同埋仲有一樣好重要嘅嘢，就係，我就當係Yeesa閃過嘅影像，係嚟自未來嘅信息，但係呢段信息入面，竟然出現兩個yeesa，咁就令到成件事變得更加撲朔迷離。莫非係預知再加上穿越嘅雙重事件？」
直播進行當中，很多網民都一致俾嬲，很多留言都是負面的：
「吹啦，繼續吹大啲啦！」
「搵個好啲嘅演員啦，太浮誇喇！」
「青山冇鎖好大門咩！」
「又預知又穿越，零分重作！」
「CLS，下次可以罷睇！」
評語是一致負皮。雖然網上世界，負皮不一定差，起碼製造到輿論。不過，整個節目最高峰的觀看人數，都只有數十個人，少得可憐，更遑論會有網民提供到有用的意見。
跳掣：「你話你確定唔到你見到嘅影像係幾時發生，咁你仲見唔見到一啲客觀嘅事實，例如，除咗你出意外嘅新聞之外，仲有冇其他新聞報導嘅實質內容？」
Yeesa︰「冇喇，影像太短，只有兩分鐘左右，冇其他嘢睇到。」
巴西龜：「好喇，今晚嘅節目都差唔多喇。大家記得留意我哋FB、IG同YouTube嘅最新消息喇。下星期再見，拜拜！」
※※※※※※※※※※
節目完結後，Yeesa仍然很迷惘。
Yeesa︰「咁即係點呀？」
巴西龜：「你放心，雖然今晚節目嘅反應麻麻，但我哋一定會幫你查出你見到嘅畫面究竟係未來影像，定係其他不知名嘅信息。最重要嘅就係，我哋會長下星期就番㗎喇，佢一定可以解答到你嘅問題。」
Yeesa︰「會長？」
跳掣：「我哋神聖幾何其實有六個人，有兩個人冇義氣，離開咗我哋。但唔緊要，只要有會長，冇嘢係解決唔到。」
巴西龜：「係呀，會長係一位哲學嘅博士，冇嘢係佢唔識，同我哋完全唔同。只要會長返嚟，我哋就會再次團結一致，一定可以幫到你。Yeesa，放心將你嘅疑惑交俾我哋，不過最緊要就係下星期準時上來開live。」
Yeesa覺得，神聖幾何的人並不是出於真心，只是利用她，豐富他們網台直播的內容，挽救他們的低收視。Yeesa沒有抱太大期望，最多下次不再上來。
※※※※※※※※※※
Yeesa離開神聖幾何，回家休息，但不幸的事再次發生在Yeesa身上。她在回家途中，遇到有人群毆，似是兩幫黑社會在廝殺。混亂間行人爭相走避，其中有人不小心撞倒Yeesa。
此時，Yeesa來不及起身，眼見有數人圍毆其中一人，那人正衝向Yeesa方向。就在這千鈞一髮之際，有人扶起她，帶她逃離現場。Yeesa回頭一望，此人正是Ryan。