【二月廿九番外篇】《沒有穿越的平行時空》: 第四章 閃影
第四章 閃影
一如以往，Yeesa在踏入0時0分的時候，閉起雙眼合十許願。
此時，她看見了一些影像。很奇怪，這些影像很實在，不自主地出現在她的腦海裡。她想立即睜開眼，但好奇心驅使她繼續看下去。
她看見了「自己」，在一個繁華的街頭上。這裡不似是香港，她觀察到周圍有日文字。對，這是日本的街頭。
之後，那個「自己」望向一個大螢幕，螢幕顯示了一則新聞報導。此時，Yeesa和影像中的「自己」也大吃一驚，因為報導中竟出現了第二個「自己」，但這個「自己」剛經歷了交通意外，已陷入昏迷，並由救護員救出。報導的標題更是「交通事故外國人1人死亡」，即代表，第二個「自己」死於那個交通意外之中。
在日本街頭的那個「自己」，見到新聞報導後，非常驚慌地周圍問路人，意外現場是甚麼地方，醫院怎樣去，叫途人去幫她。事實上，那個「自己」根本不懂日文，日本人聽不懂，更遑論去幫助她。而且，那個「自己」說在新聞報導中見到另一個「自己」在交通意外中死亡，教人怎樣相信。
突然，影像就在此處停頓了，Yeesa睜開眼，眼前依舊是自己的房間。她望望時鐘，發現只是0時0分2秒。她心想，剛才看到的影像，起碼有兩分鐘，為何睜開眼後，時間竟然沒有流逝？
就在此時，她的房門被推開，好朋友嘉嘉和Fiona拿著生日蛋糕，走入她的房間，大叫「Happy Birthday！」這時候的Yeesa，那有心情去回應她們。
嘉嘉：「咦，做乜有隻狗仔喺度嘅？」
Fiona︰「你唔係自己買蛋糕俾自己咁慘情吓話？」
對於好友的提問，Yeesa仍然不知怎樣反應，因剛剛她的腦袋才閃過一段很不尋常的畫面。又不似是發夢，她明明沒有睡著，這點她很肯定。幻覺？就算是幻覺，明明兩分鐘的幻覺，為何時間好像沒有消耗過？
嘉嘉：「生日快樂呀Yeesa！係咪驚喜到唔識俾反應呢？」
Yeesa︰「多……多謝你哋呀！」
Fiona︰「你有啲咩唔妥呀，面色好差喎，仲標晒冷汗！」
Yeesa︰「我頭先……頭先好似發咗一場……一場惡夢咁樣！」
嘉嘉立即擁著Yeesa，道：「唔使驚呀，冇事喇，發惡夢者！嚟，吹蠟燭先啦！」
※※※※※※※※※※
三人正享用著生日蛋糕。雖然心情已平復了少許，Yeesa仍然猶有餘悸。她決定將剛才所發生的事講給Fiona和嘉嘉知。
嘉嘉︰「你話你唔係發夢，而係合埋雙眼嘅時候腦海出現嘅畫面？」
Yeesa︰「係呀，我唔知點同你哋講，係好真實嘅感覺，又唔似係幻覺。而且最奇怪嘅，就係擘開雙眼之後，發現時間冇改變過，都係零時零分多少少。」
Fiona︰「唔好諗咁多喇，可能係你太攰，休息多啲啦。依家都夜喇，食埋個蛋糕就好瞓喇！」
Yeesa也覺得自己太疲累，決定好好睡一覺，不再想太多。可惜事與願遺，她做了惡夢，內容又是昨晚0時0分時閃過的畫面。Yeesa睡了等於沒睡。
睡醒後一出廳，辰叔說煲了定驚茶讓Yeesa飲。
Yeesa︰「做乜無啦啦煲定驚茶我飲呀？」
辰叔：「知你琴晚有啲嘢，有幻覺吖嘛！飲咗佢就會好㗎喇！」
Yeesa︰「你做乜偷聽我哋講嘢呀？」
辰叔：「你哋講得咁大聲，點算偷聽！你同我飲晒佢呀！」
Yeesa知道辰叔其實很關心她，只是平常很少用說話去表達。Yeesa也乖乖喝下辰叔為她預備的定驚茶。
辰叔：「仲有呀，我知你琴晚帶咗隻狗返嚟屋企。你好快啲搵人認投咗佢喇，我最憎就係養寵物㗎喇！」
Yeesa︰「知喇，你唔好劏咗佢嚟食呀！」
辰叔：「我冇你講得咁變態！」
※※※※※※※※※※
今天書店的工作很少，客人亦不多，Yeesa大部分時間都在「瞌眼瞓」。雖然很累，但她也不忘將狗仔的相post上FB，希望有有心人會領養牠。
就在她臨睡著之時，上次的那個奇怪男子又來書店買書。
奇怪男：「好眼瞓喎你，琴晚瞓得唔好呀？」
Yeesa︰「係呀！」
奇怪男再一次拿出他上次那個「波粒二象性」的儀器，再一次對Yeesa有反應，但又再一次很快回復正常。
Yeesa︰「先生，夠喇，你唔係買書就走啦，玩夠喇！」
奇怪男：「我想問吓你最近有冇遇到怪事呀？」
Yeesa︰「冇……」
Yeesa說完「冇」字之後，心裡有一絲猶疑。她昨晚的確遇到怪事，但不知應否對這位陌生人說出自己的私人事。
奇怪男：「有你唔怕講。我部機好準㗎，佢有反應嘅話，即係代表你可能真係有超能力，不過讀數維持唔到好耐，証明唔係好強，但都足以令到你會遇到怪事。如果有，我哋學會可以幫到你㗎。」
Yeesa想起上次這個奇怪男子給了她卡片，隱約記得是一張神秘學會的卡片。既然此人是隸屬於一個學會，儘管不太可信，但將事情告訴他，也沒礙事。
Yeesa將昨晚0時0分所發生的事，由頭到尾、一五一十的對奇怪男子說出。
奇怪男：「唔……的確好有趣！」
正當Yeesa以為他只會說「呢啲只係你嘅幻覺」之類的說話，奇怪男子認真地向Yeesa解釋：「可能同『揚升』有關！」
Yeesa︰「吓，揚升？」
奇怪男：「之前有好多人認為，2012年12月21日係世界末日，當然最後冇發生到啦，但有更多人認為，嗰日其實係『頻率提升日』。末日係指舊人類過去、新人類降臨，所以有啲人會得到特殊功能，就好似你咁！」
Yeesa一臉茫然，不知如何是好。難得有人相信她的說話，而且還幫她研究，說不定那個學會真的能解釋她昨晚所發生的事。
奇怪男：「我俾多次我哋學會嘅卡片你啦。我哋叫做『神聖幾何』，我就係呢個學會嘅副會長，人人都叫我做巴西龜。我哋有個網台節目，專係邀請一啲得到神秘力量嘅人上去一齊探討。你諗清楚再搵我啦，走先喇！」
巴西龜離開後，Yeesa望著神聖幾何的卡片，心想自己所遇到的怪事也不算太怪，而且巴西龜可能另有企圖，因為他說是邀請Yeesa上網台做節目，是有目的。最終Yeesa決定不理會他。
※※※※※※※※※※
收鋪後，Yeesa如常往附近的超市，買特價壽司。這間超市有特價時段，很多顧客也在此時段爭先搶購。平常的她，一定不敵一眾師奶，每次只搶到卷物。今晚不知哪來的運氣，竟然搶到什錦壽司併盤。可能和最近轉運有關吧！
不過，Yeesa很快便覺得自己仍然是「當黑」，她只吃了一件壽司，壽司裡有大量wasabi，辣得她吐也吐不切，已開始覺得腸胃不適。
Fiona擔心昨晚Yeesa出現幻覺的事，於是今晚刻意前來Yeesa家找她。Fiona見Yeesa肚痾，又發現她是吃完超市的wasabi壽司後才導致肚痾，於是帶同Yeesa一同去超市理論。
超市食品部的經理見有客人投訴，而且有合理依據，連忙找廚房的壽司部員工了解情況，叫Yeesa她們耐心等候。
經理找到負責整壽司的Ryan和Thomas，質問他們為何什錦壽司當中會有大量wasabi，他們推搪說不知情。經理再三質問，並謂壽司只由他們兩人去做，不可能完全不知情。
Ryan︰「Sorry呀，我哋有整過呢啲壽司，但唔知點解俾人pack好咗，仲要擺埋出去賣。」
經理：「即係有呢件事啦！你哋要跟我出嚟，同個客道歉！」
經理帶Ryan和Thomas出去，並吩咐他們向Yeesa道歉。Yeesa第一眼望見Ryan，有一種很熟識的感覺。突然，Yeesa的腦海又再閃起影像。