【甜/真人真事】我是他的常餐情人: 七十八

第77章
阿熙話音一落，似係下定決心咁將我推開，然後拉起我個人自己企咗起身。我拉住佢手臂望實佢。

「你醉啦。」佢抱住我，我明明感受到佢同我緊貼嘅火熱，我以為佢同我感受係一樣，我更以為佢比我更需要呢刻嘅溫暖，有時候麻醉自己係最好嘅治療方式，我同佢以前都係咁嘅啦，點解而家要推開我？

「我搞咗你，你聽朝一醒會後悔。」佢摸一摸我個頭，低頭輕吻我一下，呢一秒我莫名地感受到佢唇上嘅顫抖，呢一下認知令我有種被珍惜嘅感覺。

我忽然諗起佢好耐之前話過係出面食女從來無錫過佢地只係當佢地係工具，我當時講咗句，你如果唔錫我以後都唔好掂我，我唔想做佢嘅洩慾工具，然後我成為咗佢女朋友以外佢唯一會親吻嘅人，佢永遠都係帶着無比嘅繾綣同我交纏，就好似佢本人一樣永遠都係一種拒人於千里之外嘅溫暖又莫名地吸引。

「我唔想自己一個返屋企。」我低嘆一句，我安撫唔到唔知係因為酒精定佢而發燒嘅身體。



「你諗清楚未？」佢望入我對眼，有種狂亂而令我唔敢猜度嘅情緒。

「我冇醉啊⋯帶我走好無？」我只係想呢一刻，將同佢嘅吻無限延續落去，只係想呢一刻唔好一個人過。

人總係不斷因為衝動而毀壞值得珍惜嘅嘢。