【甜/真人真事】我是他的常餐情人: 三十七

37.

當你心頭滿滿地放咗一個人，到感情滿瀉嘅時候你會禁不住搵佢，而你發現對方唔能夠俾同等嘅嘢你，你只能為咗自尊而忍耐。按捺自己覆佢嘅慾望，係一件猶如戒毒嘅事，望住佢個名係工作grp係咁出現，而佢同我嘅對話框越跌越落，或者我同佢都不再主動，咁我哋嘅關係應該會自動斷開啩？

我唔知Isaac幾時行過見到我係 Anthony架車，抬頭張望咗一下又迅速低頭，俾我見到佢又如何？我又能夠期望啲咩？而家連佢嘅單單打打我都唔敢想像係佔有慾。

Anthony好快就落返嚟，打開車門見我悶悶不樂，佢都冇問我啲咩，好似個大哥哥咁摸咗下我個頭，佢話見我攰今日就放過我唔安排下場，如果係Isaac以前咁做，我一定會小鹿亂撞吧？我發覺而家男仔對我嘅示好，我都會自動轉化為溝女嘅伎倆，反正係因為我未被得到先施展嘅渾身解數吧。

我同自己講唔好好似以前咁因為有Isaac而抗拒人地對我好，消費下人哋嘅好意絶對比付出輕鬆。



冇任何一段感情唔可以被新感情取代，一段唔夠，多兩三個就可以填滿我用嚟思念佢嘅時間。