【甜/真人真事】我是他的常餐情人: 三十五

35.戒斷反應
同Sales食飯嘅樂趣在於，你永遠唔需要擔心點樣搵話題，亦都唔會出現好似佢之前咁就算我係佢身邊望眼欲穿都等唔到佢一句對答。

Anthony對我嘅興趣早係我啱啱入公司已經知道，但我一入公司都毫不介意咁公開咗我有穩定男朋友呢件事。講翻Anthony其實係公司都幾受歡迎。

佢個人有趣能力都唔差，自然大把女仔好受落，仲好有耐性，聽同事講之前佢為咗溝公司一個妹妹，陪人去上甜品班，最後個個星期整甜品俾人地食，不過聽講好快就不了了之咗，因為對於食家，得到手嘅獵物就唔再有趣。

敏銳如Anthony見到我同Isaac嘅互動就知道，我所謂嘅穩定男朋友都唔似得表面上咁固若金湯。我知道以前嘅我，係佢眼中就好似Isaac嘅小Fans，又會留底OT同佢單獨相處，呢樣野大概係Anthony呢個經常見客夜麻麻先翻公司嘅人先知嘅小秘密，而佢都不知撞見過幾多次我同佢單獨相處，所以上次打邊爐佢先咁樣抽我地水。

我去到餐廳，Anthony有啲唔好意思咁話本身想翻公司接我，佢知道我其實幾懶唔會想諗菜式，都一早問過我有咩唔食負責叫好曬。



我忽然發現，原來接受人地嘅好意比自己熱臉貼冷屁股要輕鬆得多，你要去焐熱一個人，都要對方唔係一舊頑石先得，當然做被動接受嘅會更開心。