【甜/真人真事】我是他的常餐情人: 三十四

34.欲斷還亂

我心底裡同自己講，俾夠一個星期佢，如果佢選擇聽完我嘅問題之後唔俾答案我，又如果佢依然好似以前咁，明知係我唔想嘅情況之下強迫我就範而完全之後無俾任何安慰我，我就唔再同佢糾纏。

係我問出問題果一刻，我其實都知道佢大概既處理方式，就係好似以前咁樣粉飾太平，拖得一次就一次，但佢唔知道嘅係我極度缺乏安全感，我透過不斷嘅試探同質疑索取答案再吸取哪怕只係得少少嘅曖昧，咁我就可以欺瞞自己，果啲係佢對我嘅喜愛。喜歡一個愛而不得嘅人而自己太有自尊，咁就註定清醒時戒毒會好痛苦。

我行出去嘅時候喺走廊見到sara同martin兩個講有講有笑，Martin有啲擔心咁望住我唔係好自然嘅面色，sara拉過佢隻手，倉猝之間居然十指緊扣地快步行咗去𨋢口位，Martin即刻好怕羞咁被Sara帶偏左，就冇再望住我。

「今晚得唔得閒？」我丁一聲我低下頭一望手中嘅電話，居然係Anthony嘅message。
「可能要OT，有事嗎？」


「冇啊上次同個客去咗食一間唔錯嘅泰菜，你唔係話你鍾意嘅咩？帶你去試。」估唔到Anthony居然記得我有提過鍾意食泰菜。
「好啊，我搞埋手頭上啲嘢應該八點前可以起行。」因為Anthony成日唔喺公司嘅關係，我哋約咗喺間野附近等。

「星期六得唔得閒？」呢個時候收到Isaac嘅message
，但我完全唔想覆佢。
「又唔理我？」又係例牌等唔到我回覆再補多一句，問題係我真係連一絲覆佢嘅慾望都冇。