【甜/真人真事】我是他的常餐情人: 二十

第20章 遲來的無謂再等

「我會一直陪住你。」阿熙扶住我肩膊嘅手向後腰移去，我地個頭越嚟越接近大家，佢好聞嘅氣息縈繞我嘅鼻腔。我以前唔知道原來細心望佢對眼，眼裏邊會有將人吸入去嘅流光。我亦都唔知道從來只有互相慰藉嘅我同佢會有纏綿溫柔嘅一刻。

有一刻我突然間清醒，選擇將頭埋去佢嘅心口，佢深深地吸一口氣摸一摸我個頭，就算心入邊有幾多嘅衝動，我哋大家都好有默契地選擇唔服從呢一刻嘅激情，以免日後大家後悔。

佢由得我抱住佢一陣，呢個懷抱溫暖得我唔敢隨便流淚去破壞。過咗一陣我坐返好，佢都扮作若無其事咁開車準備送我返去，我拎出電話，發現居然有五個Miss call係嚟自Isaac嘅，我既然都上左人哋架車，呢一刻睇到佢在意又有乜嘢用？既然唔可以及時出現，遲來嘅都無謂再等。

「你去咗邊？」



「你覆一覆我電話啦。」

「你同keith係一齊？」你係咪覺得自己嘅玩具俾人搶走咗唔忿氣？但係係你嘅冷漠將我拱手相讓。

「使唔使我送你上去？」架車好快咁已經到咗屋企附近，阿熙見我腳步浮浮仲好貼心咁問需唔需要送我上去。

「唔使啦，我諗我可以。」

「如果真係好唔舒服的話再打俾我。」



「熙哥，你已經有太多人要關心啦。」

「但係你係最特別嘅一個。」

循例地攞出電話同一同Tony報告我已經返咗屋企，佢都好快地覆咗一句早唞，係佢嘅漠不關心背後，佢又會唔會感覺到佢嘅女朋友嘅感情世界已經亂七八糟？