【甜/真人真事】我是他的常餐情人: 十三

第13章 如果你係佢幾好

「不如收工飲杯嘢？」有一排無浦頭嘅阿熙突然MSG我，我口中嗰個唔算係SP嘅EX。我同佢其實做朋友好過做情侶有感情上嘅煩惱咪約出嚟飲杯嘢吹下水，當然有需要嘅咪餵飽下大家。不過自從佢有新女而我又有Tony之後我哋就變翻正常吹水friend，男同女之間嘅純友誼係可以存在，當然係撇除SEX呢樣生活需要以外。上次同佢吹水仲停留緊喺男神姐Issac話約我飲嘢，然後因為男神有另一半俾佢提點過唔好玩得太過火，睇嚟都係時候要update下佢近況。

因為係中學同學嘅關係我哋住得ok近下，阿熙約咗我喺我地最近果間Bar Pacific，其實2,3年前嘅話我哋會直接上佢屋企飲，攰咗就直接係佢度過夜，不過可能佢條女check得緊啦我地都好有默契咁約咗喺出面。我去到佢已經幫我叫埋嘢飲，其實我同佢上次見面都成大半年前，雖然平時都有MSG下佢都大概知我近況，呢段時間佢好似消瘦咗小小，著住件風褸睇嚟啱啱打完波。佢好知趣咁問我近排同男神點。
「er..我上次講到邊？」
「佢話飲嘢之後你哋有無約出嚟先？」佢好似個八婆仔咁，
「都有嘅..一個星期都會出嚟一次..囉」我講啲唔講啲費事咁快俾佢鬧，
「啊佢條女又幾好喎唔check佢嘅咩？」Issac條女係空姐，有時飛得密跑成2,3次先去Issac度訓一晚，佢又知道佢忙，基本上佢哋都見得好少。
「人哋見你仲多過條女，食咗未啊咁？」佢見我支支吾吾都知道唔係咁簡單，我點咗下頭


「都知你忍唔住啦，咁快手啊，等唔切俾人食啦。」佢把口其實衰到無人有，跟住我同佢簡單講咗下飲酒同打邊爐嗰次，再講咗下上次我地出去訓，
「你話呢，佢問咗幾次我留唔留過夜，是咪有咩特別意思啊拿？」阿熙呢啲業餘Player都唔知講嚟有無參考價值。
「乜唔係想第二朝Morning Q咩，不過你無留底叻女啊。」佢懶懶閒咁講，
「咁佢之後仲唔主動搵我，係咪後悔呢？定佢原本想同我好好發展但發覺我好似好易得手好隨便？」其實我都諗過係咪表現得太急進，
「唔好幫佢諗咁多嘢啦，佢都定性咗你哋係SP，搞完有咩好講姐，下次佢搵你你咪又係會仆到去。」
我覺得自己都幾可笑，居然為咗個對我無咩意思嘅人不斷構想獨角戲，
「佢咁乖仔，係咪調整唔到個角色呢？」我唔死心咁追問，
「不如我咁問啦，佢對你有咩咁好令你念念不忘呢？」
「佢會陪我OT啦教我嘢、而且佢搞嘢都好溫柔好正..」
「你做我同事呢啲嘢我都俾到你。」佢好認真咁同我講


「你明知佢同女朋友好穩定仲想要求啲咩？你想做人條女？」
「唔係啊，我無諗過要搞散佢同佢條女。」但我好似有鋪癮咁會想勾引人哋嘅所有物，包括阿熙同之前條女鬧交，嗰幾次同佢上床特別有快感。
「咁你仲想要啲咩？你要搞清楚自己身份，有時男人對SP就係咁，唔會好似我咁搞完你仲同你平時食下飯出下街，佢只會餓果時諗起你。」
明明就係個player而家又無啦啦又咁認真，
「如果你係佢都幾好。」我感歎地講。
「我都唔知點救你，你完全中咗毒。」

當心入面嘅情感完全搵唔到方法去宣洩嘅時候，我會不斷不斷咁去搵朋友傾，但無論點傾都好，都係解決唔到問題，因為我同佢嘅關係只能僅此而已，完全無進步改變嘅空間。