【甜/真人真事】我是他的常餐情人: 十二

第十二章 親吻是多餘的東西

耳畔傳嚟佢輕微而規律既呼吸聲，呢個星期佢四圍去做嘢仲要琴晚返嚟陪我，應該都未休息夠。
每次我完事後都總會想要一個親吻或者擁抱，我討厭被人用完即棄嘅感覺，男朋友老夫老妻唔能夠過分要求，而面前呢個人，對於SP，親吻只係多餘嘅步驟。我自知唔能夠任性地去抱住佢，好似對住名正言順嘅男朋友咁去渴求佢嘅溫存，我從佢手臂輕輕咁退出嚟，訓喺另一個枕頭上望咗佢一陣，再輕手輕腳咁掀開被落地，著衫，離開。

我以為第二朝佢會搵我，但原來佢個聖人mode可以keep幾耐下，一直到星期日、星期一朝早開例會，佢都無同我私底下講過嘢，佢如果想的話，可以連交接兩邊DEPT 嘅嘢都完全唔提及我，佢係一個領導者，甚至喺我同佢嘅關係上主導權都喺佢度，衰啲講句我都只不過係一個盲中中撲上去嘅𡃁妹。

下晝見佢行過嚟嘅時候戴住口罩，我又忍唔住想關心下佢，
「唔舒服？」「少少攝親姐。」佢好快就覆咗，我等咗一陣見佢冇打算講其他嘢，



「果日我走咗冇起身著返衫咩？」我係都要迫佢面對，
「um⋯係呀訓到天光。」

「點解唔留低？」
「你好似好攰咁，嗰日又仲好早」
「仲諗住食個早餐..」我無辦法想像呢啲溫馨地一齊起身、可能嚟個Morning Q再食早餐係咩玩法，其實連呢種關係對於我嚟講都係第一次，唔知喺佢心目中，我呢個咁隨便嘅人係咪百人斬又要𧦠佢無經驗呢？

「咁不如，今個星期搵日陪我食飯？」
「食飯定仲有其他？」
「你想呢？」「咁我book定房」