【甜/真人真事】我是他的常餐情人: 二

第二章 咁唔好返去住
「咁你夜返屋企，屋企人唔理你？」溫柔既大哥哥mode on，呢個時候嘅我，點會諗到呢個大家所謂嘅暖男都可以好無情？
「佢地都夜返唔會理我。」
「咁唔好返住啦。」佢試探性地講。
「咁你諗住帶我去邊？」佢聽到之後嘴角微勾。
「跟住我咪知~」
「你要教壞我做老泥妹..」飲咗酒嘅我有少少想嗲佢
「咩嚟嫁？」
「咪唔返屋企嘅女仔囉。」呢一刻我覺得自己有啲痴線，又好想知佢聽到有咩反應。



佢摸左我塊面一下，原本坐係半圓形梳化兩頭嘅我地，而家大脾貼住大脾，
「咁紅既你塊面？」佢隻手摸上我塊面有種冰涼嘅感覺，令我情不自禁咁揩咗佢隻手一下。
溫燙嘅觸感傳到佢手上，佢用指背輕輕地掂左幾秒，用手指輕勾我塊面令我同佢對望，唔知係咪幻覺，我地塊面好似越嚟越近。

喺我怕醜到頂唔順低下頭前，佢好似觸電咁放開咗我，隨即搵人埋單。

「有啲夜啦喎，不如走？」佢低聲問到。
佢若無其事咁同我並排行，由於飲完酒，比起來程既路多左好多身體接觸，一時又摸下我個頭，我又拍下佢咁，時間好似返到去之前為左project 一齊ot嘅日子。

仲記得有一次，啲人走晒淨底我同佢對資料，



「喂，I..saac..」佢轉個頭過黎，我先發覺大家既距離好似太近，甚至，唔知係佢轉過黎既空氣流動輕輕掠過我嘴唇定我地有一秒兩唇相交左。

氣氛靜得黎有d尷尬，我搞埋d手尾交俾佢

「喂..我做完野走先啦。」夜晚既Office，經典言情小說情節，係醞釀曖昧既最佳地方，我功力未夠，都係唔爭氣咁逃走左。

「我送你落樓？」終於發完呆既佢回過神，佢其實都幾gentleman。
公司Lift其實都幾細，落到下兩層一大班人入左黎，我同佢都逼不得已半貼住咁企。



呢個時候，又有兩個人入左Lift，我逼不得已咁更加向佢貼近，面上已經開始微微泛紅。
著住高爭鞋既我加上佢微曲既腳，造就左絕佳既曖昧角度。
雖然我低下頭仍然感覺到佢既氣息規律地碰觸到我條頸。呢種酥麻令我更加係耳根通紅。
我一抬起頭就見到佢帶住笑意既雙眼，佢有一對略帶外國人味道既深邃雙眼，而呢對眼加上調情般既笑意我更加係完全失去抵抗力，更加上佢一邊手輕輕搭係我膞頭。
「你塊面同耳仔紅曬啊！」佢低下頭係我耳邊呼住氣咁講，嘴唇刷過我通紅既面頰。
我好似觸電咁瞪大雙眼即刻伸手掩住佢岩岩輕聲細語過果邊耳仔。呢個行為實在係有d過火。
叮！
仿佛係過左成個世紀，終於落到地下。
我急不及待咁逃走，
佢大步追上我，慣性咁拉我去佢身邊，同我好近咁面對面。
「你唔似咁純情wo，咁易怕醜既咩。」佢輕輕彈左下我通紅既耳仔，我又即刻用手遮住隻耳仔，
佢似乎玩上癮，居然又輕輕咁摸左我耳仔一下，佢轉過頭若無其事咁繼續行，幫我截的士。
「夜啦，翻到屋企話聲比我知！」佢又輕輕鬆鬆咁轉翻去佢個哥哥mode。
我坐上車，久久未能平復心跳，甚至整個車程入面，都唔記得打比應承左會係樓下接我既男朋友。