【甜/真人真事】我是他的常餐情人: 一

第一章 俾張快籌你，就今晚

我望住佢忙碌嘅身影，戰戰兢兢咁send出msg，雖則平時OT都有閒聊，但私下msg唔知佢介唔介意我工事以外問佢無聊嘢呢？
「喂~你上次咪話公司附近有間野幾正？可以俾openrice link我？」
「做咩？想約我？」之前一齊做嘢嘅時候佢提過幾次想飲嘢，我仲以為佢講笑~
「朋友生日想搵間得意野慶祝姐..況且你咁難約」
「俾張快籌你，就今晚試菜？」
「又得姐，你收工未？」我欣然答應，早知道收工就去補個妝啦！

最後約咗喺佢屋企附近，我急急坐車去到相約嘅地方，男神Issac係公司同我地合作過幾次Project嘅隔離DEPT阿頭，跟住佢做嘢會有一種好放心嘅感覺，合作過幾次之後，間唔中lunch撞到佢都會叫我一齊食，佢有啲似我以前鐘意過嘅一個男仔，不過可能佢大過6年，比起記憶中嘅佢要更加成熟溫柔，


佢係全公司公認嘅好好先生，或者可以講係中央空調，唔知道佢之前話嘅飲嘢係客套定係有心約，不過其實我今次都有心試下佢平時對我嘅關愛係咪我諗多咗。

夜晚嘅旺區好多人，行喺佢旁邊佢好自然喺人多嘅時候會搭一搭我膊頭令我唔會撞到人，有一下無一下嘅接觸忽然之間有種青澀嘅心跳感。

喺我面紅心跳嘅時候，不經不覺已經行到去食嘢嘅地方，佢有打去留檯所以我地都好快可以落坐。之前都係同公司大圍出去食，除咗lunch食快飯認真單獨食飯都係第一次，

佢問過我有無咩戒口之後都好快落咗ORDER，
係咪同大過自己嘅人一齊~就會咩都有人幫自己安排好曬呢？呢個感覺似乎唔錯。

「上次個project有你地dept幫手好順利，飲杯慶祝下先啦」Waitress擺底一杯用茶做Base既酒喺我面前，佢拎起佢果杯講。


「我地DEPT嘅人有時會比較直接啲，你地多多包容，同埋多謝你教我嘢啊。」佢係隔離DEPT既Director，有好難得地無咩架子肯教人做嘢，
「咁啊,點報答我先?」佢笑住咁問，佢原來解開左粒恤衫鈕，忽然令我留意到佢起伏既胸肌紋路。
「我請飲嘢囉咁。」我胡亂咁應佢
「傻啦，今餐話咗慶功既嘛。」佢輕輕摸咗下我個頭。
「你係咪住喺港島，咁下次帶我去食好嘢啊。」佢漫不經心咁講。

我胡亂答好，然後目光有啲唔知點擺咁擺咗喺佢杯野度，
「你試唔試啖我呢杯？」佢講完有啲尷尬地R咗下頭，
「你下次可以介紹多幾款俾朋友。」
我都尷尷尬尬咁拎嚟試，留底咗一個好淡嘅唇印，


佢若無其事咁就直接係同一角度飲，原本容易飲酒面紅既我塊面更加㷫。

「早知我早啲約你啦，不過唔洗陪你條仔？」喂先生，你咁樣問係咪有啲犯規..
「呢度都有條仔要我陪。」我指一指佢。
「咁你夜返屋企，屋企人唔理你？」忽然間佢又一秒變翻大哥哥。
「佢地都夜返唔會理我。」