鬧鐘一响，我就回到了過去⋯⋯: 3.2 沒再問蝴蝶與莊周卻問時日那可偷
我第三次看著小綠的屍體，心情非常複雜，我知道自己站在這裡也改變不了甚麼，我知道自己會再一次回到過去，再一次嘗試拯救小綠，所以在這之前，我一定要想清楚具體做法。
「喂，做乜無晒聲。」Gibson在電話的另一邊說。
「我黎你屋企搵你？」我說，在電話談也不方便，我也想讓Gibson看看這個神奇的CASIO鬧鐘。
我轉身離開長江實業中心，夾雜在大量西裝男士和行政套裝女士之間越過馬路，到達遮打花園後，在噴水池旁我抬頭望天，這世界上有神明嗎？如果有的話，可以教教我該要怎麼做才好嗎？
我在中環登上了荃灣線的列車，離開了中環這個傷心地，Gibson住在火炭穗禾苑，是居屋中的豪宅，位於火炭半山，整條城門河和馬場的景色一覽無遺。
我在沙田火車站換乘小巴向著火炭半山進發，小巴下車後，我按下我一早知道的密碼，直接走進豐年閣內，Gibson住在高層一個向馬場的單位內。
和伯母打過招呼後，我直接走進Gibson的房間內，發現他正在用任天堂近年重新推出的迷李超級任天堂在玩實況足球2。
「喂，要唔要試下挑戰用蘇格蘭贏難度五嘅世界盃？」Gibson知道我進了房間，也沒有回過頭來，就問。
「痴線，我成廿年無玩，點打難度五？」我反問。
「試下之嘛，不過兩個人一隊連難度三都唔易打。」Gibson說。
「我諗我連點樣撳後腳『撩』波都唔識了。」我說。
「加速，然後放晒所有制再撳B丫嘛。」Gibson說。
「我唔係黎打機嫁，我黎搵你傾呢件野嘅問題。」我從口袋中拿出「黑夜不再來」，遞給了Gibson。
「就係呢個鬧鐘，可以幫你返去以前？」Gibson Pause了Game，放下控制器，改為拿起了「黑夜不再來」，然後問。
「嗯，我想返過去救小綠，你可唔可以詳細D解釋下你講過嘅『蝴蝶效應』？」我問。
「你有幾多年無見無搵黃嘉嵐佢？」Gibson沒有回答問題，反而問我。
「六年。」我答。
「或者你應該返去六年前，改變六年前嘅自己，等你呢六年內都Keep住搵佢，咁世界就應該會改變。」Gibson說。
「六年前？即係我決定唔再搵小綠果一年？」我反問。
「係，或者當你返到黎今年嘅時候，你會發現阿玲唔再係你老婆，而黃嘉嵐又唔會接受你，你單身一個，又寂寞又孤獨，華英雄咁。」Gibson繼續把玩著「黑夜不再來」，然後說。
「但係，因為我一直守護住小綠，所以佢會無事？」我反問。
「我唔知呀，我始終係2018年嘅人黎，要你做左先知。」Gibson說。
「但係⋯⋯」我一邊說，一邊打開「黑夜不在來」的電池蓋，給Gibson看那句寫在蓋子內側「只能回到更之前，24H。」的貼紙。
「噢，係阿玲寫嘅，呢舊野係佢比你嘅？」Gibson問，而且他認得阿玲的字跡。
「係，係阿玲比我嘅，呢個鬧鐘有個規則，就係每次返轉頭，都只能夠返到比上次『返去』更早嘅時間，最少都要廿四個鐘。」我說。
「咁如果你今次返左六年前，你下一次就只能夠返到六年前零一日？」Gibson再問。
「我估係，所以第一次我可以返到去小綠死之前一日，而第二次，我就要返去佢死之前兩日。」我說。
「咁六年係有D長，如果返六年前，你對救小綠呢件事有幾多信心？」Gibson問我。
「我就係唔知先黎搵你傾丫嘛。」我說。
「拿，你咁諗，呢個廿四小時規則，其實係要黎限制你用呢個鬧鐘嘅次數嘅。因為每次你都要再早廿四個鐘，而你返到過去要用返自己嘅身體，你而家三十六歲，即係話，你最多可以用大約一萬三千次，每次返去前一日。但如果你返到去太細個時又無乜用，你乜都做唔到，我當扣返十年啦，十歲嘅你應該OK嘅，即係一萬次唔夠。咁你一次過用六年，就係用左二千二百次左右，睇你覺得值唔值啦。」Gibson不知從哪裡掏出了一部HKEA Approved的計算機，一邊計算，一邊對我說。
「如果救到小綠嘅話，我就唔會再用呢個鬧鐘啦。」我說。
「雖然我同黃嘉嵐唔熟，甚至可以咁講，我認識嘅佢，全部都係靠你口中話比我聽嘅，但係，我覺得你可以試下，你諗返，就算唔得，你都仲有13140減3650減2190，即係有七千三百次可以用丫。」Gibson繼續按他的計算機。
「我今晚係你度訓，睇下你會唔會一齊返埋去？」我問。
「好，咁我地設一個暗號，如果到時相見，我會問你，或者你會問我，答啱就知我地都係2018年嘅我地了。」Gibson說。
「用咩暗號好？」我問。
「『麥芽糖』？」Gibson反問。
「呢個係《審死官》，套戲九二年上，你又成日睇，我如果無啦啦問你你都可能知道係呢個暗號啦。」我說。
「咁用咩好？」Gibson問。
「用『蘇格蘭打世界盃』啦，如果我講『蘇格蘭打世界盃』，你就答我『我成廿年無玩，點打難度五？』。」我說完，一邊調較好鬧鐘到六年前十二月的早上，一邊拾起放在一旁的超級任天堂控制器。
「好！」Gibson說，在超級任天堂的Reset鍵上按了下去。而我，則把鬧鐘的响鬧時間調較到2012年12月15日下午三時。
我們選了蘇格蘭，二人用一隊地挑戰世界盃，難度三，突破了外圍賽後，在分組賽輸了給巴西，和丹麥打和，沒法出線十六強。
之後我就在Gibson房間內的地上鋪好床墊，關了燈，徐徐睡去。