《遊夢玩家》［夢想］［網遊］［電競］（全程廣東話）: 第十二章 數學神算嘅狂戰Supporter？

「咪住先！你咁奇怪嘅⋯⋯我哋從來冇公開咁樣招收過隊員，你係點知道呢度㗎？」孫善尚聽到羅維素講咗佢嘅申請要求就即刻反問，夏時本身打算回答呢一個問題：「其實呢，係⋯⋯」

「你覺得我冇資格咩？」羅維素都反問對方一句，孫善尚完全覺得對方九唔搭八：「我講緊嘅係⋯⋯」孫善尚嘅性格突然之間180度改變講咗句話：「隻揪呀！笨！」 孫善尚當然都好唔憤氣啦，見到手機嘅訊息：裝備已經完成咗啦！直接話：「打咪打，輸咗你咪使指擬入嚟⋯⋯」

兩人隨即坐咗低，樂天明夏時完全阻止唔到佢哋兩個嘅怒氣，本身都諗住講：「其實呢⋯⋯嗰一個⋯⋯」點知兩人異口同聲咁樣講咗話：「收聲呀！」

孫善尚開咗間公平對戰房間，令到兩個角色都可以同時處於同一等級進行對戰， 羅維素亦都好熟手登入咗佢九年前嘅帳號，雖然途中有啲操作都係好唔熟手，但佢好似好快就攞返晒之前操作嘅記憶，佢揀咗Supporter，而孫善尚依舊用返Shooter，旁觀嘅人依然唔明白點解其中一個女仔要用輔助嚟打一個狙擊手。

當然孫善尚以為對方只係一個血氣方剛嘅一位新手，但夏時一啲都唔係咁樣諗，因為佢覺得羅維素用緊嘅似乎係某個人嘅套路。「Lv.30⋯⋯能量值⋯⋯」羅維素一時瘋狂一時認真嘅口氣，令到夏時覺得孫善尚呢一鋪兇多吉少⋯⋯





「設定好晒你嗰啲技能未啊⋯⋯」孫善尚問咗對方一句，即刻俾人反駁話：「唔使你催呀，可以開始未啊？」羅維素如此凶狠嘅口氣令到孫善尚咬緊牙關去準備呢一次嘅決鬥。

3、2、1⋯⋯

決鬥開始！上善若水一發追蹤彈開場，羅維素操控嘅修羅上身即刻用飛牆避開追蹤彈嘅重擊，雖然都扣左一啲血，但完全阻唔到佢嘅前進，呢一刻嘅操作令到大家都為之而振奮。好似一位狂戰士狂咁喺度埋身，上善若水當然只好盡快逃離現場不停喺度阻擊，亦都不斷咁走，以做到拉遠距離嘅效果。

修羅上身即刻用一招瞬移支援拉近左同對方小小嘅距離，但淨係少少，本身呢一招係用嚟進行大距離嘅瞬間移動，雖然有啲人都睇唔明點解要咁樣做，但夏時非常明白呢一個稱為狂暴輔助嘅打法，好戲還在後頭。

係對方差唔多埋到身嘅時候， 孫善尚完全感覺到咁樣嘅情況對自己非常不利，即刻用咗招投射射擊，將自己投射到再高啲同埋再遠啲嘅位置，佢都意識到對方嘅瞬間移動只係小距離，希望藉此可以拉遠同對方嘅距離令到對方唔使咁容易埋身。





點知對方窮追不捨，即刻用咗招數值支援加瞬移支援，加大左瞬間移動嘅距離，沖咗上去，係咁以打咗兩下，雖然傷害唔大，但係就令到孫善尚感覺到非常有壓迫感，令到自己嘅節奏完全亂晒，但佢完全諗唔到咁樣將會係佢呢一場戰敗嘅原因。

「MP30⋯⋯25⋯⋯」對比起遊戲裏便瘋狂嘅角色現實世界裏面嘅羅維素卻係非常淡定同啱啱180度轉變嘅佢又唔同咗。但又會無啦啦突然之間講一句話：「去死啦！八婆！」周圍睇緊嘅人都覺得太恐怖啦。

隨着嗰一句「去死啦！八婆！」即刻用咗能量支援，補充自身MP值但完全唔補返自己嘅血量，真係好似一位狂戰士一樣狂咁喺度打對方，但係佢算留咗一步或者話佢唔知道對方仲留有一手。

上善若水好唔容易咁樣搵返個節奏，即刻換咗方丈大師俾佢嘅嗰一把狙擊槍，只係見子彈射出，強大嘅後座力，令到修羅上身被打出好幾尺以外，呢個係令到羅維素完全估唔到嘅一點，但佢好快調整返自己嘅運算，大概咁粗略咁計算對方武器嘅數值就沖左上去，完全冇打算補血。

修羅上身嘅血量剩低5%，而上善若水大概剩低50%血。雖然呢種情況大家都會認為孫善尚喺有強力武器嘅幫助下，贏嘅把握會比羅維素多好鬼多，但好可惜嘅係羅維素佢粗略估計到對方滑鼠嘅靈敏度同埋對方移動期間嘅死角位置。





佢即刻埋對方身係對方諗住一擊必殺嘅時候，即刻瞬移支援到對方身後面⋯⋯

「咦？」孫善尚懷疑唔夠半秒，對方數值支援提升自己嘅攻擊參數，用晒自己身上所有嘅MP值賭呢一下嘅必殺，最後劈頸必殺勝出。睇到嘅人都對呢一個狂戰輔助嘅打法拍手叫絕，當然有啲人知道呢種打法曾經都出現過，但單單只係存在過係當年職業聯賽嘅個人賽當中，夏時甚至深深明白比當年嗰位選手，同時亦都係當年最優秀新人，秦偉信打得仲要出色。

遺傳咗羅素嘅數學基因同埋秦偉信嘅狂暴輔助打法加上自己獨有嘅一套算法同一邊挑釁一邊認真嘅性格，呢位選手無論比邊個團隊發掘到必然係一個超強嘅主力，但係如果淨係咁嘅話其實係唔夠㗎。

「夠唔夠膽再嚟多場⋯⋯」聽到羅維素講呢一句嘅夏時即刻手刀輕輕咁樣打落佢個頭度，佢性格又開始180度轉變，變返一位文靜嘅女子，即刻連忙講咗句話：「呃呃⋯⋯唔好意思啊！唔好意思呀！」

當然孫善尚雖然有啲唔憤氣但都覺得對方係一個超強嘅選手，自從之前夏時嘅邀請令到佢明白如果依個人可以加入到自己嘅隊伍將會係一件好事，亦都會令到合作越嚟越好玩，所以佢決定咗化敵為友。

「你係咪真係打算加入我哋嘅隊伍⋯⋯」孫善尚上前問咗一句，羅維素突然之間為啱啱嘅失禮不停喺度道歉話：「唔好意思啊！唔好意思啊！唔好意思呀！會唔會令到你唔開心㗎，我的確係想加入你哋嘅隊伍，但我都見到你好勁呀，其實我都想同你合作！」

「認、認真咩！咁⋯⋯你啱啱叫邊個八婆呀！」 孫善尚突然之間諗返起對方挑釁嘅說話，但對方亦都好禮貌咁樣道歉甚至就嚟喊出嚟話：「唔、唔好意思呀！」

對啱啱決鬥完全一頭霧水嘅樂天明流着汗咁樣問夏時：「呢個女仔乜料啊，成日嗰種性格，有時又突然之間變返呢種性格？」夏時就根據佢多年識羅維素嘅經驗答番佢話：「數學令到啲人咁奇怪都啱啦！」隨後會心一笑，當然樂天明完全唔明白啦。





孫善尚問對方一句：「想加入隊伍唔係唔得，但介紹一下自己個名同埋可以點樣稱呼你？」隨後羅維素佢自己介紹返自己話：「我叫羅維素，係⋯⋯」

「係我哋將來嘅得力輔助，而且係羅素個細妹，亦都係將會繼承佢嘅新精算師！」去到呢度在場所有人都啞晒！夏時摸着羅維素個頭嘅場面，亦都表明左佢哋原來都識。

「你識佢同羅素㗎，又唔早講！」樂天明當然好激動咁樣問夏時。

「雖然佢唔係羅素，但佢將會係一個比羅素更加勁嘅人！」夏時一邊解釋，羅維素就一邊點頭，但接住落嚟佢講嘅一句野顛覆晒所有人嘅想像，亦都可以講話冇大冇細咁樣講話：「因為一個生歐歐嘅人係會比一個死Q左嘅人更加有價值！」

「你嘅意思係話⋯⋯」

「羅素佢⋯⋯」

「死咗？」





在場根本唔知道呢個消息嘅人完全沉默左，本身仲要以為對方係喺度開玩笑，但一諗到對方如果真係羅素個細妹嘅話，咁呢個消息就珍珠都冇咁真。

「冷靜啲！唔係叫咗你唔好講嘅咩⋯⋯」夏時喺羅素細妹嘅耳邊咁樣講話，但佢又突然之間好有正能量咁樣講話：「呢個消息唔講出嚟大家永遠唔會知道羅家嘅秘密，睇住CODE沒落，我諗我阿哥都唔想咁樣，我希望大家可以完成佢嘅遺憾，重新帶熱返呢個遊戲，重拾我哋當年果一份熱情！」面對本應悲傷嘅少女，大家都受到佢正面嘅影響，默哀左3分鐘之後，大家重新投入返喺遊戲裏邊，但呢一刻大家再唔會只係因為對遊戲嘅鄙視而玩返呢隻遊戲，而係對死去嘅人嘅一種尊重。

甚至樂天明、夏時、孫善尚更因為羅維素嘅影響而變得更加堅定去建立呢一個職業隊伍同更加有決心去奪取聯盟冠軍。