由O Camp組爸組媽變左做真正既夫妻: Chapter 89

「我哋去邊度啊？」Claudia問我。

「不如食糖水啦。」我提議。

Claudia點左頭，然後佢叫我揸車去北角。我呢個男朋友當然要乖乖地聽女朋友話。其實搬咗黎太古城住咁耐，都未試過港島區有乜嘢好嘢食，來來去去都係公司或者大學附近食嘢就算。今次難得我同Claudia都得閒，咁就唯有等佢呢個導遊帶領我去食嘢啦。

如果用地膽來做比較嘅話，我就係沙田區地膽，Claudia就係港島區地膽。

我就揸車去渣華道，去到其中一間糖水舖就泊車，然後我哋兩個就走去食嘢。



「呢間野好出名㗎？」我問Claudia。

「OK 㗎價錢又抵，啲嘢好食。」Claudia話。

「咁就呢間啦。」我話。

我就叫咗個芝麻糊，Claudia就叫咗個杏仁糊，見到呢間野周圍都係人，我諗呢間舖頭一定會好出名。

講起對上一次糖水，我諗應該係Claudia失戀嗰晚約我出嚟，為咗安慰佢我就請佢食糖水。估唔到呢一次我哋已經甜甜蜜蜜咁樣拍拖。



「B啊？」Claudia問。

「咩啊。」我問。

「好耐冇食個糖水啦喎。」Claudia話。

「你又唔帶我去食，你記唔記得上次你食到成隻污糟貓咁呀。」我話。

「上次⋯⋯⋯多謝你安慰我。因為我先知道我應該要同一個乜嘢嘅男人一齊。」Claudia話。



「你而家識諗咪好囉。有我呢個老公，一定會錫到你燶既。」我話。

「你會唔會⋯⋯⋯背住我出軌㗎？」Claudia話。

「出嚟做咩啊？有咗你一個已經夠晒㗎啦。我依家只係想要求你做一樣野。」我話。

「咩事先？你唔係想⋯⋯⋯」Claudia問。

「我認真㗎，我只係想你以後都要開開心心，永遠都係我心目中最靚嘅老婆。」我話。

「係嘅老公，食嘢啦！」Claudia話。

我同Claudia一邊嬉笑怒罵，一邊喺度食糖水。有時兩個人簡簡單單已經好幸福。

見到Claudia食嘢個樣真係好可愛，搞到我想用iPhone去捕捉一下佢食嘢嘅美態。



於是我就攞出我嘅iPhone，準備按快門嗰下，Claudia已經用佢嘅纖纖玉手阻止左我偷拍。

「你喺度影乜嘢呢？」Claudia問。

「冇啊邊有嘢影呀。」我話。

「你有嘅，快啲影我啦，記得要可愛啲。」Claudia話。

既然女朋友要求，我就會聽晒佢話。然後我就開左Snow，較完Effect就幫佢影相。Claudia就好似我嘅模特兒咁樣任唔俾我影，話時話佢真係好似一啲日本女明星，不斷擺啲可愛嘅pose，去引誘我呢個男朋友。

結果我哋影咗都好多相，然後我哋兩個一齊睇。

「B你影得都幾好睇喎。」Claudia稱讚。



「幫女朋友影相係應該㗎嘛。」我話。

「不如我幫你影啦。」Claudia話。

Claudia就用返佢部iPhone幫我影，一般男仔可以擺得嘅pose一定會比女仔少好多。基本來來去去都係得個幾款，只求佢影得OK就算啦。

點知Claudia就好似攝影師上身咁，指點我做咩動作，差唔多醞釀左5分鐘。

影完之後我哋兩個就一齊睇相，見到佢影得我好似都幾靚，我當然要摸一摸佢可愛嘅臉龐啦。

食完之後，我哋就上返架掃把佬到，繼續喺度吹水。

「點啊夠皮未啊？」我問Claudia。

「當然未啦，我哋今晚要傾天光。」Claudia話。



「你想瞓我張床定係？」我問Claudia。

「又想姦我？發你個春秋大夢！」Claudia話。

我呢個時候已經抱住Claudia，然後就直接kiss咗佢，Claudia就主動迎接我嘅Kiss，不斷咁樣喺度濕吻。

只不過咁，我同Claudia做事會好有分寸，點到即止。我哋只不過係架掃把佬到Kiss。你問我點解唔車震？話晒而家條街都有人喺度，陣間俾啲高登連登仔偷拍在起我哋底咪死。車震當然要係啲冇人嘅地方先會做啦！

係車窗見到有一對着住校服嘅情侶，手拖手去拍拖，真係好開心。唔知Claudia着住女拔校服嘅樣會係點嘅呢？既然係咁樣嘅話，聽日就不如着校服拍拖，重回一下我們的中學時代。

「B啊，不如我哋聽日⋯⋯⋯」Claudia話。

「做咩啊？」我話。



「不如我哋一齊着校服拍拖囉。」我同Claudia異口同聲地講，估唔到我哋兩個心靈相通會講埋同一樣野。

「好啊。」我提議。

「而家呢我哋返去先，聽日呢就有精神去拍拖拖！」Claudia話。

我同Claudia就揸車返去，期待聽日上演一場「男拔仔」與「女拔妹」的約會。