由O Camp組爸組媽變左做真正既夫妻: Chapter 75

而家姐同姐夫見到我換咗車，感覺有啲愕然。而Claudia呢......當然態度照舊啦。

「阿勇換左車啊？我記得以前你係揸另一㗎個喎！」家姐問。

「冇啊！換架好啲，咁老婆可以坐得舒服啲啊嘛！」我話。

我一講完，大家都忍唔住係到笑。Claudia個樣變得有少少紅。然後我地就上車（我同Claudia就坐前面，佢地就坐後面）

等大家Ready好，我就開車啦。去機場主要都係行返觀塘道西行線上龍翔道出返葵涌啦。如果由觀塘、將軍澳開既A22同A29巴士就會好似我咁行，唔會出返旺角、大角咀咁傻仔。



係車廂裡面，大家都有講有笑。而Claudia就不斷係到同家姐講下女人野，又將我同Winnie以前既愛情浪漫史野話比Claudia聽，搞到我不斷被Claudia恥笑。但講下有咩所講啊？既然家姐都肯講、Claudia又想聽，當然我唔會反對啦！如果你話我日日係到埋怨，不如有時回味下同Winnie既開心日子，咁樣唔好咩？況且Claudia又唔介意，大方地接受我既過去，反而個人會放鬆好多。因為我知道Winnie個靈魂⋯⋯係陪伴著我地幾個一齊，永遠都會係我地身邊。

由於夜晚飛機都唔算多，所以入青嶼幹線都好暢順，用左十分鐘就到左機場。為左方便家姐佢地，我地就將架車泊入1號停車場裡面。

停好左架車後，我同Claudia就幫家姐一齊搬行李，齊齊上去離境大堂到Checkin。

「好啦，送到黎呢到得架啦！」家姐話。

「返到去嗰邊小心啲啊！下次返嚟香港再搵我哋啦！」我對家姐話。



「你哋都係呀！如果你同Claudia有時間嘅就嚟英國探我哋啦！我哋帶你去玩！」

「好啊！」Claudia搶着答。

「我哋都差唔多入去啦，你啊好好咁對Claudia啊！希望下次返嚟係飲你哋餐結婚酒！如果唔係呢我哋全部人都唔會放過你㗎！」家姐講結婚酒呢三個字，搞到我同Claudia面都紅埋。

「知道啦家姐！保持聯絡呀！拜拜啦大家！」

「Take Care！拜拜！」家姐佢哋向我哋告別，然後就同姐夫、麗瑤一齊入咗禁區。



又得返我同Claudia係到。目送到家姐佢哋入去之後，我哋兩個就行返去停車場嗰邊攞車。

回想返起呢個離境大堂，可謂百感交集。呢一到可以係我同屋企人因為可以去旅行而懷着興奮嘅出發心情；而呢一到亦都係我同Winnie最後一次見面嘅地方，嗰一個生離死別嘅場景，我永遠都唔會忘記。

不過依家有咗Claudia，就要將唔開心嘅嘢放低！希望呢一到就係我哋兩個結婚度蜜月旅行嘅必經之地。唔知第時我同Claudia結婚之後會去邊到蜜月旅行呢？搞到我諗起都好興奮⋯⋯忍唔住喺度笑。點知⋯⋯

啪～～