由O Camp組爸組媽變左做真正既夫妻: Chapter 69

隨着生日party嘅結束，各位小朋友同家長都收拾物品離開會場。Claudia就依然好似老師咁樣叫啲小朋友做好功課，同時佢亦都不斷同家長溝通，暫時將我放喺另一邊。另一方面，啲小朋友走埋嚟同我圍爐咁樣傾偈，為咗同佢地可以親近少少，我就痞低同佢地一齊講嘢，當然來來去去都係講吓大家鍾意睇咩卡通片，聽咩故事，唔通我會教佢地講粗口咩？我諗如果我教咗嘅話，一定會比Claudia破口大罵。

作為Claudia男朋友嘅我，雖然係對方嘅事業上唔會幫到啲乜嘢，亦都知道對方工作上有好多難處。我唯一可以做嘅就係喺佢身邊負責聆聽，默默地支持佢。因為呢一種嘅支持，就係令到對方開心嘅原動力，能夠勇敢與你相愛下去！

能夠同你拍拖，係我畢生嘅驕傲！

「好啦各位同學聽日見啦，記得做功課啦！」Claudia向小朋友訓話。

「拜拜Miss Lam，拜拜狸貓哥哥！」小朋友同我講。



咩話你哋話我似狸貓？都話唔係狸貓嚟㗎囉！雖然佢哋話狸貓好唔尊重我，不過我知道佢哋都冇惡意，所以我都冇話佢哋。

我哋一齊向班小朋友道別後，就手拖手行街街。而呢個時候為人師表嘅Miss Lam，就變返溫柔可愛嘅Claudia。

「Sorry啊B，要你同班小朋友玩！掛住同家長傾偈忽略咗你！」Claudia好內疚咁同我講。

「做咩要道歉喎？我好開心你帶我嚟呢度啊！」我將我嘅內心感受話俾Claudia聽，搞到佢好霖。

「真㗎？但係你唔嬲我掛住同家長傾偈？」



「傻嘅咩？我知道呢啲係你嘅職責嚟㗎嘛，我有一個咁負責任嘅女朋友，係我嘅福氣！」

我講完就捉住Claudia同自己隻手不斷撫摸自己塊面，感受下佢迷人嘅體香。

「我都係呀，多謝你一直都係咁遷就我！」

「傻瓜！我哋去邊度啊？」

「不如我哋去返時代廣場嗰邊行街呢。」Claudia提議。



「好啊！」

我哋就離開咗皇室堡，行返去時代廣場嗰邊。同Claudia享受下我哋二人時光。

而星期日嘅銅鑼灣，唔使我講一定會係好多人㗎啦，而呢一日我哋都唔例外。

記得上一次嚟呢度就係同Claudia玩互相交換禮物遊戲，然後大家比對方同一份禮物就係adidas波鞋。唔知今次會唔會又係玩呢個遊戲呢？

「B啊，你記唔記得呢度啊？」Claudia問我。

「點會唔記得呀，第一次就係同你係呢度玩O Camp既City Hunt；第二次就係你同前度分左手，約我出嚟玩交換禮物遊戲，我仲記得大家仲比左對方同一對鞋。」

「果然好記性啊，男朋友！」

「同女朋友行街點可以冇記性啊？」



「傻瓜，不如我哋去睇戲囉！」Claudia提議。

「好啊！」

呢個時候我哋個O Camp組爸組媽wtsapp群組叮左一聲，為免阻住其他人，我哋就行埋一邊睇訊息。

原來係Oscar同Alice話叫我哋五男五女去食飯，睇個地址原來係九龍城個附近，睇黎要返去攞車先得。然後Claudia就係講左話地兩個會出席，原本想問佢去唔去，點知佢就早一步幫我應承咗。

「B啊今晚去唔去啊？」Claudia問。

「你都幫我應承咗啦，唯有聽曬你話啦！」

「嘻嘻！最錫我就係你㗎啦！」Claudia講完就kiss咗我一下。



「係咪去睇戲啊？」我問Claudia。

「係呀，不如睇《寒戰2》啦！」Claudia提議。

我點左頭，除咗要聽曬Claudia話之外，其實呢套戲都幾好睇。因為之前睇過《寒戰》裏面嘅郭富城同梁家輝既對手戲真係拍案叫絕，而今輯就會講邊個係幕後玩家，同埋消失咗嘅衝鋒車去咗邊度。

於是我哋兩個上咗時代廣場13樓，買飛睇呢套《寒戰2》。