由O Camp組爸組媽變左做真正既夫妻: Chapter 64-Claudia故事篇2

到升Year4嘅暑假，我同Kary見到SU既大O有組爸組媽招募。起初我都對呢啲嘢冇乜興趣，因為我知道做組媽一定會比班仔仔同組爸搞，Edmond會唔鍾意。

「Claudia，有組媽招募啊！」

「咩啊我對呢啲嘢冇乜興趣。」

「咁你咪當陪我報囉，參加下都好啊！反正又未必入選到嘅。」

「你咁鍾意你自己報啦！」



「唔好啦！你唔記得咗啦咩，入到大學一定要搏盡無悔，唔可以令自己出到嚟做嘢之後後悔一生啊知唔知。」

被Kary咁樣慫恿法，我覺得佢講啲嘢其實唔係冇道理。始終大O每年只係有一次，如果今次錯過咗就唔會再有下一次。再加上Kary係我嘅好姊妹，在情在理都陪下佢玩啦。而另一個原因就係因為之前同Edmond吵大鑊，為咗放鬆吓心情，就決定去試吓，於是我就陪Kary一齊去交報名表。

點知，我收到SU大O Committee既電話，話我地兩個都同時入選左今年大O嘅組媽。既然洗濕左個頭，就唯有好好咁樣做組媽啦。

到組爸組媽Briefing嗰日，我竟然會重遇返Aaron，佢個樣同讀DBS時期完全冇變，依然都係咁青靚白淨同大隻，只係髮型有少少唔同。我真係估唔到原來佢都係讀HKU，仲要同我做大O Partner，齊齊做同一組既組爸組媽，唔通我同佢緣份未盡？


但係最估唔到嘅就係，佢竟然搬左黎太古城，同我做樓上樓下嘅鄰居。由於我哋係同一組，所以我地成日會有接觸。唔講唔知，原來Winnie兩年前係英國因為交通意外過咗身，令到Aaron大受打擊，變得自暴自棄。但佢對住我依然笑面迎人，無論對我、還是一班組仔組女照顧有加。係O Camp嗰陣我跌親，佢就即刻帶我返房；當我冇鎖匙返屋企，佢就即刻帶我上佢屋企休息、同佢妹妹一齊玩。係O Camp過兩日一夜裏面，我慢慢對Aaron產生左好感，甚至......我地玩Truth and Dare嗰陣我仲主動Kiss左佢。我知道咁樣係好唔岩，但係⋯⋯我真係控制唔到，因為⋯⋯佢真係太吸引我啦，每次見親佢，我都小鹿亂撞。



令我深刻嘅就係，當我同Edmond、Michelle攤牌嗰晚，腦海裏面只係諗起Aaron，嗰一刻我係想約佢，點知個傻仔真係驚我有事就即刻沖出嚟搵我。而呢個傻仔更加扮我新男朋友，幫我激走Edmond同Michelle呢對奸夫淫婦，仲係到主動Kiss左我。梁智勇你真係呢......好傻啊你。我唔舒服佢仲主動帶我去睇醫生，擔心我會大病一場，係嗰刻開始，我知道其實我鍾意嗰個唔係Edmond，而係Aaron。

雖然我所認識嘅Aaron係一個文武雙全、喺學業同運動方面都好突出嘅名校高材生，屋企環境都算不錯，但係呢個高材生嘅背後其實為人簡單爽朗、待人真誠。無論對住任何人，佢都好有禮貌，唔會擺出高材生嘅架子。係O Camp裡面，佢做咩決定都會尊重我呢個「老婆」既意見，令到我可以玩得好放心，可以將自己既性命交比佢。

而佢揸車就同佢為人一樣，都係好實際。凡事都會以屋企人同我行先，以佢嘅背景，大有本錢可以玩歐洲跑車，但佢冇咁做，雖然佢係買一架掃把佬，但係佢堅持都係要四門。目的就係想我同佢屋企人坐得舒服啲，同埋我知架電單車係佢同Winnie生前既回憶，為左唔想佢咁輕易放棄自己既野，我就叫佢就當係為左我，唔好放棄電單車，點知佢真係為左我⋯⋯真係唔放棄。試問一個咁為人着想嘅男仔，令我點樣唔會鍾意佢呢？

我知道Aaron其實係鍾意我架，但我知道佢因為Winnie既死好內疚，同時亦都擔心我再次受到情傷，唔敢接受佢嘅愛意。所以我一直係Aaron身邊鼓勵佢、關心佢、甚至特登去打佢同著得好性感去色誘佢，比佢可以抽下我水，睇下我迷人既身驅，甚至乎夜晚瞓覺嗰陣不時會自慰，幻想緊同Aaron做愛。目的就係想佢快啲向我表白。其實我真係好想做主動表白嗰個架，不過話晒我都係女仔黎，點都要有返啲矜持嘅。

後來，Aaron仲主動約我去迪士尼，叫埋Kary同Steven陪佢一齊去。當佢向我表白嗰陣，我真係感動到喊㗎。不過我見佢唔係好夠誠意，咪玩下佢囉！點知佢真係追上黎，仲大大聲聲咁同我講叫我做佢女朋友。見佢呢一次真係好有誠意，好啦！我就做你女朋友啦！點解我會咁快應承左佢？因為⋯⋯我知道佢對我係出自真心，唔係因為我既外貌同身材而盲目展開追求。



梁智勇你聽住，我今生今世都會陪著你走，一生一世也不分。為左你，我只會嫁比你；為左你，我只會同你做甜野；為左你，我只會幫你生BB。

唔好令我失望啊！