由O Camp組爸組媽變左做真正既夫妻: Chapter 6

我同Winnie點樣識架呢？就要由五年前有一次係聯校活動到講起！

當時我仲係一個中四既學生。。。。。係學校學生會文康部副部長

嗰時因為我地學校要係童軍中心要同女拔要搞聯校活動，所以學生會就派左我去開會

去到童軍中心個陣，我見到有個著女拔校服既女仔真係好靚。而且佢身材都唔錯。最重要佢有一種弱不襟風，好想男仔去保護佢既氣質，個樣好似全智賢。（即係來自星星既千頌伊）





當時既我都幾內向，基本上除左我媽咪同妹妹之外好少同其他女仔接觸。所以係開會期間都冇咩同個女仔交流

開完會之後我打算出去買野飲，點知見到個女仔原來㩒緊野飲。

不過見到佢拎住散銀包搵黎搵去，應該係唔夠錢

於是我就用八達通去幫佢比埋錢

個女仔好似當我救世主咁多謝我



「嗱請你飲啦！」

「點得架！不如下次我請返你啦！或者我爭住你先！」

「請你飲就請你飲啦 ！係呢佢地走晒拉喎！你仲未走既？」

「唔想走住，同埋而家係放工時間啊！想夜少少先走！係呢點稱呼你啊？」

「我叫梁智勇，你可以叫我做Aaron！」



「我叫關嘉穎，你可以叫我做Winnie！」

就咁樣我就開始同Winnie識左，後來我地係活動完左之後就成日約佢去街睇戲食飯。兩個月後我地兩個去石澳玩個陣就同佢表白左。雖然表面上我份人好似玩世不恭，吊兒郎當咁樣，但係其實我真係好驚好驚比女仔拒絕。

點知Winnie就一口應承左做我女朋友，仲話我除左佢爹地媽咪之外就係對佢最好既男仔。

WOW！我終於出Pool啦！YEAH！！！

同Winnie拍左拖之後，雖然佢有時會嗲下我，但係呢個女朋友都好識DO！

食野基本上都AA制，買野都係買D平野。好識為我著想。

而且雙方既家長都對我地兩個既印象都幾好，我地一齊既日子都好甜蜜冇嘈過交。

講真啦其實上天真係對我不薄，有一個樣貌與智慧並重既女朋友，我真係好感恩。



有時係到諗到底我地兩個會唔會結婚生仔。。。

到左我地拍拖既第三年，亦都係我地做大學生既日子。

我攞住手上既DSE成績單，以及JUPAS放榜名單，我竟然入左HKU法律系。簡直係人生中最美好既事。

而呢啲天大既喜訊當然要同Winnie講架啦。

「B，我考到HKU法律系啦！你考到邊間U啊？」

「我。。。爹地媽咪要我去英國讀書啊！」Winnie喊晒口對住我講

「點解啊？我地咪要一齊入同一間U既？你做咩唔遵守承諾啊？」



雖然我好嬲Winnie唔守承諾，但係我其實知佢都唔想，所以我好快就冷靜落黎，冇發佢任何脾氣。

「咁你幾時走啊？」

「如無意外既話，應該下個星期就去啦，你唔好咁傷心啦！到時你可以黎英國Exchange，同我一齊讀書架嘛。到時我地可以日日見面，一齊自駕遊啦！」

「好啊！不如呢一個月我地日日都要過得開開心心，要盡情咁玩個痛快。」

Winnie答應左我既要求

係呢一個月，我地日日都出去玩，有時會踩下單車，去下離島或者澳門，台灣旅行，甚至將自己既第一次奉獻比對方，呢段日子我地過得好Sweet，但係我個心真係好唔捨得。好驚以後都見佢唔到。

有一日，行到一間賣古兩衝程既電單車行，見到有架NSR250既電單車係到寄賣，我同Winnie第一眼見到嗰架車時，就好鐘意架車。奈何當時我未考到26同46車牌（等緊排期），而且都要成五萬幾蚊。

「B啊！架電單車好靚啊！」



「不過我同你都未有車牌，女仔揸呢啲車又危險。而且價錢都幾貴。」

「我只係叫你買黎車我咋嘛！我咁細粒唔會揸呢啲車既！」

 「總之我應承你，我考左電單車之後就買架呢架車，到時等你返黎香港之後就車你。」

「好！」

到左Winnie要去英國嗰日。。。我呢個男朋友就一早去佢屋企打點左一切，而佢父母、家姐亦都好識做。專登分開坐兩部的士，等我盡量爭取多啲時間去同Winnie相處。

去到機場，Winnie既父母幫佢去Checkin，而我就趁呢個時間要好好咁陪佢架啦！同時，我也不禁流下眼淚，而Winnie亦都不斷安慰我。

「傻豬，我地好快會見架啦！你係男仔黎架！要堅強啲！」



「應承我，去到嗰邊要好好照顧自己！比心機讀書啊。到時一放假就過黎英國搵你啦。」

「好！一有時間我同你就會Facetime同Wtsapp。你都係啊唔好咁低B啦！考到車牌後要車我行勻港九新界啊。You take care ok？」

Winnie比左個Goodbye Kiss我，然後佢就慢慢隨同佢父母、家姐入左閘。一步一步離我而去，我亦都忍唔住流淚。

https://www.youtube.com/watch?v=M7Y3EyVipPI

「原諒我好嗎　今天告別   　你那誓約依然動聽 　其實我期望愛一世 　地老天荒愛未停 　不要問為何離去 　一切恨愛怎可解釋應不應 　如何後悔或更多心碎 　縱捨不得都放開一切」 

入咗大學之後，我就好積極咁樣上莊、讀書、做PT，識咗好多個同學仔。咁做係希望令自己更加充實，時間可以快啲過。當然我應承咗每一日都要同Winnie wtsapp，記錄一下我哋最新嘅近況。同時我亦都考左26同46車牌，亦都儲到錢買左嗰架NSR250電單車。

見到Winnie係英國變靚咗，開朗左。我就知其實佢去英國讀書未必唔係一件好事。同時，我應承左Winnie要申請Exchange到英國同佢一齊讀書，所以我就搏命咁樣爭取Exchange既Quota。而上天都對我不薄，係我一番努力之下，HKU終於批准我Year 2可以Exchange到英國既申請。

正當我喺到點樣同Winnie係英國雙宿雙棲嘅時候，有一件好不幸嘅事發生咗係我哋身上。同時呢一件不幸嘅事，將我哋永遠咁樣從此天人永隔。

就係我出發前兩日，我收到Winnie家姐既長途電話。我聽得出佢個表情係好傷心。

「Aaron。。。」

「家姐做咩事啊？」

「Winnie。。。。。出咗事呀！」Winnie家姐喊晒口咁講

我聽完之後，我成個人變得好突然、震驚、難過。因為始終我唔相信呢件事係真嘅。而家諗返個天父同月老叔叔真係好殘忌，話隨時沒收就沒收返我既最愛。

「點解。。。會咁架？？？到底發生咩事呀！」

「佢。。今朝。。同一班同學去旅行，發生咗交通意外。醫生話佢頭先中午十二點。。。已經唔得啦！」

聽到呢到我已經泣不成聲，而呢個時候爹地媽咪見到我變得好傷心就喺度問我發生咩事，而妹妹就即刻同我講屋企有好大隻飛蛾飛埋黎。

結果我真係忍唔住喺度喊，佢哋見到我咁嘅樣，都知深知不妙。

點解。。。你要咁快離開我？點解。。。呢件事要係發生我身上？你應承過我要等我車你遊車河。。。應承過我要同我結婚生小朋友。。。點解你唔等埋我。。連你嘅最後一面都見唔到。。

遙遠的她　不可以再歸家
我在夢裡卻始終祇有她
遙遠的她
可知我心中的說話
熱情並無變
那管它滄桑變化

兩日後，我啟程前往英國。一方面陪同Winnie家人處理Winnie既身後事，另一方面就係要搞埋Exchange既入學手續。順便比呢個機會調整下自己既心態。

 我一邊幫Winnie收拾遺物嗰陣，一邊同佢屋企人傾偈。但係佢哋好似好睇得開咁樣，話Winnie只係返到天父既身邊。當我問佢哋Winnie臨終前同佢地講嗰啲咩嘅時候，佢哋只係同我講叫我好好咁樣生活落去，同埋搵一個俾佢更加好嘅女仔，然後好好咁樣對佢。同埋叫我有時間就去英國探下佢地。

到咗Winnie出殯當日，天空很藍，冇乜風同雲，係會令人一個出去遊玩嘅日子。佢著住白色長裙，好安靜咁樣躺在棺木中。無病無痛咁樣離開我地。

而我亦都收起哀傷，係瞻仰Winnie遺容嗰陣儘量為佢強顏歡笑。因為我識嘅Winnie係一個好樂觀好堅強嘅女仔。如果佢依家見到我咁傷心，佢亦都一定唔會開心。

如果真係有咗死後嘅世界，咁嗰個世界可能就會係某個人嘅心裏面。而Winnie就會係我心裏面永遠都唔會消失。

由於Winnie全家人都已經移民英國，所以佢嘅骨灰就安放喺當地既墓園。係英國嗰個半年Exchange裏面，基本上都係圍繞學校、佢屋企同親戚嘅屋企。係之後嘅日子，我就好俾心機讀書，識到好多朋友仔。有時就照顧下Winnie既父母，唯一冇做嘅係同第二個女仔拍拖，因為我真係好驚下一個女仔會好似Winnie咁樣離我而去。

Winnie，多謝你係我生命中出現！你放心啦我會好好照顧自己㗎啦！唔會自暴自棄！