由O Camp組爸組媽變左做真正既夫妻: Chapter 4

做完運動，聽到咁上下有d肚餓。於是行左落街買野食。

由於我初初搬來，對呢度嘅環境都唔係好熟

連去個7-11都要用Google Map同行左好耐先搵到

本來仲諗住買個燒賣撈麵同枝道地綠茶啦。點知我去到比錢嗰陣，先知冇帶銀包，連八達通都冇帶

嗰一刻我真係好瘀，好想搵窿捲啊。仲要比個收銀阿姨啤左兩眼，搵個人救下我呢個小朋友啦！



呢個時候，有個女仔突然間幫我比埋錢。。。

「唔該幫我計埋個男仔戈張單啦。」

呢把聲好嬌嗲，好溫柔同好熟悉。。。點知我望一望.......

嗚啊！！竟然係Claudia啊！！！





個收銀阿姨同我講：「後生仔，你要多謝呢位小姐啊。要好好報答人地啊。」

我同Claudia塊面即時紅左。。。然後互相對望。

離開左7-11，我地企左係門口到食野同傾計

「頭先。。真係多謝你啊！」

「唔使客氣！就當我請左你啦！」



「唔唔....係喎你又會係到既？」

「我住呢到架嘛。你又會識黎呢到既？」

「我都係住太古城架！」

「吓乜咁岩既，你住邊座架？」

「35座，綠楊閣啊。」

「咦喂我都係喎！哈哈！！你住幾樓啊？」

「19A同B啊，你呢？」

「24樓D啊。不過我係到住左咁耐都未過你既？」



「我新搬黎架，今日先搬黎呢到住。你係到住左好耐架啦？」

「係啊，我由出世住到而家，都住左成廿年啦。所以我呢頭已經熟晒架啦。」

「嘩！不過我對呢到唔係好熟。所以要靠你帶我摸索下呢到啦。連搵間7-11都用左好耐先搵到。」

「可以啊！不過條件就係要你以後車埋我返大學啦。同埋呢要你日日請我飲野！」

「好啊，一言為定啦。」

「傾左咁耐都唔知你中文名係咩添？」

「吓，唔好講啦！我個名好難聽架！」



「唔制啊！！唔制啊！！我要知。我要知。我最多唔會話比人聽既！」

「好啦！我叫梁智勇，才智個智，勇敢既勇。咁你呢？又叫咩名啊？」

「雅晴，林雅晴啊。優雅既雅，晴天既晴。頂你個名都唔係好難聽姐。」

「你都係叫阿晴啊，我阿妹都係叫阿晴喎。」

「吓又咁岩既？咁咪可以認佢做我妹妹攞。」

「你鐘意啦，下次有機會帶佢出黎同你玩啦。」

「好啊！！終於可以有得同妹妹玩啦YEAH!!」

「你冇兄弟姊妹架咩？」



「冇架。我係獨生女黎架。屋企得我一粒女咋。」

「咁你咪由細到大都冇人同你爭野玩攞？」

「係架。屋企人由細到大都管到我好嚴架。雖然由細到大都冇人同我爭野玩，不過有時都好寂莫架。頂你好啦，有個妹可以同你玩。」

「唉我個妹好煩架，成日問我攞錢同打我架。總之做哥哥真係好慘，日日都比妹妹恰。」

「對住你姐，對住其他人唔會既。」

「希望啦。如果有姐姐陪佢玩應該會好d既。」

「咁女仔鐘意同女仔架嘛。呢個好正常啊！喂問多你一個問題啊。」



「咩問題呢請問？」

「你點解會讀LAW既？D人唔係話讀LAW會好辛苦架咩？」

「哈哈！！都係睇興趣姐，其實我由細到大都好鐘意睇法律書同埋成日去法院到旁聽。再加上我讀LAW都係想用法律途徑去幫助d有需要既人，為佢地爭取合理既待遇。」

「原來你咁有正義感架！你好man啊哈哈！！不過通常讀law出黎d人都係掛住搵錢同埋幫d有勢力既人走法律罅既。根本都唔係幫助d有需要既人。」

「都係睇人姐，我覺得幫到人最緊要。係喎咁你呢？你又會讀education既？」

「因為我好鐘意小朋友，覺得佢地好可愛。而我由細到大都想做幼稚園老師。希望將來透過呢個身份黎同佢地相處，令佢地健康成長！所以我咪揀左呢個系黎讀攞。」

「啊估唔到我地兩個都同聲同氣啊！」

「吓！邊似喎？」Claudia又拍我

呢個時候，我地都覺得有d攰。再望下錶，原來已經係凌晨三時幾。

「嘩乜原來咁夜架啦，我都要返去訓啦。」Claudia望住個錶講

「係啦，我都要訓啦，行啦我地。」

我地兩個一齊搭lift上返去，到左我戈層

我同Claudia講拜拜。。。

返到屋企就訓落張牀到，雖然好攰好眼訓，不過其實我一直都訓唔著。。

個腦一直都係諗住Claudia。。。

而吸引住我既除左係佢可愛既外表，迷人既香氣，更加吸引住我既係佢純真既愛心。。。雖然我唔知係咪對佢有好感，但係最少我地既距離已經近左一大步。

可能呢d真係叫做。。。。。。緣份

我係太古城嘅第一個夜晚，就係俾咗Claudia呢個識左唔夠12個鐘頭嘅女仔。話時話⋯⋯⋯雅晴呢個名好熟悉，到底我以前係咪見過佢呢？但唔緊要，而家識佢都係一樣架姐。