由O Camp組爸組媽變左做真正既夫妻: Chapter 2

到咗第二日，我哋就開始我哋嘅搬屋計劃。由於呢間屋係我哋嘅祖屋，所以我哋只係搬啲重要嘢過去。

因為今日爹哋媽咪要返工嘅關係，所以搬屋嘅嘢都係由我一個人去負責。我起咗身之後，就將要搬去嘅嘢包裝好，然後就搵搬運公司既朋友仔幫我搬去太古城。呢啲瑣碎嘅嘢放係我架車到自己揸過去。

去到太古城個閘口，由於嗰度係私家路，所以我哋入到去個保安喺度問東問西。幾經辛苦我哋先可以入到去。

入到去停左車，我就同搬運公司嘅朋友仔一齊將一箱二箱嘅嘢搬上去我哋個單位到。由於要搬既野都幾多，結果搬咗兩三轉我哋先搞得掂。不過而家成30幾度高溫，搞到我件衫已經濕到一個點。呢啲咁既天氣，就會諗起Beyond既一首歌其中一句歌詞「火般的高溫燒滾我」，成個人熱到就黎著火。

俾埋啲搬運費同貼士比搬運公司嘅朋友仔之後，我就攞咗張摺凳坐咗喺度一陣就落返去架車嗰度。



我撻着左架車，發現個引擎聲好怪。但係又可以撻到車，不過今日決定特別啲唔行東隧，打算經紅隧過紅磡先，然後直行上公主道，再經窩打老道入獅隧。但點知行到去BU附近，架車突然間Boom一聲，然後車頭蓋突然冒起白煙，

情形就好似拓海咁樣：


於是我就打死火燈泊埋一邊，將自己啲貴重物品攞走。落車睇吓到底發生咩事。然後即刻打俾沙皮狗揸架拖車黎，再打比爹地。

過咗半個鐘頭左右，沙皮狗就揸左架拖車過黎。然後就幫我檢查架車到底發生啲咩事。

「喂！勇哥，你架車唔掂啦喎！」



「有冇得整呀？」

「點整呀大佬！你架車嘅芥蘭濕斷撚咗，脫離左活塞，然後從內側整爆埋個氣缸，穿左個大姑窿。成架車唔用得㗎啦！睇你老爹地要唔要留返個牌，然後再幫你搞注銷手續。你知啦AL字頭咁靚好難買得返㗎啦！」

呢一刻我個心情真係好Down，因為死去既唔單只係一部私家車，更加係我生命裏嘅一部份。或者應該向好過方便諗，呢架車陪伴左我哋屋企咁多年，我諗佢都係時候要俾佢退休啦！

講下沙皮狗既車房先：

佢間野係大圍成運路某間工業大廈樓下，面積相當大。專門改裝JDM同歐洲車。除左改裝技師，佢地仲會有自己既賽車隊伍。而且價錢公道，其師傅整車態度好認真，好細心。而沙皮狗同時係車房老闆，賽車手同工程師，係港大工程系畢業（細我爹地媽咪兩、三屆），我地兩家人既感情好深厚，而且佢個女同妹妹係中學同班同學。 基本上我有時就會黎呢到做下兼職，偷下師學整車。佢份人好玩得，同我、爹地一樣愛車如命，而且佢從來唔會得罪人，同附近啲行家猶如朋友。



而呢個時候，我哋就將架車放落嚟。見到周邊有幾架GTR R32、露筍、FD2，可想言之佢生意好到不得了。

同時爹哋亦都嚟咗。我覺得好奇怪佢唔單止冇鬧我，反而話我面對呢啲咁嘅情況可以臨危不亂，仲俾咗個like我。

跟住我哋幾個就執咗車嗰啲飾物，車cam，以及其他物品攞返屋企。而架車就交比沙皮狗任由處置。

當然而家嘅我，冇得再揸車啦！而爹地媽咪唔單止冇罵我半句，仲話架車咁走法已經好好。

或者向好嗰方面諗，架車保護到我最後一刻先得到解脫。然後有藉口可以換車啦。

當然而家既我係冇得揸車返學啦！以後出門口就只可以問人借車或者坐巴士啦。

再見了！我架100仔。